U daśledavańni SATIO pryniali ŭdzieł bolš za 1 tysiaču čałaviek. Ich adkazy pakazali, što ŭ vypadku źniknieńnia krynicy dachodu ŭ kožnaha druhoha biełarusa hrošaj chopić maksimum na miesiac, a źbieražeńni, na jakija možna pražyć jak minimum paŭhoda, jość tolki ŭ kožnaha dziasiataha biełarusa, paviedamlaje Officelife.media.
Pražyć dva miesiacy biez dachodu pad siłu 15% biełarusaŭ, a ceły kvartał — 10%.
Cikava, što samymi papularnymi finansavymi apieracyjami nazvali kuplu i prodaž valuty. Śledam iduć pakupki ŭ kredyt abo rasterminoŭku, a taksama pazyčeńnie hrošaj u svajakoŭ i znajomych.
U Alfa-Banku analityki taksama adsočvali pavodziny svaich klijentaŭ i paćviardžajuć: viasnoj jany ździajśniali tranzakcyi radziej, čym zvyčajna. Što tyčycca bližejšych finansavych płanaŭ, to tut u lidarach varyjanty kupić zamiežnuju valutu i vypłacić kredyt albo viarnuć doŭh.
Darečy, bolš za 40% apytanych i zusim pryznalisia, što ŭ najbližejšaj budučyni nie płanujuć ździajśniać nijakija finansavyja apieracyi. Pryčym dźvie traciny biełarusaŭ addajuć pieravahu tamu, kab nie tracić svabodnyja hrošy. 65% respandentaŭ ličać, što važna adkładvać finansy.
Biełarusy vybirajuć zachoŭvać źbieražeńni ŭ dalarach, mienavita na ich robić staŭku 73% nasielnictva. Ale kožny treci adznačyŭ, što lepš trymać hrošy i ŭ rublach, i ŭ valucie. Jašče adzin pakazalny momant: ludzi ad 25 da 44 hadoŭ čaściej addajuć pieravahu tamu kab zachoŭvać hrošy ŭ dalarach, a voś starejšaje pakaleńnie — u jeŭra.
Aŭtary daśledavańnia adznačajuć, što adkładzienyja hrošy nie ŭdzielničajuć u ekanamičnym abarocie. I takuju tendencyju składana nazvać pazityŭnaj. U vyniku dźvie traciny ŭdzielnikaŭ apytańnia ličać, što ciapier niespryjalnaja abstanoŭka dla inviestycyj.
