Fota: skryn Tochka.by
Tochka.by — internet-partał, jaki pačaŭ pracavać na miedyjarynku ŭ mai hetaha hoda.
Usie pravy miedyja naležać ZAT «Kropka dydžytał hrup». Dyrektar — Ihar Ruban.
Jon skončyŭ Minskaje vyšejšaje inžyniernaje zienitna-rakietnaje vučylišča SPA, u 2014 hodzie Akademiju kiravańnia pry prezidencie (vyvučaŭ kiravańnie dziaržaŭnymi infarmacyjnymi resursami).
Ihar Ruban. Fota: linkedin.com
Z 1995-ha pa 1999-y pracavaŭ śpiecyjalnym karespandentam, žurnalistam-mižnarodnikam u infarmacyjnym ahienctvie BiełTA. Z 1999 pa 2002 hod byŭ pres-sakratarom u Biełaruskaj asacyjacyi mižnarodnych aŭtamabilnych pieravozčykaŭ.
Paśla da 2010 hoda zajmaŭ pasadu namieśnika dyrektara pa kamiercyjnych pytańniach u praduktovaj IT-kampanii Biełtransspadarožnik.
Z 2011 pa ciapierašni čas pracuje redaktaram «Vieśnika Biełnaftachima».
Hałoŭnym redaktaram vydańnia staŭ były pres-sakratar ahienctva Sputnik Biełaruś Pavieł Tuchto. Raniej jon byŭ kiraŭnikom pradstaŭnictva nacyjanalnaj dziaržaŭnaj teleradyjokampanii Biełarusi ŭ Maskvie.
«Naša hałoŭnaja zadača — zrabić biełaruski miedyjarynak mocnym, dapamahčy viarnuć jamu stračanyja za minułyja hady pazicyi», — vyznačaŭ misiju novaha miedyja redaktar u intervju marketing.by.
— Z sychodam i pierafarmatavańniem pracy šerahu bujnych hulcoŭ uzrovień jakasnaj žurnalistyki ŭ bajnecie prykmietna zvaliŭsia. Trafik źbirajuć prajekty, jakija całkam zaležać ad navinavych ahrehataraŭ, zatočanyja pad najprosty rerajt natatak biełaruskich i rasijskich ahienctvaŭ. Kvitnieje samaje sapraŭdnaje piractva pa pryncypie «ŭ internecie ŭziaŭ — u internet i addaŭ». A kolkaść redakcyj, jakija abapirajucca na svoj ułasny kantent, zusim nievialikaja — i heta sumna».
Jon udakładniaŭ, što nad prajektam pracuje kamanda prafiesijnych žurnalistaŭ, jakija pryjšli ŭ redakcyju ź dziaržaŭnych i niezaležnych ŚMI.
Z sajtaŭ z vakansijami viadoma, što na Tochka.by šukali redaktara, patrabavaŭsia dośvied pracy ad 3 hadoŭ, zarobak 2500 rubloŭ.
«Usich abjadnała žadańnie rabić jakasny i maksimalna nieanhažavany pradukt dla šyrokaj aŭdytoryi, — kazaŭ Tuchto. —
My ličym, što lubaja navina abo historyja pavinna być raskazana jak maha padrabiaźniej — z važnym dla jaje kantekstam i bekhraŭndam. Redakcyja piša pra palityku i ekanomiku, ale asnoŭnuju ŭvahu nadaje žyćciovym historyjam. Starajemsia šukać cikavyja temy i ŭ rehijonach — ich tam chapaje».
Pavieł Tuchto śćviardžaje, što za miesiac aŭdytoryja miedyja nabliziłasia da miljona naviedvalnikaŭ.
Na novym internet-partale niama navin pra palitviaźniaŭ, sudovyja pracesy i represii biełarusaŭ. Prablemnych, vostrych temaŭ redakcyja taksama nie ŭzdymaje. Raz za razam źjaŭlajecca infarmacyja, jakaja padajecca ŭ praŭładnym klučy, a Łukašenku žurnalisty partała nazyvajuć «kiraŭnikom dziaržavy» i «prezidentam».
Słova «vajna» ŭ dačynieńni da padziej va Ukrainie žurnalisty partała nie vykarystoŭvajuć, spasyłajucca na rasijskija infarmacyjnyja resursy.
Niekatoryja naviny i padzieja miedyja ŭvohule abychodzić bokam. Naprykład, nie piša pra zatrymańni žurnalistaŭ. Davaŭ navinu novy partał pra prysudžeńnie Nobieleŭskaj premii Alesiu Bialackamu, ale ź inšymi akcentami:
«Jon (Bialacki — NN.) znachodziŭsia ŭ źniavoleńni z 2011 pa 2014 hod. Nahodaj dla zatrymańnia Bialackaha tady stała ŭchileńnie ad vypłaty padatkaŭ, jon byŭ asudžany na siem hadoŭ. Pakarańnie adbyvaŭ u papraŭčaj kałonii ŭ Babrujsku. Na volu vyjšaŭ daterminova — u červieni 2014-ha. Paśla demanstracyj suprać biełaruskich uładaŭ u 2020-m jaho znoŭ zatrymali — 14 lutaha 2021-ha. Na pravaabarončy centr «Viasna» zaviedziena kryminalnaja sprava».
U horadzie partału navat dazvolili pastavić rekłamny baner. I adrazu da novaha miedyja źjaviłasia cikavaść u adnaho z łukašenkaŭskich telehram-kanałaŭ.
Pra što pišuć na Tochka.by? Žyćcio zorak, nadvorje, DTZ, turyzm, techniku i toje, jak pravieści ŭikiend.
Pakazalna, što partału čas ad času dajuć kamientary niekatoryja dziaržsłužačyja, što dla niezaležnych ŚMI ŭ apošnija dva hady stała niedastupnym.
Źviarnuli taksama ŭvahu na žurnalistaŭ, jakich nabrała ŭ štat redakcyja. Siarod ich, naprykład, jość były reparcior rasijskaha telebačańnia Dzianis Košaleŭ.
Čytajcie taksama:
Ci prydatny Telegram dla nasamreč biaśpiečnych kamunikacyj? Ekśpiert pa ličbavaj biaśpiecy tłumačyć, čamu jahony adkaz — nie
Kitaj ustupiŭ u technałahičnuju honku, pakazaŭšy svoj pieršy kvantavy kampjutar. Tłumačym, čamu heta važna
Šale, hłempinh i chatki na drevach. Top niezvyčajnaha žylla dla adpačynku ŭ Biełarusi
