Jeŭropa i śviet sutyknulisia z enierhietyčnym kryzisam. Kab zastrašyć jeŭrapiejskija krainy i prymusić ich admovicca ad padtrymki Ukrainy, Rasija abmiežavała pastaŭki hazu. Heta, u dadatak da nastupstvaŭ pandemii i niespryjalnaha nadvorja ŭ Jeŭropie — pierasochli reki, što źmienšyła vytvorčaść elektryčnaści na hidraelektrastancyjach, pryviało da rostu cen. Ceny na elektryčnaść bjuć rekordy. Jeŭrapiejskija krainy vymušany ŭvodzić u dziejańnie płany ekanomii.
Ale prapahanda pierabolšvaje maštab prablem «harotnych jeŭrapiejcaŭ». Kali pasłuchać łukašenkaŭskija kanały, moža skłaścisia ŭražańnie, što ŭ Jeŭropie ludziam ledź jeści niama čaho, a zamiest tualetnaj papiery jany ŭ chutkim časie buduć vykarystoŭvać liście.
Naprykład, u efiry pieradačy «Hałoŭny efir» prapahandysty pužajuć biełarusaŭ:
«Ciapier niemcam daviadziecca pracavać u ofisach pry tempieratury 19 hradusaŭ», — kaža zakadravy hołas, demanstrujučy taki videašerah.
Mienavita tak, pa viersii dziaržaŭnaj prapahandy, vyhladaje praca ŭ niamieckim ofisie pry +19 hradusach.
Pakul supracoŭniki dziaržaŭnych ŚMI kłapociacca pra harotnych niamieckich ofisnych rabotnikaŭ, prapahandysty amal ničoha nie kažuć pra kiepskija ŭmovy pracy rabotnikaŭ mnohich biełaruskich dziaržpradpryjemstvaŭ, jakija pracujuć zimoj u ledzianych cechach. Jany b tempieratury +19 na pracoŭnym miescy tolki b pazajzdrościli.
Voś što pra situacyju na minskim «Motavieła» ŭ 2021 hodzie ścipła pisała BiełTA:
«Kali, ahladajučy terytoryju, my ŭ supravadžeńni dyrektara zajšli ŭ vielizarnaje składskoje pamiaškańnie, dzie sartujuć i zachoŭvajuć kamplektujučyja dla pradukcyi, to mižvoli skurčylisia: ziabka, tempieratura nizkavataja dla kamfortnaj. A ludzi tut pracujuć, i ŭ asnoŭnym heta žančyny», — pisała BiełTA.
«Tak, atmaśfiera tut takaja… badzioryć, — žartavaŭ na heta ŭ adkaz kiraŭnik zavoda Mikałaj Ładućka. — Ale my poŭnyja entuzijazmu, a našy žančyny — heta bryljanty!»
Zrešty, u jakich umovach pracujuć rabotniki «Motavieła» i inšych biełaruskich zavodaŭ, možna pabačyć pa aficyjnych fotazdymkach ź vizitaŭ tudy Łukašenki.
Łukašenka, jaki, jak viadoma, nie vielmi dobra pieranosić ciepłyniu, chodzić pa zavodach u zimovaj vopratcy, z čaho možna zrabić vysnovu pra toje, jakaja tam tempieratura.
Ale tempieraturnamu režymu na biełaruskich zavodach BT nie pryśviačaje takich vialikich siužetaŭ, jak pra niaščasnuju Niamieččynu.
Łukašenkaŭcy ŭvieś čas raskazvajuć pra viejernyja adklučeńni elektraenierhii ŭ jeŭrapiejskich krainach, byccam heta niejkaja masavaja źjava, chacia heta zusim nie tak.
Taksama betešniki na poŭnym surjozie biadujuć, što italjancaŭ ułady paprasili adklučyć padahreŭ vady ŭ asabistych basiejnach i myć hałavu ŭ cyrulni nie dva razy, a ŭsiaho tolki adzin. Jakija aktualnyja i zrazumiełyja biełarusam prablemy!
Jašče adzin chitryk prapahandystaŭ — jany paviedamlajuć rekordnyja pikavyja ceny na elektryčnaść u Jeŭropie, ale nie nazyvajuć siarednija ceny (jakija našmat nižejšyja). Nahadajem, ceny na elektraenierhiju ŭ Jeŭropie rynkavyja, jany vyznačajucca na biržy i mianiajucca kožnuju hadzinu, u zaležnaści ad popytu i prapanovy.
Nastupnaja tema, jakoj prapahanda pužaje biełarusaŭ — što Jeŭropie, nibyta, pahražaje hoład. Śćviardžajecca, što zamiest miasa ŭłady prapanujuć jeŭrapiejcam jeści čarviakoŭ.
«Uvohule, mienš miasa, i pabolš čarviakoŭ, cvyrkunoŭ i inšaj antykryzisnaj hastranomii», — kpiać prapahandysty.
Viadoma, u Jeŭropie niama nijakich prablem ź miasam i dostupam da jakasnaj ježy. Bolš za toje, miasa ŭ Polščy i Litvie kaštuje mienš, čym u Biełarusi. Nichto nie prymušaje pierachodzić jeŭrapiejcaŭ ź jałavičyny na cvyrkunoŭ.
Havorka pra nasiakomych idzie vyklučna jak pra dadatkovuju opcyju, bolš spryjalnuju dla ekałohii, jakaja moža dapamahčy ŭ baraćbie z suśvietnym hoładam.
Voś u Kitai (jaki łukašenkaŭskija prapahandysty ŭvieś čas staviać u prykład zachadu) miascovyja tysiačahodździami praciahvajuć jeści cvyrkunoŭ. I nie tamu, što kitajcy nie mohuć dazvolić sabie kupić miasa.
Taksama BT raspaŭsiudžvaje absurdnuju infarmacyju ab tym, što ŭ Vialikabrytanii nibyta vynajšli šmatrazovuju tualetnuju papieru jak sposab ekanomii «na fonie antyrasijskich sankcyj».
«Ułady doŭha nie dumali, a chutka prapanavali alternatyvu — šmatrazovuju tualetnuju papieru. Kuplaješ rułon i ścirać jaho niekalki raz u tydzień», — śmiajucca prapahandysty.
Ale heta čarhovaja manipulacyja. Šmatrazovaja tualetnaja papiera jak alternatyva zvyčajnaj była vynajdziena jašče niekalki hadoŭ i nie maje nijakaha dačynieńnia ni da «antyrasijskich sankcyj», ni da brytanskich uładaŭ. Heta nišavy pradukt dla eka-aktyvistaŭ, ułady nikoli nikomu jaho nie prapanoŭvali. Dy i pradukt hety nikoli nie byŭ papularny siarod brytancaŭ.
Nu i ŭžo tradycyjna prapahanda vydaje svaje žadańni za realnaść, śćviardžajučy, što jeŭrapiejcy turbujucca tolki pra svaje kašalki, a tema dapamohi Ukrainie nibyta adychodzić na druhi płan.
«Imknieńnie źviazać ŭzbrojeny kryzis va Ukrainie z vyklučna ekanamičnym u Jeŭropie — užo niepieraadolny trend u Brusieli. Achviary, kroŭ, pakuty ukraincaŭ ciapier na druhim płanie. Minimum», — raskazvajuć u efiry. Jany vydajuć svaje žadańni za realnaść.
