Miedyjanny zarobak — heta suma, bolš za jakuju zarablaje pałova rabotnikaŭ, a druhaja pałova — mienš za hetuju sumu. Takim čynam, heta pakazčyk zarpłaty siaredniestatystyčnaha rabotnika, a nie siaredniestatystyčnaj zarpłaty, što bolš nahladna adlustroŭvaje situacyju z zarobkami.
Paniaćcie siaredniaj naličanaj zarpłaty vyhladaje ŭmoŭna, asabliva kali ŭ krainie niašmat ludziej ź vielmi vysokaj zarpłataj i, naadvarot, mnoha ź vielmi nizkaj, kali pieravažnaja bolšaść atrymlivaje vielmi mała. Ale pieršaja hrupa ŭpłyvaje na farmiravańnie «siaredniaj tempieratury pa pałacie» značna bolš, čym druhaja. Dla paraŭnańnia, siaredniaja naminalnaja naličanaja zarpłata ŭ krainie za listapad skłała 1648,2 rubla, heta značyć, na 24,27% bolš za miedyjannuju. Prytym zvyčajna bolš za 2/3 rabotnikaŭ niedaciahvajuć da siaredniaj naminalnaj zarpłaty.
Pa halinach miedyjanny zarobak źmianiaŭsia nieraŭnamierna.
U pryvatnaści, u sielskaj, lasnoj i rybnaj haspadarkach u listapadzie 2022 hoda jon skłaŭ 1078,2 rubla, što na 18,3% bolš, čym hodam raniej, a ŭ pramysłovaści — 1498,8 rubla (plus 17,3%), u tym liku ŭ hornazdabyŭnaj — 3287 (vyšej na 31,5%) i ŭ apracoŭčaj — 1516,9 (plus 18,3%). U budaŭnictvie miedyjanny zarobak skłaŭ 1482,7 rubla (rost za hod na 13,8%), u razdrobnym handli — 1060,7 (na 11,1%), na transparcie i ŭ łahistycy — 1412,7 (plus 16,5%), u pasłuhach časovaha pražyvańnia i charčavańnia — 1006 (vyšej na 19,1%), u finansavaj i strachavoj dziejnaści — 1773,8 (na 19,1%), u adukacyi — 916,8 (na 12,2%), u achovie zdaroŭja — 1099 (plus 7,1%).
Spad adznačany tolki pa vyhladzie dziejnaści «infarmacyja i suviaź», dzie miedyjanny zarobak za hod skaraciŭsia na 3,5% da 2669,6 rubla, u tym liku ŭ IT-siektary — na 10,5% da 3812,1 rubla.
Danyja ab miedyjannym zarobku publikujucca dvojčy ŭ hod: za maj i listapad.
Raniej paviedamlałasia, što miedyjanny zarobak u Biełarusi za maj 2022 hoda skłaŭ 1167 rubloŭ.
