Darycie kachańnie, aptymizm, nadzieju i vieru ŭ cud. Try karysnyja parady, jak pravilna vybrać padarunak 1

Stańcie čaraŭnikom

— Novy hod — śviata, jakoje nie tolki dla dziaciej, ale i dla darosłych zaŭsiody źviazana z mahijaj, čaraŭnictvam, — pierakanana psichołah Taćciana Šaranda. — Tamu važna, kab samy prosty padarunak źmiaščaŭ niejki siurpryz, kab jon byŭ niezvyčajna padniesieny.

Adna dziaŭčyna raspaviała mnie, u jakoje zachapleńnie pryjšoŭ jaje chłopiec, kali na Novy hod jana ŭručyła jamu vialiki hielevy šar ź jaho partretam, a mamu prymusiła navat praślazicca źviazanymi z voŭny jołačnymi roznakalarovymi šarami. Zdavałasia b, hetyja rečy niadoraha kaštavali, ale pakaryli svajoj aryhinalnaściu, — u ich adbiłasia ščyraść i hłybinia pačućciaŭ, hatoŭnaść pamarnavać čas, padnapružyć fantaziju, kab pryjemna ździvić darahich, kachanych ludziej.

Navat vypiečanyja tradycyjnyja piražki mohuć zapomnicca na ŭsio žyćcio, kali ŭkłaści tudy niejkija siurpryzy i razyhrać pamiž haściami! Šmat u kaho, niezaležna ad uzrostu, śviatkavańnie Novaha hoda tryvała asacyjujecca ź zihotkimi navahodnimi cackami, hirlandami, fiejervierkami i bienhalskimi ahniami — Śviatłom, jakoje adolvaje Ciemru. Tamu nie bojciesia daryć usio bliskučaje, iskrystaje, pieraliŭnaje: jano vydatna padydzie dla stvareńnia vyklučnaj, čaroŭnaj, kazačnaj atmaśfiery.

Patrapić u dziasiatku

Niekalki paradaŭ, kab vybrać udały padarunak:

• Zabudźciesia pra banalnaje. Dziasiataja pa liku patelnia ci rondal napeŭna nie vyklikaje zachapleńnia ŭ žonki — jana ŭsprymie ich jak namiok na pažyćciovuju katarhu la plity. Tradycyjnyja škarpetki ci krem dla haleńnia mohuć być rascenienyja mužam ci pryjacielem jak adsutnaść sapraŭdnaj cikavaści i pavahi da ich niepaŭtornaj indyvidualnaści.
• Prysmaki nie pryniata daryć mužčynam, a śpirtnoje — žančynam.
• Vielmi važna pamiatać pra pieravahi čałavieka, kali chočacie jaho paradavać. Nie varta daryć karcinu tamu, chto mała cikavicca žyvapisam, zbornik fantastyki — amataram detektyvaŭ, nabor instrumientaŭ čałavieku, jaki nie ŭmieje navat zabić ćvik. A voś kali vašaj svajačcy padabajecca hatavać, kali jana naležyć da liku prychilnikaŭ zdarovaha charčavańnia, to napeŭna budzie hłyboka ŭdziačnaja za paravarku, pra jakuju daŭno maryła. Lohka paradavać siabra, kalehu, svajaka, kali vam dobra viadoma pra ich zachapleńni — rybałkaj, malavańniem pa numarach, sadoŭnictvam, vyšyŭkaj i h.d.
• Abaviazkova ŭličvajcie ŭzrost taho, kamu pryznačajecca taja ci inšaja reč. Šalik ci tapki, jakija pryjducca da spadoby dziadulu, mohuć pakryŭdzić siabra.
• Daryć chatnich hadavancaŭ treba tolki tady, kali dakładna viedajecie, što mienavita ich nie chapaje dla poŭnaha ščaścia hetamu čałavieku. U takich vypadkach dobra było b napiaredadni ŭdakładnić pra jaho padrychtavanaść zavieści čaćvieranohaha siabra, vyśvietliŭšy ŭsie pieravahi adnosna parody, źniešniaha vyhladu i h.d. Adna sprava — nabyć ščaniuka dziciaci, jaki ŭvieś čas prosić pra heta, zusim inšaja — uzradavać im na Novy hod mamu abo pryjacielku, jakija zamiłoŭvajucca čužymi kacianiatami i sabakami, ale sami zusim nie majuć času, srodkaŭ i sił, kab zajmacca imi.
• Pamiž blizkimi i siabrami roznaha finansavaha statusu ton zadaje toj, čyj dachod nižejšy. Kali zabiaśpiečanaja žančyna padoryć pryjacielcy darahuju parfumieryju, to pastavić jaje ŭ niajomkaje stanovišča: toj daviadziecca albo «razarycca» na taki ž pa košcie zvarotny prezient, ci padnieści toje, što dazvalajuć srodki, ale adčuvać pry hetym svaju finansavuju niepłaciežazdolnaść.
• Razam z tym śpiecyjalisty pa etykiecie nie rajać abmieńvacca adnolkavymi padarunkami. Kali śviakrucha padaryła vam kavamołku, nie varta adkazvać joj tym ža praz hod.

Nie ihnarujcie prymiety

— U pieryjady niestabilnaści, niavyznačanaści, kataklizmaŭ, napružanaści ŭzrastaje siła prymiet, — padkreślivaje psichołah Taćciana Šaranda. — Tamu, kali chtości z vašych rodnych ci znajomych adroźnivajecca zababonnaściu, nie varta daryć im na Novy hod ručniki (ličycca, što heta da kanfliktaŭ, niaŭdač, prablem u siamji) ci pustyja kašalki (da biezhrašoŭja).

Drennaja «reputacyja» ŭ nasovak, byccam by jany — da śloz, a taksama ŭ nažoŭ, videlcaŭ, nažnic: ezateryki śćviardžajuć, što ŭ kolučych i režučych pradmietaŭ— admoŭnaja enierhija. Ja, naprykład, lublu śviečki — dekaratyŭnyja, aramatyčnyja, samych roznych formaŭ i koleraŭ. Ale čytała, što jany taksama ŭvachodziać u «čorny śpis»: nibyta daryć ich — da niezdaroŭja. Tamu na ŭsialaki vypadak praviercie reč na dobruju enierhietyku i «dobranadziejnaść».

Znajdzicie dla pakupak čas i adkładzicie hrošy

Umieńnie stvaryć śviata pry lubych dachodach, u lubych umovach — sapraŭdny talent. Ale chto budzie spračacca ź vidavočnym: hrošy i čas prykmietna ablahčajuć hetuju zadaču. Hrošy dazvalajuć nie skupicca i ŭvasablać mary blizkich i rodnych. Kali srodkaŭ dastatkova, čamu b nie paradavać baćkoŭ pucioŭkaj u sanatoryj, žonku — novym futram abo darahimi ŭpryhažeńniami, a dačku — ajfonam?

Ale kali vaša proźvišča nie Rakfieler i vy staranna płanujecie vydatki, to lepš zahadzia skłaści śpis, kamu i što vyrašyli padaryć, kab adšukać, kupić ci vyrabić samastojna niešta dastupnaje, ale pry hetym aryhinalnaje, ekskluziŭnaje, niezabyŭnaje. Inakš daviadziecca ŭ apošnija dni napiaredadni śviata lichamankava skuplać niepatrebnyja rečy.

Pierakanana: pošuk i nabyćcio padarunkaŭ mohuć usprymacca nie jak ciažar i pakutlivaja pavinnaść, a jak pryjemny i cudoŭny zaniatak. Pry takim padychodzie śviata dla vas pačniecca zadoŭha da boju kurantaŭ i nie zavieršycca adrazu paśla taho, jak vy padymiecie kielichi i zahadajecie zapavietnyja žadańni.

15

1

0

2

2

2

Nashaniva.com