Krynicy: Łukašenka davieryŭ «Makdonalds» Aleksinu

Fota: sacsietki restarana

Pa franšyzie, vydadzienaj restaranam, u nas pracavała kampanija «KSB Viktary Restarany». Ułaśnik — Kajrat Baranbajeŭ, kazach sa svajackimi suviaziami z Nazarbajevym, jaki ciapier u Kazachstanie apynuŭsia pad śledstvam.

Jak paviedamlajuć krynicy «Našaj Nivy», ciapier pryhladać za kampanijaj pastavili blizkaha da Łukašenki biznesmiena Alaksieja Aleksina.

«Ciapier dumajuć, što tam rabić dalej», — kažuć znajomyja ź situacyjaj.

Naviersie była ŭstanoŭka: ruskich na rynak nie puskać.

Na naradzie 12 śniežnia Alaksandr Łukašenka zajaviŭ, što «Makdonalds» ciapier «naša pradpryjemstva».

«Pradpryjemstvy, jakija byli zasnavanyja zamiežnym inviestaram abo pryvatyzavanyja, i zamiežny inviestar atrymaŭ hetyja pradpryjemstvy, a siońnia (heta ŭ asnoŭnym ź niedružalubnych krain i inšych) syšli — pamachajcie im rukoj, pierachryściciesia, što jany pakinuli vam ŭłasnaść. Usio ž jość. Ihar Piatrovič [Sierhiejenka], ja ž vam na prykładzie «Makdonaldsa» heta kazaŭ.

Pracavaŭ i pracuje. I ludzi prychodziać. I pradukcyju vyrablajuć narmalnuju. Ale heta ŭžo naša pradpryjemstva.

Nie zachacieli pracavać — nu jak chočacie. Našy ludzi nie durniejšyja, kab, jak ja kazaŭ, hetuju bułačku razrezać i ŭpichnuć tudy liście sałaty abo kavałak kaŭbasy. Dakładna tak i tut. Usio ž zastałosia. Jany ž z saboj ničoha nie zabrali. Ale kali b zabrali, to ja b pazdymaŭ hałovy z adkaznych ludziej. Nichto ničoha nie pavinien zabrać. Vy nie pavinny hetaha dapuścić».

56-hadovy Alaksiej Aleksin — heta asabliva nabližany da Alaksandra Łukašenki multymiljanier, jakomu davierana zajmacca apieracyjami z naftaj i naftapraduktami, a taksama tytuniom.

Jaho kampanii «Enierha-oił» i «Inter-Tabaka» pracujuć u śfierach ekanomiki, kudy ŭ Biełarusi puskajuć tolki samych nadziejnych. Manapolnaja sietka pa prodažy cyharet «Tabakierka», jakaja sprutam raskinułasia pa ŭsioj krainie, naležyć taksama «Enierha-oiłu» Aleksina. Aleksin atrymaŭ ekskluziŭnaje prava pradavać pradukcyju dziaržaŭnaj Hrodzienskaj tytuniovaj fabryki. Pa dziŭnym supadzieńni kantrabandnaja pradukcyja mienavita hetaj fabryki zaliła krainy Jeŭrasajuza nieŭzabavie paśla madernizacyi. Litoŭcy łavili kantrabandu navat u vahonach z kalijem.