U im prezident Rasii zajaviŭ, što «śpiecyjalnaja vajennaja apieracyja» (tak Kreml nazyvaje vajnu suprać Ukrainy) — heta «praciahły praces», i jaho vynikam pavinna stać nabyćcio novych terytoryj. «Pucin pravioŭ vyhadnyja paraleli pamiž saboj i rasijskim carom Piatrom I, adznačyŭšy, što ciapier Rasija kantraluje Azoŭskaje mora, za jakoje taksama vajavaŭ Piotr Vialiki», — kažuć amierykanskija ekśpierty.
«Zhadka rasijskaj impierskaj historyi adkryta pazicyjanuje ciapierašnija mety Pucina va Ukrainie jak vidavočna impieryjalistyčnyja i ŭsio jašče maksimalisckija, — skazana ŭ zvodcy. — Pucin rychtuje ŭnutranuju rasijskuju aŭdytoryju da doŭhaj stamlajučaj vajny va Ukrainie, jakaja patrebna dla zachopu novych ŭkrainskich terytoryj».
Akramia taho, amierykanskija ekśpierty źviartajuć uvahu na pieršaje za apošnija try tydni prymianieńnie va Ukrainie dronaŭ iranskaj vytvorčaści «Šachied». Ukrainskija vajskoŭcy zajavili, što vojska RF znoŭ vykarystała ich u noč na sieradu dla ŭdaraŭ pa niekalkich haradach, u tym liku Dniapry, Kijeŭskaj, Pałtaŭskaj, Žytomirskaj i Zaparožskaj abłaściach.
«Rasijskija siły, vierahodna, madyfikavali drony dla prymianieńnia va ŭmovach bolš chałodnaha nadvorja i, chutčej za ŭsio, u bližejšyja tydni ŭsio čaściej buduć ich vykarystoŭvać dla ŭdaraŭ pa ŭkrainskaj krytyčnaj infrastruktury», — pišuć u suviazi z hetym ekśpierty ISW.
Raniej ukrainskija vajennyja mierkavali, što Rasii pryjšłosia prypynić vykarystańnie dronaŭ iranskaj vytvorčaści, pakolki jany nie prydatnyja da vykarystańnia ŭ chałodnaje nadvorje. Ciapier, vierahodna, armii RF udałosia vyrašyć hetuju prablemu.
«ISW raniej paviedamlaŭ, što rasijskim vajskoŭcam davodzicca ŭsio bolš spadziavacca na vyrablenyja ŭ Iranie sistemy z-za vyčarpańnia arsienała rasijskaj vysokadakładnaj zbroi», — pišuć ekśpierty amierykanskaha instytuta.
