«Zdajecca, našu fejkavuju tabličku vykrali halerysty. Ale IT-kraina — heta bolš, čym prosta kavałak doški, IT-kraina nazaŭždy ŭ kožnym z nas», — sumna iranizujuć stryt-artary.
Fejkavaja šylda «IT-COUNTRY BIRTHPLACE» była prezientavanaja na piersanalnaj vystavie stryt-artaraŭ 15 vieraśnia 2020 hoda, a paźniej raźmieščanaja na adnym z haražoŭ na praśpiekcie Niezaležnaści, 44b/18, u dvoryku kala kaścioła śviatoha Rocha.
Na šyldzie na anhlijskaj movie napisana, što hety haraž — miesca naradžeńnia ŭsich biełaruskich IT-kampanij i ŭniesieny ŭ (nieisnujučy) Nacyjanalny rejestr histaryčnych miescaŭ. U art-abjekta jość navat svaja staronka na TripAdvisor u raździele «Histaryčnyja słavutaści. Kulturnyja abjekty i słavutaści. Zahadkavyja miescy».
Darečy, mastaki prapanujuć usim, chto choć raz byŭ u hetym miescy, pakinuć svoj kamientaryj i vyvieści staronku fejkavaj słavutaści ŭ top.
Minskaja art-hrupa Hutkasmachna ŭtvaryłasia ŭ 2016 hodzie i stała viadomaja svaimi instalacyjami, jakija vy, napeŭna, nie raz bačyli na vulicach Minska. Adna ź ich — ciahnik pamiž karpusami zavoda «Haryzont» na vulicy Kujbyšava — dahetul na svaim miescy. Taksama mastaki rasstaŭlali na Pulichava čyrvonyja parasony, upryhožvali čarotam mastok pamiž Łošycaj i Sierabrankaj, viešali lusterki na Internacyjanalnaj, «topili» nadpis Design (abo Resign).
Praktyčna ŭsie pracy stryt-artaraŭ byli demantavanyja supracoŭnikami minskich ŽES i inšych adkaznych instancyj. Ale ź niekatorymi instalacyjami byli asablivyja historyi. Naprykład, u pačatku vieraśnia 2021 hoda ŭ sietcy burna abmiarkoŭvali, čamu zafarbavali tramvaj na ścianie byłoj halerei «Ŭ» — jašče adzin sa znakavych art-abjektaŭ Hutkasmachnaa. Tady novy arandatar budynka, stvaralnik modnaha chaba Dandy Land Andrej Pratapopaŭ patłumačyŭ heta paŭavaryjnym stanam ściany i prykmietnym vyćvitańniem samoha malunka.
Darečy, aŭtary stryt-arta pa-fiłasofsku staviacca da taho, što ź ich abjektami zaŭsiody niešta adbyvajecca. «Ich mohuć źnieści, razburyć, kudy-niebudź panieści abo zaharadzić płotam — za hetym zaŭsiody cikava nazirać, i da takich źmienaŭ ja staŭlusia jak da častki haradskoha žyćcia», — dzialiŭsia ŭ svoj čas adzin sa stvaralnikaŭ art-hrupy Andrej Busieł u vialikim intervju dla CityDog.io.
8 vieraśnia minułaha hoda mastak Andrej Busieł byŭ zatrymany siłavikami i asudžany na 13 sutak. Pra pryčyny zatrymańnia da hetaha času ničoha nieviadoma. Paźniej Andrej źjechaŭ z krainy.
Čytajcie taksama:
Śmiešnaje: niejrasietka namalavała vokładki albomaŭ kultavaha hurta «Niejra Dziubiel»
Minsk patrapiŭ u sotniu najlepšych haradoŭ śvietu 2023 hoda. Uhadajcie, na jakim my miescy
jak sumna bačyć, jak šeraść zmahajecca ź jarkimi mastakami...