Pusk rakiet z rasijskaha Biełharada pa ŭkrainskim Charkavie, 1 vieraśnia. AP Photo Vadim Belikov
Miarkujučy pa paviedamleńniach dvuch bakoŭ i miascovych čatach, rasijskim vojskam nie ŭdałosia viarnuć sabie pazicyi, zaniatyja ŭkraincami ŭ vyniku kontrnastupu 29—31 žniŭnia.
«Ukrainskija vajskoŭcy zamacoŭvajucca na terytoryjach padčas nastupu na poŭdni i praciahvajuć źniščać voraha», — paviedamiła načalnica Abjadnanaha kaardynacyjnaha pres-centra Sił abarony poŭdnia Ukrainy Natalla Humianiuk u čaćvier.
«Na čaćviortyja sutki nastup VSU na Chierson zamarudziŭsia», — paviedamiŭ rasijski šavinistyčny telehram-kanał «Rybaŕ», jaki maje šmatlikija krynicy ŭ armii i dazvalaje sabie pisać bolš, čym aficyjnyja ŚMI. Heta, faktyčna, paćviardžaje, što ŭkraincy praciahvali prasoŭvacca.
Pa infarmacyi «Rybaria» i inšaha šavinistyčnaha błohiera, Ihara Strałkova (Hirkina), kala Andrejeŭki i Łazavoha ŭkrainskaja armija ŭtrymała płacdarm na levym bierazie raki Inhulec.
Karta frontu kala Suchoha Staŭka pa stanie paśla abiedu 1 vieraśnia, zhodna z «Rybariem»
U toj ža čas, pad Kryvym Roham praciahvajucca bai za viosku Archanhielskaje.
«Praciahvajecca sproba ŭkrainskaha nastupu na Mikałajeva-Kryvarožskim i inšych kirunkach, praciŭnik niasie značnyja straty, hetaja akcyja spłanavanaja ofisam Zialenskaha tolki, kab stvaryć u zachodnich kurataraŭ iluziju zdolnaści ŭkrainskich vajskoŭcaŭ vieści nastup», — zajaviŭ 2 vieraśnia ministr abarony Rasii Siarhiej Šajhu.
Pad Charkavam ukrainskija vojski sprabavali prasunucca ŭ rajonie Ruskaj Łazavoj. «Rasijskija vojski sarvali pačatak nastupleńnia ŭkrainskich farmavańniaŭ, jakija vyjšli na rubiažy razhortvańnia ŭ rajonie Ruskaj Łazavoj», — paviedamili rasijskija krynicy.
Linija frontu ŭ Danbasie zastajecca praktyčna niaźmiennaj, choć Strałkoŭ paviedamiŭ ab prasoŭvańni rasijan na niekalki socień mietraŭ u rajonie Piaskoŭ, a Rybar — pra viartańnie ŭkraincami kantrolu nad častkaj pasielišča ŭ rajonie pasiołka Ńju-Ërk u Danieckaj vobłaści.
Chod i vyniki boju pad Enierhadaram unačy z 31 žniŭnia na 1 vieraśnia zastajucca niajasnymi.
Maskva zajaviła pra vysadku ŭkrainskaha desantu ŭ kolkaści 60 čałaviek i jaho razhrom z dapamohaj avijacyi. Fakt boju paćvierdzili ŭ miascovych čatach i zakonny mer Enierhadara. Ale rasijski bok nie prademanstravaŭ ni fota zabitych, ni pałonnych, tolki vyjavu baržy — na płyvu, ale z praboinaj u borcie. Heta moža śviedčyć, što ŭkrainskaj dyviersijnaj hrupie ŭdałosia adyści.
Rasijskaja prapahanda ŭ hetyja dni kancentrujecca na apisańni taho, jakija vialikija straty panios ukrainski bok padčas kontrnastupu pad Chiersonam i vyłazki kala Enierhadara.
«U hetym vypadku «raźlik na durnia» kaštavaŭ partnioram 60 elitnych zombi, jakija, napeŭna, nahłytalisia «śmiełych jeŭrapiejskich tabletak» pierad apieracyjaj», — piša Strałkoŭ.
«Dumaju, što dziakujučy hrandyjoznamu kontrnastupu ŭkraincaŭ na poŭdni, my zdolejem adyhracca za pravały samaha pačatku SVA. VSU zanadta pavieryli ŭ siłu «Chajmarsaŭ», HUR daŭ aptymistyčny prahnoz nakont sił i maralna-psichałahičnaha stanu VS RF, — piša prapahandyscki kanał «Staršie Eddy». — Ciapier mnostva trupaŭ, što vyściłajuć step, stanuć dobrym napaminam pra toje, pra što kazaŭ Kłaŭzevic: «Vajennaja sprava prostaja i całkam dastupnaja čałavieku ŭ zdarovym rozumie. Ale vajavać składana», — piša prapahandyst.
Raniej rasijskija prapahandysty pravałaŭ pačatkovaha etapu nie pryznavali.
Ministerstva abarony Rasii pryvodzić fantastyčnyja ličby ŭ «1700 zabitych» vajskoŭcaŭ praciŭnika pad Chiersonam i sotni adzinak źniščanaj techniki. Pry hetym vyjavy padbitaj ukrainskaj braniatechniki adzinkavyja.
Čytajcie taksama: Na sustrečy z Łukašenkam kadet śmieła vystupiŭ pa-biełarusku i zaklikaŭ hanarycca biełaruskim
