Murał vyšynioj u dzieviać pavierchaŭ pačali stvarać 12 žniŭnia ŭ miežach prajekta «Tradycyi dziela budučyni». Jaho malujuć na domie pa adrasie bulvar Leninskaha Kamsamoła, 29 — tam, dzie na pieršym paviersie znachodzicca restaran «Załatoje ciala». Zaviaršyć pracu płanujuć maksimum za 15 dzion, raspavioŭ Hrodna. life kuratar prajekta Aleh Łaryčaŭ.
Ścianu dla razmaloŭki pačali šukać u traŭni 2022 hoda. «Šukali dosyć doŭha. Hrodziency prapanavali šmat varyjantaŭ. Daviałosia abjechać bolšaść ź ich užyvuju. Spadabaŭsia toj dom, na jakim i robicca murał. Ale ŭ horadzie šmat ścien, jakija pasujuć dla murałaŭ. Dziŭna, što nichto za ich nie biarecca», — raspavioŭ Aleh Łaryčaŭ.
Eskiz atrymaŭsia ekśpierymientalny, ale źviazany z horadam
Murał stvarajuć mastaki ź Pinska Jaŭhien Sasiura i Siarhiej Rysakoŭ. Ale ŭ raspracoŭcy idei i eskiza prymali ŭdzieł i inšyja siabry Urban Myths.
«Šmat z kim kansultavalisia. Eskiz atrymaŭsia dosyć ekśpierymientalny dla Biełarusi. Cikava budzie pahladzieć na reakcyju haradžan i mižnarodnaj stryt-art-supolnaści», — skazaŭ Aleh Łaryčaŭ.
Mastaki aryjentavalisia na toje, kab vyjava była źviazanaja z horadam. «Takija histaryčnyja mietki. Kałožskaja carkva, staražytnyja maniety, jakija tut znachodzili. Usio heta ŭ burštynie. I viełasipiedyst, jaki trymaje heta ŭ ruce i jedzie napierad», — skazali mastaki Jaŭhien Sasiura i Siarhiej Rysakoŭ.
Kolki farby treba na taki murał?
Na stvareńnie murała pojdzie kala 200 litraŭ farby. Pa słovach Łaryčava, z materyjałami jany pravodziać ekśpierymient. «Rośpis robicca farbaj biełaruskaj marki Tintoll. Vytvorca sam prapanavaŭ dałučycca da prajekta «Tradycyi dziela budučyni». Pakul uražańni dobryja».
Murał stvarajuć u miežach prajekta Urban Myths «Tradycyi dziela budučyni». Hety prajekt pryśviečany 100-hodździu «Biełarusbanka». «Pakul zapłanavana 10 murałaŭ u 10 haradach. U Hrodnie — šosty ŭžo», — patłumačyŭ Łaryčaŭ. Taksama ŭžo stvorany murał u Lidzie, ale aficyjnaha adkryćcia jašče nie było.
Jakija prajekty ŭžo rabili ŭ Hrodnie
Supolnaść Urban Myths, jakaja prasoŭvaje ŭ Biełarusi stryt-art, isnuje z 2011 hoda. Da 2015 hoda jana nazyvałasia Signal. Za ŭvieś čas z prajektam pracavaŭ 31 mastak. Jany malavali svaje tvory ŭ Minsku, Rahačovie, Mazyry, Pinsku, a taksama inšych haradach, u tym liku ŭ Hrodnie.
Samy bujny stryt-art-abjekt u Hrodnie — taksama ich praca. Heta tvor «Pa maru», jaki ŭ 2014 hodzie namalavaŭ toj ža mastak, što ciapier maluje novy murał, Jaŭhien Sasiura (Mutus) na dzieviacipaviarchoviku na Biełych Rosach.
Akramia hetaha, u Hrodnie malavali i mienšyja pa pamierach tvory ŭ miežach akcyi «Must Act — Must Art» u 2014 hodzie. Adzin ź ich — «Krumkač» (Aleś Kontra, 2014). Jaho zafarbavali ŭ 2018 hodzie kamunalnyja słužby Hrodna.
