Kala 20 niamieckich intelektuałaŭ u liście «Spynieńnie ahniu zaraz!» miarkujuć, što dalejšaja vajskovaja padtrymka Ukrainy Zachadam razmyvaje razumieńnie taho, jakuju metu jany pieraśledujuć. «Pieramoha Ukrainy z advajavańniem usich akupavanych terytoryj uklučna z Danieckaj i Łuhanskaj abłaściami i Krymam ličycca vajennymi ekśpiertami nierealistyčnaj, bo Rasija źjaŭlajecca ŭ vajskovym płanie macniejšaj i zdolnaj na dalejšuju vajennuju eskałacyju», — havorycca ŭ liście.
Aŭtary jaho śćviardžajuć, što asudžajuć dziejańni Rasii, u pryvatnaści jaje vajennyja złačynstvy ŭ Ukrainie, ale dadajuć, što «praciah vajny va Ukrainie prablemy nie vyrašyć».
«Apošnija padziei pa tranzitu ŭ Kalininhrad i zajava Pucina ab pieradačy rakiet, zdolnych nieści jadziernyja zarady, u Biełaruś, pakazvaje, što ryzyka eskałacyi raście. Zachad pavinien zrabić usio mahčymaje, kab zabiaśpiečyć dasiahnieńnie bakami rašeńnia šlacham pieramovaŭ u najbližejšaj budučyni», — dadajuć niamieckija intelektuały.
Jany ličać, što pieramovy nie aznačajuć prymusu Ukrainy da zdačy abo pradyktavanaha Pucinym śvietu, a Zachad pavinien vyrazna zajavić, što «nie maje cikavaści praciahvać vajnu i adpaviednym čynam źmienić svaju palityku».
Pasoł Ukrainy ŭ Hiermanii Andrej Mielnik nazvaŭ aŭtaraŭ lista «paražencami».
«Tolki nie heta, jakaja ž padborka psieŭdaintelektualnych niaŭdačnikaŭ. Usie vy pavinny narešcie pajści da djabła z vašymi paraženčymi «paradami». Byvajcie», — napisaŭ jon u Twitter.
Heta nie pieršy padobny zvarot «niamieckich intelektuałaŭ». Tak, 23 krasavika šerah byłych niamieckich palitykaŭ, intelektuałaŭ i lidaraŭ mierkavańniaŭ apublikavali adkryty zvarot da ŭrada Hiermanii, źmiest jakoha zaklučajecca, pa sutnaści, u prymusie Ukrainy da kapitulacyi.
U toj ža čas u pačatku maja hrupa niamieckich intelektuałaŭ na čale z byłym palitykam Partyi zialonych Ralfam Fiuksam adreahavali na list, inicyjavany publicystkaj Alisaj Švarcer, i adkryta vystupili za pastaŭku Ukrainie ciažkaj zbroi.
