34-hadovy Illa sam z Barysava. Da suda jaho trymali ŭ žodzinskaj śledčaj turmie.
Pra pracu jon raskazvaŭ niašmat. Zhadvaŭ tolki, što słužyŭ, a apošnim časam, havaryŭ, pracavaŭ dalnabojščykam. Kazaŭ, što syšoŭ ź siłavoj sistemy, bo ličyŭ jaje «marazmatyčnaj».
«U kamiery jon zajmaŭsia sportam, šmat čytaŭ — na Žodzinie nie było mahčymaści vybirać knihi, što pryvozili, toje i čytaŭ. My ŭvieś čas hulali ź im u intelektualnyja hulni, u słovy. I jon amal zaŭsiody vyjhravaŭ. Jon pakinuŭ uražańnie erudziravanaha čałavieka, ź im cikava było vieści dyjałoh na mnohija temy — armija, palityka», — zhadvaje adzin z sukamiernikaŭ.
Pry vobšuku ŭ Illi znajšli doma paru patronaŭ (jon kazaŭ, što zastalisia paśla palavańnia). Praz hetuju znachodku jamu dadali kryminalny artykuł.
Što dziŭna, dla byłoha supracoŭnika orhanaŭ mužčyna byŭ vielmi havarki.
«U turmie naohuł lepš jazyk za zubami trymać. Illa časam dastatkova naiŭnym padavaŭsia, takaja viaskovaja prostaść u im była. Trochi dziŭna», — dzielicca sukamiernik.
Mužčyna vielmi pieražyvaŭ za žonku ź dziećmi, što jana adna ź imi zastaniecca. Svoj učynak z padpałam «BiełToł» jon tłumačyŭ pratestam suprać biazładździa ŭ krainie.
«Jon razumieŭ, što jamu nie mienš za 10 hadoŭ daduć».
KDB unios Trubina ŭ śpis asobaŭ, «datyčnych da terarystyčnaj dziejnaści». Sud nad mužčynam prachodziŭ u zakrytym režymie. Jaho abvinavacili pa niekalkich artykułach:
- č. 1 art. 289 — akt teraryzmu;
- č. 2 art. 289 — akt teraryzmu, ździejśnieny paŭtorna;
- č. 2 art. 295 — niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ;
- č. 1 art. 295-3 — niezakonnyja dziejańni ŭ dačynieńni da pradmietaŭ, dziejańnie jakich zasnavana na vykarystańnie haručych rečyvaŭ.
Spravu razhladaŭ sudździa Dźmitryj Kryvieła.
Pra zatrymańnie Trubina stała viadoma letaś u žniŭni. Naniesienaja im škoda papiarednie skłała 450 tysiač rubloŭ, paviedamlaŭ SK.
