5 studzienia spravu pačnie razhladać sudździa Maryna Zapaśnik.
«Viasnoŭcaŭ» abvinavačvajuć u kantrabandzie (niezakonnym pieramiaščeńni praz mytnuju miažu Jeŭrazijskaha ekanamičnaha sajuza ŭ bujnym pamiery najaŭnych hrašovych srodkaŭ arhanizavanaj hrupaj) pavodle č. 4 art. 228 Kryminalnaha kodeksa i finansavańni hrupavych dziejańniaŭ, jakija hruba parušajuć hramadski paradak, pavodle č. 2 art. 342 Kryminalnaha kodeksa. Troje pravaabaroncaŭ utrymlivajucca pad vartaj z 14 lipienia 2021 hoda — im pahražaje ad 7 da 12 hadoŭ źniavoleńnia. Sud pakul adkryty.
Zhodna ź viersijaj abvinavačvańnia, pravaabaroncy, «dziejničajučy ŭ składzie arhanizavanaj hrupy, z 4 krasavika 2016 hoda da 14 lipienia 2021 hoda, pad umovaj vykarystańnia na terytoryi Biełarusi dla niezakonnaj dziejnaści i finansavańnia PC «Viasna», a taksama inšych arhanizacyj, abnajavili hrošy, jakija pastupili ad roznych struktur i fondaŭ na bankaŭskija rachunki kantralavanaj imi zamiežnaj arhanizacyi.
Zatym z dapamohaj inšych asob, dziejničajučy z adzinym namieram, zabiaśpiečyli niezakonnaje pieramiaščeńnie na terytoryi Litoŭskaj Respubliki najaŭnych srodkaŭ u bujnym pamiery praz mytnuju miažu Jeŭrazijskaha ekanamičnaha sajuza ŭ ahulnaj sumie nie mienš za 201 tys. jeŭra i 54 tys. dołaraŭ ZŠA šlacham ich paetapnaha pieramiaščeńnia praź miažu biez dekłaravańnia».
Pavodle materyjałaŭ spravy, «jany ž va ŭkazanym składzie, a taksama ź inšymi asobami naŭmysna ažyćciavili padrychtoŭku hramadzian dla ŭdziełu ŭ hrupavych dziejańniach, jakija hruba parušajuć hramadski paradak, a taksama finansavańnie i materyjalnaje zabieśpiačeńnie takich akcyj pad vyhladam pravaabarončaj i dabračynnaj dziejnaści, u tym liku ad imia PC «Viasna», niezarehistravanaha fondu «BY_HELP», u pieryjad z traŭnia 2020 hoda pa 14 lipienia 2021 hoda».
U pryvatnaści, pravaabaroncam staviacca ŭ vinu:
- apłaty štrafaŭ za asobnych asob, «pryciahnutych na padstavie sudovych rašeńniaŭ, jakija ŭstupili ŭ zakonnuju siłu, da adkaznaści za administracyjnyja pravaparušeńni, źviazanyja z parušeńniem hramadskaha paradku i ŭstanoŭlenaha na terytoryi krainy paradku kiravańnia; inšyja pravaparušeńni, učynienyja ŭ suviazi z vyrazam pratestu na dziejańni dziaržaŭnych orhanaŭ Respubliki Biełaruś»;
- vypłaty takim asobam hrašovych kampiensacyj za srodki, zatračanyja imi na apłatu štrafaŭ;
- apłaty zamiest niekatorych asob, «jakija ŭčynili nazvanyja administracyjnyja pravaparušeńni, rachunkaŭ za charčavańnie ŭ miescach adbyćcia spahnańniaŭ u vyhladzie administracyjnych aryštaŭ»;
- apłaty pracy advakataŭ, «u tym liku za abaronu ŭ kryminalnych pracesach šerahu asob, pryznanych padazravanymi i paśla pryciahnutych u jakaści abvinavačanych pa kryminalnych spravach, źviazanych z hrubym parušeńniem hramadskaha paradku, vyrazam pratestu na dziejańni dziaržaŭnych orhanaŭ Respubliki Biełaruś».
«Dla infarmacyjnaha supravadžeńnia svajoj dziejnaści jany vykarystoŭvali internet-resursy PC «Viasna» ŭ sacyjalnych sietkach i mesendžarach», — havorycca ŭ abvinavačvańni.
Na padstavie pastanovy staršyni Śledčaha kamiteta sa zhody Hienieralnaha prakurora ŭ dačynieńni da Źmitra Sałaŭjova pravodzicca śpiecyjalnaja vytvorčaść.
Kryminalnaja sprava znachodziłasia ŭ vytvorčaści Hałoŭnaha ŭpraŭleńnia pa rasśledavańni złačynstvaŭ u śfiery arhanizavanaj złačynnaści i karupcyi Śledčaha kamiteta.
Nahadajem, ranicaj 14 lipienia da Alesia Bialackaha, Uładzimira Łabkoviča, Valancina Stefanoviča i inšych «viasnoŭcaŭ» ź pieratrusami pryjšli supracoŭniki Departamienta finansavych rasśledavańniaŭ. U chutkim časie im vystavili abvinavačvańni pa č. 2 art. 243 KK i źmiaścili pad vartu. Praz hod abvinavačvańni źmianili na bolš žorstkija.
Padtrymajcie palitźniavolenych listami, pasyłkami i hrašovymi pieravodami: SIZA-1, 220030, h. Minsk, vuł. Vaładarskaha, 2, Alaksandru Viktaraviču Bialackamu, Valancinu Kanstancinaviču Stefanoviču, Uładzimiru Mikałajeviču Łabkoviču
