Minsk, 2020 hod. Fota sa staronki inicyjatyvy BY_help u fejsbuku
Praciahvajecca razhornutaja orhanami achovy ŭłady Alaksandra Łukašenki kampanija pa rekiecie ajcišnikaŭ, jakija adznačylisia danatami na padtrymku represavanych u 2020-m i 2021-m.
Čytajcie taksama: Krynicy: Jančeŭski prydumaŭ, kab prahramistaŭ za danaty 2020-ha nie sadzili, ale ździrali kampiensacyju ŭ dziesiacirazovym pamiery
Jak stała viadoma «Našaj Nivie», u asobnych IT-kampanijach praktyka dziesiacikratnaha multyplikatara spracoŭvaje tolki pry danatach ad sta dalaraŭ.
A jak być z tymi, chto danaciŭ mienš, skažam, 30 rubloŭ? Vyznačyli nižniuju płanku.
«Tysiača dalaraŭ — heta nižniaja płanka kampiensacyi, navat kali danaciŭ tolki 15 dalaraŭ», — paviedamili «Našaj Nivie» abaznanyja surazmoŭcy.
Čytajcie taksama: Stała viadoma, jak KDB vyličvaje tych, chto danaciŭ u BySol
Z ulikam taho, što ŭsiaho na BySol i BY_help achviaravali bolš za 60 tysiač čałaviek, łukašenkaŭcy chočuć sabrać u vyhladzie štrafaŭ dziasiatki miljonaŭ dalaraŭ. I heta nie harantuje, što ŭ budučyni na tych ža ludziej nie zaviaduć jašče i kryminalnuju spravu — jany ž pryznajuć, što achviaravali hrošy ŭ fondy.
Što budzie z tymi, chto admovicca płacić pa multyplikatary, nieviadoma.
Častku z tych, chto achviaravaŭ, vyklikajuć na razmovy ŭ KDB.
Łukašenkaŭcam viadomyja tyja pieravody, jakija rabilisia ź biełaruskich kartak. Fondy BySol i BY_help dapamahli dziasiatkam tysiač achviar palityčnych represij i ich siemjam — aryštavanym i zvolnienym z pracy. Efiektyŭnaść i advaha, ź jakoj dziejničali fondy, zrabili ich adnoj z hałoŭnych celaŭ dla łukašenkaŭskich śpiecsłužbaŭ.
«My nastojliva rekamiendujem źjechać z krainy tym, kaho vyklikajuć na «razmovu». Nichto nie viedaje, čym jana skončycca kankretna dla vas», — napisaŭ kiraŭnik BySol Andrej Stryžak u svaim telehram-kanale.
«Ci praciahvaje BY_help pracavać? — Tak, praciahvaje. I nikoli nie spyniaŭsia, — piša sa svajoj fejsbuk-staronki fundacyja BY_help. — Čym my dapamahajem? — My vyciahvajem ź finansavaj jamy tych, kaho našaja «hasudarśćva» sprabuje litaralna pazbavić usiaho. Štrafy, pazovy, dapamoha palityčnym, advakaty».
Na 2020 hod BySol i BY_help dziejničali na zakonnaj asnovie. Nadańnie novaprymanym zakonam «zvarotnaj siły» stała ŭ Biełarusi sistemnaj źjavaj.
Viedajecie važnaje, viedajecie cikavaje, što varta viedać usim? Pišycie redaktaru «Našaj Nivy» ŭ TH @nn_editor, na [email protected] ci [email protected]. Kali pišacie ŭ TH, vydalajcie čat paśla suviazi. Albo pišycie asabista tym žurnalistam i redaktaram «Našaj Nivy», jakich vy viedajecie i jakim daviarajecie (lepš — u sihnał ci telehram).
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
