U paviedamleńni kampanii havorycca, što film adlustroŭvaje sastarełyja źviestki i budzie pierapracavany.
U filmie pryvodzilisia słovy kiraŭnika adnaho z pryvatnych fondaŭ dapamohi Ukrainie. Toj zajaviŭ, što tolki 30-40% pastavak, jakija iduć praz ukrainskuju miažu, dasiahajuć kančatkovaha atrymalnika.
Jon kazaŭ pra dośvied svajho fondu na momant zapisu intervju ŭ krasaviku. Ale z kantekstu filma składajecca adčuvańnie, što havorka idzie ab uzbrajeńniach krain NATA, jakija vydzialajucca na dziaržaŭnym uzroŭni prosta ciapier.
Siarod inšych śpikieraŭ u filmie — ekśpiertka Amnesty International, jakaja pracavała nad dakładam, jaki abvinavaciŭ USU ŭ niebiaśpiečnych dla mirnych žycharoŭ mietadach viadzieńnia vajny.
Hety dakład vyklikaŭ škvał krytyki z Kijeva i ad ekśpiertaŭ pa mižnarodnym pravie, jakija ŭbačyli ŭ im niapravilnaje tłumačeńnie zakonaŭ vajny i «chłuślivy bałans» — sprobu paraŭnać dziejańni akupanckaj rasijskaj armii i ŭkrainskaj, jakaja abaraniajecca.
«Vy ŭviali ŭ zman vielizarnuju aŭdytoryju, raspaŭsiudžvajučy niepaćvierdžanyja zajavy i rujnujučy davier da pastavak žyćciova važnaj vajskovaj dapamohi krainie, jakaja supraciŭlajecca ahresii i hienacydu», — tak prakamientavaŭ film CBS kiraŭnik MZS Ukrainy Dźmitryj Kuleba.
