Ciaham dasudovaha rasśledavańnia biełarusu źmianili kvalifikacyju złačynstva. Aproč taho, jon pajšoŭ na damovu sa śledstvam, dziakujučy čamu atrymaŭ bolš miakkaje pakarańnie — piać miesiacaŭ aryštu.
19 žniŭnia hramadzianin Biełarusi vyjdzie na volu, pakolki jamu zaličyli znachodžańnie pad vartaj paśla zatrymańnia ŭ adbyćcio pryznačanaha pakarańnia.
Novyja detali spravy
U pryhavory adznačajecca, što hramadzianin Biełarusi ŭ pieršy dzień rasijskaha ŭvarvańnia na terytoryju Ukrainy pieradaŭ supracoŭniku Kamiteta dziaržaŭnaj biaśpieki Biełarusi infarmacyju ab pieramiaščeńni kałony vajskovaj techniki bataljonnaj taktyčnaj hrupy Uzbrojenych sił Ukrainy ŭ horadzie Šack Vałynskaj vobłaści.
Pavodle suda, hetuju infarmacyju «ŭ peŭnych abstavinach moh vykarystać praciŭnik, kab pieraškodzić dziejnaści Ŭzbrojenych sił Ukrainy i inšych sił abarony i nanieści škodu nacyjanalnym intaresam Ukrainy».
Proźvišča supracoŭnika KDB Biełarusi viadoma sudu i śledstvu, adnak u sudovym rašeńni jano zakadavanaje jak «ASOBA_4».
U pryhavory taksama adznačajecca, što biełarus pahadziŭsia na supracoŭnictva sa śpiecsłužbami Biełarusi, pakolki mieŭ siarod ich pradstaŭnikoŭ znajomych, jakija padtrymlivajuć «idei vajskova-palityčnaha kiraŭnictva Biełarusi i Rasii ab palityčnaj, ideałahičnaj nieciarpimaści i nianaviści da ŭkrainskaj nacyi i dziaržaŭnaści» i ŭčyniajuć naŭmysnyja dziejańni pa zachopie častki terytoryi Ukrainy.
22 lipienia hramadzianin Biełarusi padpisaŭ damovu ab pryznańni svajoj vinavataści i faktaŭ, sabranych śledstvam.
Što viadoma pra asudžanaha biełarusa
Zatrymany biełarus pražyvaje va Ukrainie z 2006 hoda na padstavie vidu na stałaje žycharstva. Maje va Ukrainie siamju i niepaŭnaletniaje dzicia. Da zatrymańnia pracavaŭ handlovym śpiecyjalistam adnoj z bresckich kampanij u Vałynskaj vobłaści. Maje vyšejšuju adukacyju. Naradziŭsia ŭ Małaryckim rajonie Bresckaj vobłaści.
Raniej advakat zatrymanaha biełarusa raskazvaŭ «Svabodzie», što jaho padabaronnaha zatrymali tady, kali toj źviarnuŭsia ŭ SBU z paviedamleńniem ab namiery śpiecsłužbaŭ Biełarusi jaho zavierbavać. «Jaho zatrymali i abvinavacili ŭ špijanažy. SBU, zamiest taho, kab vykarystać jaho jak mahčymaha patencyjnaha ahienta ŭ intaresach Ukrainy, pastaviła sabie «ptušačku» i zaviała kryminalnuju spravu», — skazaŭ advakat.
