Juryj Vaskrasienski z žonkaj. Fota: sacsietki
Dakumient braniravańnia z servisu Booking.com Juryj Vaskrasienski pierasłaŭ u svoj telehram-kanał, chutka vydaliŭ, ale «Naša Niva» paśpieła zachavać.
Numar u hateli zarehistravany na žonku Juryja Alesiu. Heta piacizorkavy hatel Queen's Court Hotel & Residence ŭ Budapiešcie, u samym sercy horada i piešaj dastupnaści ad turystyčnaha centra.
Skrynšot braniravańnia
Ceny tam «startujuć» ad 120 dalaraŭ za numar na sutki, ale na traich žycharoŭ vyjšła pa 77 dalaraŭ na kožnaha za pražyvańnie ŭ «palepšanym luksie». Voś jak vyhladaje sam hatel:
Usie foty: queenscourthotelbudapest.com
Numar «Palepšany luks» znutry
Restaran hatela
Trenažornaja zała i spa-centr
Vaskrasienski adkazaŭ «Našaj Nivie», što «nie moža davać kamientaroŭ vydańniam, pryznanym ekstremisckimi». Ale svaim znajomym jon raskazvaŭ, što pabačyć Budapiešt było maraj žonki, jana tam raniej nie była. U turystyčnuju pajezdku jana jedzie na aŭto z synam i jaho dziaŭčynaj, jakija ŭdvaich vučacca na miedykaŭ.
«Synu ŭ žniŭni spaŭniajecca 20 hadoŭ, jon naradziŭsia ŭ adzin dzień i adzin zadyjakalny hod z Alaksandram Łukašenkam — 30 žniŭnia, i hety vizit — adnačasova baćkoŭski padarunak», — apisvaŭ Vaskrasienski znajomym.
Sam jon zastajecca doma — «u tym liku i ź mierkavańniaŭ biaśpieki». Vychodnyja pravodzić na leciščy, palivaje aharod i šmat chodzić pieški.
Pra canu hatela znajomym adkazvaŭ tak: «možam sabie dazvolić».
«U «Bukinhu» ŭ nas kala 100 braniravańniaŭ i maksimalnaja źnižka, u asnoŭnym vybirajem 5-zorkavyja hateli, bo možam sabie heta dazvolić. Ja z 2001 hoda pracavaŭ u aptovym handli, a z 2011 hoda — u svaim biznesie», — tłumačyŭ im Vaskrasienski.
U 2020—2022 hadach jon vykonvaŭ funkcyi psieŭdaapazicyjaniera, jakomu davali słova dziaržaŭnyja ŚMI.
