«Vidavočna, što fizičnaja cełasnaść elektrastancyi była parušanaja niekalki razoŭ. Tak nie moža praciahvacca», — cytuje słovy Hrosi «Bi-bi-si».
Pavodle Hrosi, jamu ŭdałosia abyści ŭsiu Zaparožskuju AES i ŭbačyć klučavyja častki stancyi. U pryvatnaści, avaryjnyja sistemy i dyśpietčarskija. Ciapier jaho kamanda, jakaja zastałasia na AES, budzie analizavać techničnyja aśpiekty.
«My nikudy nie adychodzim. MAHATE ciapier tam, na elektrastancyi, i inśpiektary nie sychodziać — jany zastanucca tam», — padkreśliŭ Hrosi.
Jon taksama adznačyŭ, što śpiecyjalisty ahienctva daduć biesstarońniuju, niejtralnuju i technična abhruntavanuju acenku taho, što adbyvajecca na Zaparožskaj AES.
Akramia taho, Hrosi raspavioŭ pra abstreły ŭ rajonie Zaparožskaj AES, jakija jamu ŭdałosia asabista ŭbačyć.
«Byli momanty, kali było vidavočna, što stralajuć: kulamiotny ahoń, minamioty. Dva-try razy było sapraŭdy vielmi tryvožna, ja b skazaŭ, dla ŭsich nas», — skazaŭ jon.
Rasija i Ukraina abvinavačvajuć adno adnaho ŭ abstrełach stancyi i horada Enierhadara. Ahoń nie spyniaŭsia navat u dzień pryjezdu misii MAHATE, z-za čaho ekśpiertam daviałosia zatrymacca na try hadziny.
Rasijskija vojski zachapili Zaparožskuju AES nieŭzabavie paśla pačatku ŭvarvańnia va Ukrainu, u sakaviku 2022 hoda. Z taho času Kijeŭ i Maskva nieadnarazova abvinavačvali adno adnaho ŭ abstrełach terytoryi pobač z AES. Na pačatku žniŭnia ŭ MAHATE kazali, što na Zaparožskaj AES masava parušajuć pratakoły biaśpieki.
