Pra mahčymaść takoha zacišša, u pryvatnaści, havaryłasia ŭ niadaŭniaj publikacyi telekampanii NBC News, u jakoj cytavalisia nienazvanyja supracoŭniki abaronnych viedamstvaŭ ZŠA i inšych krain Zachadu.
«Zapavolić vajenny nastup moža vosieńskaja i viasnovaja hraź — hetak ža, jak niaspraŭnaść abo niedachop zimovaj techniki, — piarečać ekśpierty ISW. — Niekatoryja vidy vajennaj techniki mohuć mieć patrebu ŭ adaptacyi da bolš chałodnaha nadvorja, i niedachop techniki abo bojeprypasaŭ sapraŭdy zdolny pryvieści da zapavoleńnia nastupu z-za łahistyčnych ciažkaściej — ale nie zimovaje nadvorje».
Pry hetym, na dumku aŭtaraŭ zvodki, «zima moža našmat bolš paškodzić drenna ekipijavanym rasijskim vojskam va Ukrainie, ale dobra zabiaśpiečanyja ŭkrainskija vajskoŭcy naŭrad ci spyniać kontrnastupleńnie praz prychod zimy». Naadvarot, źmiorzły hrunt moža spraścić pieramiaščeńnie ŭkrainskaj techniki — i rabić heta budzie praściej, čym va ŭmovach asieńnie-viasnovaha biezdarožža, ličyć ISW.
Na jaho dumku, kali bajavyja dziejańni i zacichnuć, to tolki z-za łahistyčnych ciažkaściej abo dasiahnieńnia punkta kulminacyi ŭ niekalkich kampanijach abodvuch bakoŭ. Ekśpierty ISW dadajuć, što rasijskija vojski na bolšaj častcy frontu pierajšli da abarony i ŭžo niekalki miesiacaŭ nie mohuć vieści maštabnyja nastupalnyja dziejańni ŭ Danieckaj, Łuhanskaj, Chiersonskaj i Zaparožskaj abłaściach.
Ab nastupleńni USU ŭ Chiersonskaj vobłaści ŭ zvodcy skazana, što ŭkrainskija vojski pakul vyzvalajuć rehijon biez razhromu armii RF, padobnamu tamu, što byŭ pad Charkavam, a rasijskija vajskoŭcy adstupajuć z pravaha bieraha Dniapra z «zachavańniem adnosna vysokaj bajazdolnaści».
Zrešty, aŭtary zvodki rychtavali jaje jašče da źjaŭleńnia paviedamleńniaŭ ab udarach pa rasijskich vojskach, jakija pierapraŭlajucca na levy bierah Dniapra. Pra ich ekśpierty ISW nie zhadvajuć, ale źviestak ab tym, što adbyvajecca ŭ noč na piatnicu niama i ŭ inšych aŭtarytetnych krynic.
ISW piša, što «rasijskaje adstupleńnie zojmie jašče niekatory čas, i pa ŭsioj Chiersonskaj vobłaści buduć praciahvacca bai». Aŭtary zvodki zaklučajuć, što «Ukraina vałodaje inicyjatyvaj i zabiaśpiečvaje sabie ŭ Chiersonie značnuju pieramohu». Tamu luboje spynieńnie ahniu, pa dumku ekśpiertaŭ, «daść Kramlu tak nieabchodny jamu čas dla adnaŭleńnia rasijskich sił».
