Zimovaje tranśfiernaje akno jašče nie pačałosia, a «Reał» užo aformiŭ tranśfier, pra jaki buduć havaryć, — madrydski kłub abviaściŭ pra nabyćcio 16-hadovaha Endryka z «Pałmiejrasa».
Insajdar Fabrycya Ramana paviedamlaje, što ahulnaja suma tranśfieru — 72 miljony jeŭra. Ź ich 35 miljonaŭ jeŭra — suma za pierachod, 25 miljonaŭ jeŭra — bonus, 12 miljonaŭ jeŭra — płata za padatki. Adnak aficyjna tranśfier adbudziecca letam 2024 hoda, kali futbalistu spoŭnicca 18 hadoŭ. Kantrakt, vierahodna, budzie raźličany na 6 hadoŭ.
Dyk chto hety chłopčyk?
Paraŭnoŭvajuć z Ranałdu, jeŭrapiejskija hrandy stajali ŭ čarzie, kab padpisać jaho
Paśla vyletu Brazilii z čempijanatu śvietu Endryk staŭ futbalistam, jakoha najbolš abmiarkoŭvali ŭ krainie, — usio z-za jaho budučaha pierachodu ŭ madrydski «Reał». Chłopčyk 2006 hoda naradžeńnia pryciahnuŭ uvahu skaŭtaŭ topavych jeŭrapiejskich kłubaŭ jašče ŭ dziciačym futbole, dzie jon zabivaŭ praktyčna ŭ kožnym matčy. Ale surjozna pra siabie Endryk zajaviŭ mienavita ŭ 2022 hodzie.
Spačatku junak źviarnuŭ na siabie ŭvahu na turniry Copiña — čymści nakštałt maładziožnaha čempijanatu San-Paŭłu. 16-hadovy brazilec vystupaŭ za kamandu «Pałmiejras» U-20, dzie ŭ asnoŭnym hulajuć 18-19-hadovyja. Tam jon zabiŭ 6 razoŭ u 7 matčach, dapamoh kamandzie vyjhrać čempijanat i staŭ najlepšym hulcom turniru.
Sioleta ŭ studzieni brazilec staŭ chedłajnieram spartyŭnych ŚMI śvietu, kali zabiŭ fantastyčny miač udaram praź siabie z-za miežaŭ štrafnoj (adznaka 0:49).
Na radzimie Endryka ŭžo paraŭnoŭvajuć z hierojami minułaha — nazyvajuć samym jaskravym talentam brazilskaha futboła paśla Niejmara. Ale 16-hadovy supiertalent — u pieršuju čarhu centrforvard (choć i moža syhrać na abodvuch fłanhach ataki), a styl jaho hulni bolš nahadvaje Ramarya, Adryjana ci Ranałdu.
Niahledziačy na 173 sm rostu, Endryk — dužy i niepadstupny futbalist, jaki lubić zmahacca za miač, maje pastaŭleny ŭdar ź levaj nahi i ŭvieś čas šukaje mahčymaści dla ŭdaru. «Kali ja ŭpieršyniu ŭbačyŭ Endryka na treniroŭcy «Pałmiejras», ja skazaŭ: «Vaŭ, heta ž fienomien!». Jamu tolki 15, a jon hraje jak sapraŭdny prafiesijanał», — raspaviadaŭ uražany talentam junaka vychavaniec «Pałmiejrasa» Habryeł Žezus.
Niahledziačy na paraŭnańnie ź lehiendami brazilskaha futboła, svaim kumiram Endryk nazyvaje Kryšcijanu Ranałdu: «Vydatny i fienamienalny futbalist. Ja chacieŭ by pajści jaho šlacham».
«PSŽ» davaŭ 80 młn jeŭra za Endryka, adnak pieramoh u honcy za padpisańnie futbalista «Reał». Padazrajuć, što na vybar brazilca paŭpłyvała asabistaja sustreča z hałoŭnym trenieram Karła Ančełoci, jakaja adbyłasia niekalki miesiacaŭ tamu ŭ Madrydzie.
Čempijony Ispanii i sapraŭdy padpisali fantastyčnaha futbalista:
«Reał» addaŭ pieravahu Endryku, a nie Chołandu. U 2024-m atakujučaje trya madrydcaŭ moža składacca tolki z brazilcaŭ
Jak vy ŭžo, mabyć, zrazumieli, Endryk — patencyjalnaja zamiena Karymu Bienziemie, jakomu letam 2024-ha spoŭnicca 36 hadoŭ.
Niadaŭna ispanskija miedyja dzialilisia infarmacyjaj pra toje, što madrydcy buduć namahacca padpisać Erlinha Chołanda ŭ jakaści zamieny francuzu, ale ŭrešcie «Reał» zasiarodziŭsia na padpisańni Endryka. Taksama jość insajd, što atačeńnie 16-hadovaha futbalista ŭ pracesie pieramovaŭ paprasiła «Reał» nie nabyvać Chołanda — i heta stała adnoj z pryčyn, čamu baki tak chutka damovilisia.
Cikava, što ŭ budučyni atakujučaje trya «Madryda» moža składacca tolki z brazilskich futbalistaŭ: Vinisius Žunijar — źleva, Radryha Hois — na pazicyi pravaha krajniaha napadajučaha, Endryk — centralny napadajučy.
