Architekturnaja pierlina Kryčava, pałac Paciomkina-Hałynskich adznačaje 235 hadoŭ z času zakančeńnia budaŭnictva, jakoje ciahnułasia na praciahu 1778-1787 hadoŭ pa prajekcie Ivana Starova.
Doŭhi čas pomnik znachodziŭsia ŭ stanie kansiervacyi, adnak u druhoj pałovie 2000-ch pačałosia jaho adnaŭleńnie. Historyka-kulturnaja kaštoŭnaść była adrestaŭravana ŭ 2008 hodzie i tady ž u pomnik architektury pierajechaŭ miascovy muziej.
Słavutaść Kryčava pieravažna nazyvajuć pałacam Paciomkina, redka zhadvajučy proźvišča Hałynskich.
Na šyldzie, jakaja źmieščana na siońniašnim pałacy-muziei i paznačaje nazvu abjekta, adznačana tolki «Pałac Paciomkina». U toj čas jak histaryčna pravilna i spraviadliva architekturnuju słavutaść Kryčava nazyvać pałacam Paciomkina-Hałynskich.
Pieršapačatkova pałac z sadova-parkavym kompleksam byŭ pabudavany ŭ styli kłasicyzmu i byŭ rezidencyjaj Paciomkina na dałučanych ziemlach byłoj Rečy Paspalitaj. Adnak praź dziasiatak hod Paciomkin pradaŭ svaje ŭładańni miascovamu šlachciču Janu Hałynskamu. Takim čynam, z kanca XVIII stahodździa i pa 1917 hod pałac naležaŭ rodu Hałynskich.
Mienavita pry Hałynskich pomnik architektury zaznaŭ upłyŭ psieŭdahatyčnaha stylu. Vidavočna, što pałac — heta spadčyna horada, jakaja zastałasia jak ad rasijskaha kniazia Paciomkina, tak i ad miascovaha šlachieckaha roda Hałynskich, što prajaŭlajecca ŭ eklektyčnym styli histaryčnaha pomnika.
Balučaje pytańnie adnosna zachavanaści pałacavaha kompleksu —heta zrujnavanyja stajni, unikalnaja haspadarčaja pabudova kanca XVIII stahodździa. Padčas restaŭracyi pałaca stajni praktyčna źniščyli, pakinuŭšy tolki padmurki.
Navat paśla źniščeńnia isnavaŭ prajekt pa ich adbudovie i raźmiaščeńni tam koniej. Dla naviedvalnikaŭ muziejnaha kompleksu i asabliva zamiežnych turystaŭ stajni byli b razynkaj kulturnaj ustanovy, što pryciahnuła b niemałuju kolkaść padarožnikaŭ. Adnak prajekt tak i zastaŭsia na papiery, dobraja i kreatyŭnaja ideja nie była realizavanaja.
Fota: Mahiloŭ.media
Padmurki ad byłych stajniaŭ, jakija niepasrednym čynam adnosilisia da pałacava-parkavaha kompleksu, ciapier znachodziacca za žaleznym płotam muziejnaj terytoryi ŭ razburanym i zaniadbanym stanie.
