Z 2019 hoda kłub razam z fota novych futbalistaŭ raźmiaščaje infarmacyju pra źnikłych bieź viestak pa ŭsim śviecie dziaciej. Akcyja praciahvajecca dahetul i daje realnyja vyniki, stanoviačysia ŭsio bolš maštabnaj, piša Sports.
Upieršyniu takija źviestki byli raźmieščanyja ŭ prezientacyi Leanarda Śpinaccoły. Pobač z fota navička raźmiaščałasia fatahrafija 5-hadovaj małoj Eleny Ramponi.
Zapuščanaja «Romaj» kampanija vielmi chutka dała pieršyja vyniki. Čaćviora źnikłych dziaciej byli paśpiachova znojdzienyja ŭžo praz paŭtara miesiaca paśla zapusku. Dzicia z Hrecyi było znojdzienaje dziakujučy tamu, što jaho paznali pa fota z prezientacyi Stefana El-Šaaravi.
«Usio dobra, dzicia znojdzienaje», — napisała «Roma» ŭ tvitary.
Kłub vykarystoŭvaje tarhietavańnie videa z prezientacyjami: tak, u roliku pra anhličanina Krysa Smolinha, jaki pryjšoŭ z «Mančester Junajted», i nabytaha ŭ łondanaskaha «Čełsi» Davide Dzapakoksty raźmiaščalisia fota źnikłych dziaciej mienavita z Brytanii. U abodvuch vypadkach jany byli znojdzienyja.
Paśla taho, jak dzieci znachodziacca, ich fota źnikaje — čamu?
Sučasnaść dyktuje vielmi žorstkija ŭmovy da ŭsiaho, što źviazana z asabistymi źviestkami ŭ internecie, asabliva kali havorka idzie pra niepaŭnaletnich.
Jak tolki dzicia znojdzienaje, nabyvaje moc tak zvanaje «prava na zabyćcio», jakoje patrabuje vydaleńnia ź sieciva ŭsich asabistych danych udzielnikaŭ historyi.
Heta robicca jašče i dla praduchileńnia ckavańnia ludziej.
Na žal, nie ŭsich dziaciej atrymoŭvajecca znajści.
Pry ŭsich pośpiechach kampanii naiŭna było b mierkavać, što jana daje 100-pracentny vynik. Tak, 10-hadovy Brajan Karyjuki, jakoha šukali ŭ Kienii, byŭ znojdzieny miortvym.
«My nievierahodna zasmučanyja», — napisała tady «Roma».
Inšy kiejs — 15-hadovy Li Baksieł prapaŭ u 15-hadovym uzroście 31 hod tamu. Jaho fota źjaviłasia naroŭni z astatnimi ŭ prezientacyi cełaha šerahu novych hulcoŭ «Romy» ŭ 2019 hodzie.
Baćka chłopčyka ŭžo źmiryŭsia z tym, što jaho syn nie vierniecca. Tym nie mienš jon ličyć, što akcyi, padobnyja da toj, što pravodzić «Roma», vielmi važnyja: «Ciažka apisać, ale heta prymušaje adčuvać siabie nie takimi samotnymi. Spadziajusia, što kali ŭžo nie moj syn, dyk inšyja dzieci viernucca dadomu».
U kancy leta-2022 skład «Romy» papoŭniŭ čarhovy navičok: zorny eks-forvard «Taryna», čempijon Jeŭropy Andrea Biełoci. Viadoma, jahonuju prezientacyju supravadžali fota dziaciej i telefony dla tych, chto niešta viedaje pra ich miescaznachodžańnie.
Ciapier kłub supracoŭničaje sa šmatlikimi dabračynnymi arhanizacyjami pa pošuku źnikłych bieź viestak pa ŭsim śviecie. Dzieci ź Vialikabrytanii, Italii, Hrecyi, Bielhii, Kienii i Polščy byli znojdzienyja paśla źjaŭleńnia ŭ kłubnych sacsietkach rolikaŭ, jakija anansavali tranśfiery.
