Šmatkiłamietrovaja čarha z aŭtamabilaŭ na miažy Rasii z Hruzijaj
Prarasijskija administracyi samaabvieščanych «DNR» i «ŁNR», a taksama akupavanych terytoryj Zaparožskaj i Chiersonskaj abłaściej Ukrainy zrabili spravazdačy ab kančatkovych vynikach «refierendumaŭ ab dałučeńni da Rasii» i ŭžo źviarnulisia da Uładzimira Pucina z prośbaj ab «dałučeńni» hetych rehijonaŭ.
Pavodle rasijskaha zakanadaŭstva, dla hetaha praduhledžanaja nastupnaja pracedura:
- Rasija pavinna pryznać Chiersonskuju i Zaparožskuju vobłaści niezaležnymi dziaržavami (jak heta było zroblena z «DNR» i «ŁNR» pierad pačatkam poŭnamaštabnaj vajny);
- Pucin i kiraŭniki ŭsich terytoryj, «jakija dałučajucca», pavinny padpisać adpaviednyja damovy;
- teksty hetych dakumientaŭ pavinny prajści ekśpiertyzu Kanstytucyjnaha suda RF (na pradmiet adpaviednaści Kanstytucyi);
- paśla hetaha dałučeńnie pavinny ŭchvalić Dziaržduma i Saviet Fiederacyi;
- na apošnim etapie (svajo ž ułasnaje) rašeńnie ab anieksii ŭkrainskich terytoryj pavinien finalna zaćvierdzić Pucin.
Raniej ŚMI paviedamlali, što ŭsie hetyja pracedury projduć da 30 vieraśnia. Adnak śpikier Savieta Fiederacyi Valancina Matvijenka faktyčna abvierhła hetyja źviestki, zajaviŭšy, što sienatary nie buduć źbiracca na pazačarhovyja pasiadžeńni, a razhledziać dakumienty ab «dałučeńni» terytoryj na płanavaj siesii 4 kastryčnika.
Dziaržduma sapraŭdy rychtavałasia da śpiešnaha razhladu zakonaprajektaŭ ab anieksii, pra heta paviedamlali navat dziaržaŭnyja infarmahienctvy. Adnak paźniej śpikier Viačasłaŭ Vałodzin taksama abviaściŭ, što pasiadžeńni pa «dałučeńni» ŭkrainskich terytoryjaj projduć 3 i 4 kastryčnika.
Jak paviedamili krynicy «Mieduzy», u Kramli vyrašyli «nie pryśpiešvać padziei», kali «hetaha nie patrabujuć abstaviny». «Usio i tak budzie dałučana. Tolki bieź śpiechu», — tak farmulujuć jany taktyku ŭładaŭ. Pavodle ich śćviardžeńnia, z «dałučeńniem» ukrainskich terytoryj Maskva nie stała śpiašacca, bo «pijar-efiekt ad hetaha budzie amal nulavy» na fonie mabilizacyi.
Mabilizacyja ž i niezadavolenaść joj — ciapier niesumnienna hałoŭnaja prablema dla Kramla.
Pa słovach surazmoŭcaŭ «Mieduzy», blizkich da AP, pa zamovie Kramla ŭ Rasii ŭžo praviali na hetuju temu zakrytaje sacapytańnie; jaho vyniki uładam nie spadabalisia (dakładnych ličbaŭ krynicy nie nazvali).
«Skałanuła ŭsich [rasijan]», — pry hetym rastłumačyła adna z krynic. Razam z tym surazmoŭcy «Mieduzy», blizkija da Kramla, padkreślili, što ŭłady ŭsio jašče spadziavajucca źbić niezadavolenaść. U pryvatnaści, dla hetaha jany raźličvajuć vykarystoŭvać zvykłyja instrumienty — vystupleńni prapahandystaŭ.
Siarod inšych sposabaŭ razhladajucca publičnyja raźbiralnictvy ŭ spravach niezakonna pryzvanych hramadzian i viartańnie ich dadomu, a taksama pakarańnie vajenkamaŭ.
Niahledziačy na šmatlikija paviedamleńni ŚMI, Kreml, padobna, skarektavaŭ svaje płany nakont uviadzieńnia poŭnaj zabarony na vyjezd z Rasii mužčyn mabilizacyjnaha ŭzrostu. «Niedaacanili płyń [tych, chto vyjazdžaje]. Ciapier zakryć miežy vielmi składana, — kamientuje adzin z surazmoŭcaŭ «Mieduzy». — Na samych papularnych KPP čerhi.
Kali zakryć miažu, spatrebiacca tysiačy siłavikoŭ: rasčaravanyja ludzi mohuć raspačać sproby praryvu. A stolki lišnich siłavikoŭ ciapier niama».
Krynicy «Mieduzy», blizkija da administracyi prezidenta i ŭrada RF, ličać, što rasijskija ŭłady nie admaŭlajucca ad hetaj idei, ale pakul nie razhladajuć jaje jak «pracoŭny varyjant».
