Čamu EPAM
Paśla ŭniviersiteta ŭsie maje siabry pajšli pracavać u EPAM, mianie atačali adnyja prahramisty. Ja nie byŭ technarom, skončyŭ jurydyčny, ale taksama chacieŭ patrapić u EPAM.
Było adčuvańnie, što EPAM — heta cytadel, kudy traplajuć najlepšyja z najlepšych. Voś jak raniej ajfon: vałodańnie im — prykmieta statusu i krutaści. I mnie taksama zachaciełasia.
Usiaho ja siem razoŭ sprabavaŭ tudy patrapić. Pačatak byŭ pakładzieny jašče ŭ maim daajcišnym žyćci. Potym ja staŭ ajcišnikam, a mara ŭładkavacca ŭ EPAM usio jašče sa mnoj.
Pieršaja sproba
Heta byŭ 2008 hod. Ja pracavaŭ jurystam u bujnym dziaržaŭnym banku i dumaŭ pierajści ŭ inšaje miesca.
U toj čas, kab stać suiskalnikam na pasadu ŭ EPAM (ja pretendavaŭ na vakansiju jurysta), treba było zapoŭnić ankietu, pavodle abjomu infarmacyi suraźmiernuju z ankietaj pry padačy na amierykanskuju vizu. Ja ŭsio zapoŭniŭ, siabry dapamahli z vodhukami. Na zajaŭku pryjšła admova. Jano i zrazumieła: u mianie ž nie było dośviedu pracy ŭ kamiercyjnaj struktury.
Pierakanaŭsia, što prosta tak u EPAM nie patrapić, i na niejki čas pakinuŭ maru.
Druhaja sproba
U 2013 hodzie ja atrymaŭ druhuju vyšejšuju adukacyju (mieniedžar-ekanamist), pierajšoŭ u pryvatnuju kampaniju i, kali ŭbačyŭ vakansiju, pasprabavaŭ jašče raz. Znoŭ na jurysta.
Da ankiety prykładaŭsia cikavy test na łohiku i kiemlivaść — apošnim časam ja takich testaŭ nie naziraju. Usio adpraviŭ — i, viadoma, znoŭ admova.
Čamu viadoma? Sfarmavanaje staŭleńnie da EPAM jak da miesca, kudy traplajuć najlepšyja z najlepšych, nikudy nie padziełasia. I, adpraŭlajučy reziume, ja nie spadziavaŭsia na cud.
Mahčyma, moj dośvied u kamiercyjnaj arhanizacyi byŭ niedastatkovym. Praź niekatory čas vakansija źnikła, i adnačasova ja ŭbačyŭ, što maja adnakurśnica pamianiała status u FB: pačała pracavać u jurdepartamiencie EPAM.
Zrabiŭ vysnovu: jurystam nialohka ŭładkavacca na dobraje miesca, moža, treba, kab za ciabie zakinuli słoŭca. Ale da EPAM ja hetaj umovy nie adnošu. Maja adnakurśnica była vydatnicaj, a ja atrymlivaŭ prosta dobryja adznaki, tak što ŭsio sumlenna.
Treciaja sproba
U 2016-m ja vyrašyŭ kruta pamianiać svaju dziejnaść i pieravučycca na raspracoŭščyka softu. Mnie tady było 30, pastaviŭ sabie za metu ŭvajści ŭ IT da 35-i.
U IT-akademii «Krok» ja pravučyŭsia 2,5 hoda. Pastupaŭ na raspracoŭščyka, ale potym adkryŭsia kurs prodžekt-mieniedžmientu, i ja zrazumieŭ, što heta mnie bližej, čym raspracoŭka, pierajšoŭ tudy.
Vykładčyki tam byli cudoŭnyja. Adzin ź ich dapamoh zrazumieć, što ja bolš schilny da biznes-analityki.
Jašče padčas kursaŭ, u 2018-m, ja znoŭ pasprabavaŭ zaniać vakansiju ŭ EPAM — jak BA. Biespaśpiachova. Pryjšoŭ taki adkaz: «Dziakuj vam za cikavaść da vakansii Business Analyst. Na žal, nie zmahu zaprasić vas na sumoŭje ciapier, bo ŭ nas adkrytyja pazicyi na prajektach, dzie patrabujecca dośvied minimum 2 hady ŭ čystym IT-biznes-analizie».
Zatoje praź niekalki miesiacaŭ ja ŭsio ž uvajšoŭ u IT— uładkavaŭsia biznes-analitykam u nievialikuju aŭtsors-kampaniju.
Čaćviortaja sproba
U 2019-m ja chacieŭ padacca ŭ EPAM na pasadu PM, ale nie było adpaviednych vakansij.
Zrešty, ja nie pakidaŭ spadzievaŭ prabicca ŭ hetuju cytadel. I adnojčy ja ŭ jaje amal patrapiŭ. U LinkedIn źjavilisia vakansii ŭ servis-desku na prajekt, źviazany z mašynnym navučańniem. Praca — miechaničnaja, treba było navučyć mašynu raspaznavać typ dakumientacyi. Tudy nabirali ŭsich i kožnaha, hałoŭnaje patrabavańnie było pravilna identyfikavać dakumienty. Ja taksama padyšoŭ i dva tydni zajmaŭsia tym, što zapampoŭvaŭ u kampjutar fajły.
Heta byŭ pramieńčyk spadzievu (a raptam potym voźmuć na paŭnavartasnuju pasadu?), ale jon nikudy mianie nie pryvioŭ. I ŭ cełym hety dvuchtydniovy dośvied ja nie razhladaju jak relevantny.
Piataja sproba. Z sumoŭjem
U 2021 hodzie da mianie ŭ LinkedIn upieršyniu sam pahrukaŭsia rekrutar EPAMa. Ivan, ci nie žadajecie vy pahutaryć? Ja, viadoma, žadaŭ.
Narešcie było pryznačana sumoŭje, jano vyjaviłasia krutym i karysnym — jepamaŭskija sumoŭi naohuł dobryja.
Ale ja jaho nie prajšoŭ. Čamu? U žyćci ŭvajścišnika jość niekalki etapaŭ: 1) uvajści ŭ IT; 2) z maleńkaj kantory trapić u vialikuju. Druhi etap byŭ mnie jašče nie pa zubach: usio ž taki pracesy ŭ vialikaj arhanizacyi adroźnivajucca ad tych, što ŭ maleńkaj. U maleńkich kampanijach kamunikacyja časta budujecca na čałaviečych adnosinach, jany praściejšyja i chutčejšyja. U vialikich karparacyjach — składana vybudavanyja pracesy.
Mianie na hetym i padrezali: stali zadavać pytańni, u jakich ja nie mieŭ praktyčnaha dośviedu. A viedy teoryi byli niedastatkovymi.
U vyniku pryjšła admova ź fidbekam, što treba padciahnuć. Dobra, ja ŭsio zrazumieŭ.
Adnak žadańnie syści sa svajoj maleńkaj firmy ŭžo sfarmavałasia, ja prajšoŭ sumoŭje i syšoŭ u bujnuju kampaniju. Što praŭda, prapracavaŭ niadoŭha — vyjaviłasia, što zarobak tam płaciać 25-ha čysła nastupnaha miesiaca. Dla mianie ŭ toj momant heta było krytyčna i nieprymalna. Ja pajšoŭ u inšuju kampaniju, na 500+ čałaviek.
Šostaja sproba
Nastupny raz ja pahrukaŭsia ŭ EPAM u žniŭni 2022 hoda. Prajšoŭ techničnaje sumoŭje i atrymaŭ dobry fidbek, mianie ranžyravali jak «amal sieńjora». Dumajecie, uziali? Ničoha padobnaha. Vusna mnie skazali, što ŭ ich lišak midłoŭ i midłoŭ+ na benčy, i tamu jany nie hatovyja mianie pryniać.
«The candidate has huge practical experience working as a BA on the projects and in case if he covers his theoretical gaps and receives experience of setting up BA approach and processes on a project he can be considered as a Senior BA.
Unfortunately, regarding TI results performed we are not ready to make the offer to you but will be glad to reach you out in 6 months».
Mabyć, ja nie zusim sieńjor, a chutčej midł+. Mahčyma, ja nie ŭdzielničaŭ u pracesach, na jakija jany raźličvali. Tak, ujaŭleńnie pra ich maju, ale praktyki nie było.
Siomaja sproba
Zusim śviežaja. U listapadzie siadžu, nikoha nie čapaju — raptam pišuć mnie znoŭ z EPAMa: Ivan, ci nie chočacie? Chaču.
Pahutaryli z rekrutaram, paśmiajalisia. Kažu: voś u 2023 hodzie budzie 15 hadoŭ, jak ja sprabuju trapić u EPAM na paŭnavartasnuju pasadu.
Rychtujusia da techničnaha sumoŭja, užo nie ŭjaŭlajučy, pra što mianie buduć pytać. Ale EPAM umieje ździŭlać. Sumoŭje było całkam na anhlijskaj movie, 1,5 hadziny. Praviarali, ci padciahnuŭ ja momanty, jakija byli pakazanyja raniej.
Užo praź niekalki hadzin pryjšoŭ fidbek. Pačynaŭsia jon tak: u cełym Ivan — dobry kandydat. Nadzieja zabiłasia ŭ maim sercy. Ale rekrutarka skazała, što heta jašče ni pra što nie kaža, što treba niešta ŭzhadnić. I voś jana viartajecca z čarhovaj admovaj. Matyŭ jak i ŭ žniŭni: vialiki benč ź midłoŭ.
Ź fidbeku:
«In general, he is a good candidate unfortunately, low demand for L2».
Ale tut ja ŭžo byŭ źbiantežany. Spadarstva, kali ŭ vas vialiki benč, našto vy pravodzicie hutarki? Ci vy raźličvali, što ja vyjaŭlusia sieńjoram? Dyk mnie, zdajecca, i sieńjorskich pytańniaŭ nie zadavali. Što praŭda, ja nie vielmi razumieju, što takoje sieńjorskija pytańni biznes-analityku. Choć rastłumačcie tady, chto ŭ vašym ujaŭleńni sieńjor, jakimi skiłami jon musić vałodać?
Karaciej, cudu nie adbyłosia. Jašče adnaja vysnova: stanoŭčy fidbek nie harantuje pracaŭładkavańnia. Ale ja ŭsio ž rady ŭdziełu ŭ hetych sumoŭjach: u EPAM jany prachodziać pravilna i nie pakidajuć adčuvańnia, što ciabie vytrybušyli.
Ci achvota jašče ŭ EPAM
Užo i nie viedaju. Znajomy mnie kaža: našto ty tak upiorsia, jano tabie naohuł treba?
Moža, heta i niezdarova, moža, raznavidnaść stakholmskaha sindromu: tvaja ideja fiks biare ciabie ŭ zakładniki, a ty da jaje pryviazvaješsia.
Ź inšaha boku, u IT ja ŭsio adno ŭvajšoŭ, tak što hałoŭnaja meta dasiahnutaja.
