Z 8 da 20 hadzin 15 červienia Ministerstva abarony RF abiacaje humanitarny kalidor dla evakuacyi mirnych hramadzian, jakija znachodziacca na kambinacie «Azot», u horad Svatava, jaki kantraluje samaabvieščanaja «ŁNR». Ukrainski bok prapanoŭvaŭ pravieści evakuacyju ŭ Lisičansk, jaki znachodzicca pad kantrolem Kijeva.
Rasijskija vajskoŭcy prapanavali ŭkrainskim siłam z 8 ranicy 15 červienia spynić lubyja bajavyja dziejańni i «vypuścić» mirnych hramadzian praz humanitarny kalidor, a taksama «spynić biessensoŭnaje supraciŭleńnie i skłaści zbroju».
Mieziencaŭ padkreśliŭ, što Rasija «harantuje zachavańnie žyćcia i zachavańnie ŭsich normaŭ Ženieŭskaj kanviencyi ab abychodžańni z vajennapałonnymi, jak heta adbyłosia z tymi, chto raniej zdaŭsia ŭ pałon u Maryupali».
Na terytoryi «Azotu» znachodzicca hrupoŭka ŭkrainskich sił, jakaja adyšła na zavod paśla niekalkich dzion bajoŭ u Sievieradaniecku. Pa acency ŭładaŭ «ŁNR», na zavodzie znachodziacca da 2500 ukrainskich vajskoŭcaŭ i «zamiežnych najmitaŭ». Kiraŭnik Łuhanskaj abłasnoj vajennaj administracyi Siarhiej Hajdaj kazaŭ, što na terytoryi zavoda znachodziacca kala 500 mirnych žycharoŭ. Pa zajavie ŭkrainskich uładaŭ, terytoryju «Azota» pastajanna abstrelvajuć, bai iduć na prylehłych vulicach.
