Kiroŭca ciahača Jury Kuźmič svaju vinu pryznaŭ, adnak ličyć vinavatym i kiraŭnictva čaści.
Prysud pa hučnaj kryminalnaj spravie sudździa Bresckaha mižharnizonnaha vajennaha suda ahučyŭ 15 vieraśnia.
Sałdat terminovaj słužby Jury Kuźmič pryznany vinavatym u ździajśnieńni złačynstva, praduhledžanaha č. 2 art. 464 «Parušeńnie pravił kiravańnia albo ekspłuatacyi bajavoj, śpiecyjalnaj ci transpartnaj mašyny, jakoje paciahnuła pa nieaściarožnaści śmierć čałavieka, albo pryčynieńnie ciažkaha cialesnaha paškodžańnia» KK RB i asudžany da 4 hadoŭ pazbaŭleńnia voli z adterminoŭkaj na 2 hady.
Kiroŭca ciahača Jury Kuźmič svaju vinu pryznaŭ, adnak ličyć, što vinavacić za zdareńnie treba nie tolki jaho, ale i kiraŭnictva čaści, jakoje nie zdoleła naležnym čynam zabiaśpiečyć biaśpiečny ruch vajskovaj techniki pa ažyŭlenaj darozie.
Na sudovym pasiedžańni jon raspavioŭ, što ŭ dzień, kali kałona vajskovaj techniki viartałasia z palihonu, było vielmi horača i pylna. Šlejf pyłu ad mašyny, što išła napieradzie, byŭ nastolki hustym, što jon praktyčna ničoha nie bačyŭ pierad saboj i aryjentavaŭsia tolki pa śladach ad trakaŭ i pa habarytnych ahniach lidera kałony MTŁBu.
– Kali my tolki vyjazdžali z palihonu, ja skazaŭ staršamu mašyny, što z-za pyłu praktyčna ničoha nie baču, – raspavioŭ sałdat, – ale toj tolki pacisnuŭ plačyma, maŭlaŭ, ničoha nie zrobiš, treba jechać. Kali my ŭžo byli na lasnoj darozie, nasustrač našaj kałonie prajechała niejkaja mašyna, padniaŭšy jašče bolšy słup pyłu, tak što ja naohuł pierastaŭ aryjentavacca. Ja adrazu ž staŭ skidać chutkaść, ale litaralna praz paru siekund adčuŭ udar.
Sałdat skazaŭ taksama, što kali b u jahonym ciahačy pracavała radyjostancyja (jana jakraz napiaredadni vyjšła sa stroju, tak što suviaź pamiž kiroŭcami ažyćciaŭlałasia, pavodle jahonych słoŭ, tolki z dapamohaj žestaŭ), to, mahčyma, jaho mahli b papiaredzić pra niebiaśpieku i sutyknieńnia možna było b paźbiehnuć.
U sudździ taksama vyklikała pytańni toje, jakim čynam možna kiravać kiroŭcam biez suviazi, karystajučysia tolki žestami, nie budučy ŭpeŭnienym u tym, što hetyja žesty zrazumiejuć i pačujuć, a taksama čamu kałona ruchałasia biez supravadžeńnia, jakoje kiraŭnictva častki čamuści nie paličyła patrebnym arhanizavać.
Pakul nieviadoma, ci buduć pieraśledavacca ŭ sudovym paradku tyja vajennyja, jakija adkazvali za arhanizacyju i biaśpieku ruchu techniki. Adnak da momantu pačatku raźbiralnictva jany atrymali tolki słužbovyja spahnańni.
Paciarpiełyja, u tym liku i baćki zahinułaha chłopčyka, prasili sudździu, kab da sałdata było ŭžytaje minimalnaje pakarańnie. Jany ŭkazvali na toje, što vinavacić u zdareńni najpierš treba kamandziraŭ. Pra bolš miakki prysud prasiła i kamandavańnie bresckaj častki, u jakoj słužyŭ junak: pa słužbie jon charaktaryzavaŭsia vyklučna stanoŭča i navat chacieŭ praciahnuć słužbu na kantraktnaj asnovie.
Adnak sud prysudziŭ chłopca da pazbaŭleńnia voli. A z toj pryčyny, što sałdat atrymaŭ adterminoŭku na 2 hady, to pakul jon praciahnie vajskovuju słužbu. Akramia taho, vajskovuju častku abaviazali vypłacić paciarpiełym materyjalnuju škodu – bolš za 5 młn rubloŭ, vydatkavanych na lekavańnie paciarpiełych dziaŭčat, pachavańnie zahinułaha chłopčyka i akazańnie jurydyčnych pasłuhaŭ.
Taksama baćka zahinułaha padletka padavaŭ chadajnictva na kampiensacyju maralnaj škody na sumu 100 młn rubloŭ (pa 50 młn kožnamu z baćkoŭ), adnak sud pa prośbie pradstaŭnika čaści źniziŭ sumu i ŭ vyniku baćkam budzie vypłačana suma ŭ 10 razoŭ mienšaja za tuju, jakuju jany zajavili – tolki 10 młn. rubloŭ.
Baćka zahinułaha chłopčyka Siarhiej Izotaŭ ličyć, što suma, jakuju abaviazali vypłacić u jakaści kampiensacyja maralnaj škody, prosta śmiešnaja. Siarhiej pryznaŭsia, što jon naohuł nie źbiraŭsia padavać hety pazoŭ i nie zrabiŭ by hetaha, kali b chacia b adzin pradstaŭnik čaści pryjšoŭ i prabačyŭsia za toje, što zdaryłasia.
Adnak apratestoŭvać prysud paciarpieły nie budzie, jon źbirajecca spahnać z častki tolki košt aŭtamabilu, što paciarpieŭ u vyniku DTZ. Jaho advakat užo rychtuje hramadzianski pazoŭ.
Darožna-transpartnaje zdareńnie, u jakim zahinuŭ 17-hadovy padletak i surjozna paciarpieli dźvie jahonyja adnahodki, adbyłasia 28 maja 2009 hoda na lasnoj darozie niepadalok ad v. Pałonka Baranavickaha rajonu.
U toj dzień z palihonu v. Dzieraŭnaja ŭ vajskovuju častku viartałasia kałona husieničnaj techniki, jakaja składałasia ź siami mašyn. Na pavarocie darohi ŭleva husieničny ciahač MTŁBu vyjechaŭ na pałasu strečnaha ruchu i sutyknuŭsia z džypam «Chundaj-Hałopier», za rulom katoraha znachodziŭsia 17-hadovy žychar v. Pałonka Arciom Izotaŭ.
U vyniku DTZ chłopiec atrymaŭ surjoznyja traŭmy i ŭ toj ža dzień pamior u balnicy. Traŭmy atrymali i dźvie jahonyja adnakłaśnicy, jakich jon u toj dzień padvoziŭ z škoły dachaty.
