Anatol Sanacienka vyjšaŭ na volu 12 kastryčnika paśla 30 sutak u babrujskim izalatary časovaha ŭtrymańnia. Zatrymany jon byŭ 12 vieraśnia.
Siłaviki pryjšli da redaktara damoŭ, praviali pieratrus, zabrali techniku. Spadara Sanacienku abvinavacili ŭ raspaŭsiudzie ekstremisckich materyjałaŭ (č. 2 art. 19.11 KaAP RB) — u asabistaj pierapiscy znajšli dźvie spasyłki z sajtaŭ, jakija biełaruskija ŭłady pryznali ekstremisckimi. Za kožnuju z hetych spasyłak Anatol Sanacienka atrymaŭ pa 15 sutak aryštu. Druhi sud adbyŭsia 27 vieraśnia. Abiedźvie spravy razhladała sudździa suda Babrujskaha rajona i h. Babrujska Hanna Asipienka.
Pavodle krynicy blizkaj da siamji Sanacienki, spadara Anatola ŭsie 30 sutak trymali ŭ karcary. Tam było vielmi choładna, aciapleńnie ŭklučyli tolki pierad vyzvaleńniem. Davodziłasia spać na chałodnaj padłozie, i kali Anatol skardziŭsia na boli ŭ nyrkach, fielčar IČU tolki davaŭ jamu abiazbolvajučaje — u lakarniu zatrymanaha tak i nie pavieźli.
Za 30 sutak u IČU Anatol Sanacienka byŭ vymušany zapłacić dziaržavie 480 rubloŭ. Pieradačy dla jaho prymali, ale paśla vyzvaleńnia vyśvietliłasia, što rečy pieradavali nie ŭsie.
Sajt vydańnia «Bobrujskij kuŕjer» (babruysk.by) ciapier zabłakavany. Jon pierastaŭ adkryvacca jašče 19 vieraśnia. Jak patłumačyŭ Mininfarm, pryčyna błakavańnia sajta ŭ tym, što siarod publikacyj znajšli spasyłku na materyjał Pravaabarončaha centra «Viasna», jaki nibyta parušaje zakanadaŭstva ab srodkach masavaj infarmacyi. Materyjał hety byŭ apublikavany až u 2014 hodzie i datyčyŭ zajavy PC «Viasna» nakont aryštu viadomaj azierbajdžanskaj pravaabroncy Łejły Junus.
U adpaviednym zahadzie Mininfarma ad 16 vieraśnia havorycca:
«Na internet-resursie babruysk.by vyjaŭlenyja parušeńni zakanadaŭstva ab srodkach masavaj infarmacyi ŭ častcy raźmiaščeńnia infarmacyi, raspaŭsiud jakoj zabaronieny».
Što mienavita ŭ materyjale padpadaje pad kryteryi infarmacyi, raspaŭsiud jakoj zabaronieny, nie tłumačycca.
26 vieraśnia sud Babrujskaha rajona i h. Babrujska pryznaŭ materyjały sajta babruysk.by ekstremisckimi.
