U pieršuju čarhu admysłova stvoranaja hrupa ciapier vyvučaje ekanamičnuju metazhodnaść budaŭnictva dadatkovych enierhabłokaŭ.
«Ale heta bolš addalenaja pierśpiektyva. Na dadzienym etapie vielmi važna zaviaršyć paśpiachova toj prajekt, jaki praduhledžany dziejnym kantraktam. Za im uvažliva nazirajuć i susiedzi, i suśvietnaja jadravaja supolnaść», — skazaŭ Hałoŭčanka.
Jon raskazaŭ, što budaŭnictva druhoha enierhabłoku BiełAES vyjšła na finalnuju stadyju i što važna svoječasova skončyć jaho, bo «ŭ ciapierašnich realijach hety prajekt atrymaŭ asablivuju aktualnaść» i jaho chutčejšaja realizacyja «krajnie važnaja dla enierhietyčnaj i ekanamičnaj biaśpieki Biełarusi».
Raniej namieśnik ministra enierhietyki Michaił Michadziuk kazaŭ, što zapusk druhoha enierhabłoku BiełAES płanujecca ŭžo sioleta.
Jašče zbudujuć schovišča dla adpracavanaha paliva, zakančvajecca praca nad mižuradavym pahadnieńniem dla pieravozu jadravych materyjałaŭ.
Hałoŭčanka dadaŭ, što Biełaruś i Rasija ciapier unifikujuć zakanadaŭstva ŭ halinie jadziernaj enierhietyki.
22 žniŭnia Ministerstva enierhietyki abjaviła ab zaviaršeńni ramontu pieršaha enierhabłoka BiełAES. Jaho spynili 25 krasavika i płanavali ŭklučyć u sietku ŭ lipieni. Adnak ramont ciahnuŭsia na 39 dzion daŭžej.
