Fota Stasa Jurčanki, graty.me
Jak paviedamiła Mišel Bačelet padčas vystupu na Radzie AAN pa pravach čałavieka, kali abmiarkoŭvałasia spravazdača manitorynhavaj misii AAN va Ukrainie, jak minimum 7 žurnalistaŭ zahinuli pad abstrełami, i ź ich 5 — u vyniku rasijskich abstrełaŭ.
Jašče 5 žurnalistaŭ zabili ŭ rajonach aktyŭnych bajavych dziejańniaŭ. Adnaho žurnalista vykrali rasijskija vajskoŭcy, i jon pamior ad katavańniaŭ adrazu paśla vyzvaleńnia z pałonu.
Pavodle AAN, siarod zahinułych i paranienych žurnalistaŭ sama mieniej piać žančyn. Siarod ich — supracoŭnica ŭkrainskaj słužby «Radyjo Svaboda» Viera Hiryč i rasijskaja žurnalistka Aksana Baulina.
U toj ža čas Ministerstva ŭnutranych spraŭ Ukrainy maje inšuju statystyku, i pavodle jaje paciarpiełych žurnalistaŭ kudy bolš. Jak paviedamiła na bryfinhu 5 lipienia śpikierka ministerstva Alena Maćviejeva,
śledčyja Nacyjanalnaj palicyi Ukrainy rasśledujuć 46 kryminalnych spraŭ ab złačynstvach rasijskich vajskoŭcaŭ u dačynieńni da pradstaŭnikoŭ ŚMI. U tym liku — ab hibieli 29 žurnalistaŭ, ranieńni 15 pradstaŭnikoŭ ŚMI i vykradańni 11.
Z pačatku vajny va Ukrainie AAN zadakumientavała hibiel 4889 mirnych ukraincaŭ, u tym liku 335 dziaciej. Svaje damy pakinuli 8 miljonaŭ žycharoŭ. U AAN adznačajuć, što faktyčnyja ličby mohuć być istotna vyšejšyja.
