Dźmitryj Dziomuškin.
Dziomuškin — adna sa znakavych fihur ruskaha nacyjanalizmu. Jon byŭ arhanizataram «ruskich maršaŭ», udzielničaŭ u RNIE, «Słavianskim sajuzie» i inšych radykalna nacyjanalistyčnych arhanizacyjach i hrupoŭkach. Rasijskija ŭłady karali jaho za ekstremizm, 8 miesiacaŭ Dziomuškin pravioŭ u kałonii.
Jašče da pačatku tak zvanaj «śpiecapieracyi» Dziomuškin krytykavaŭ rasijskija ŭłady za ich pazicyju pa Ukrainie. Z adnaho boku, jon, jak kłasičny ruski šavinist, nie pryznavaŭ asobnaj ŭkrainskaj nacyi (ličyŭ bolšaść žycharoŭ Ukrainy ruskimi), ź inšaha boku, ličyŭ vajnu z ukraincami nienarmalnaj, bo dla jaho heta była vajna adnych ruskich suprać inšych «ruskich».
«Čamu mianie pastajanna kličuć vajavać za Ruski śviet z ruskimi? My adrazu adnaznačna vyrašyli, što nie budziem vajavać. Va ŭkraincaŭ pad vajnoj z Rasijaj razumiejecca nie vajna z terytoryjaj abo źniščeńnie rasiejcaŭ, a baraćba z Pucinym i kampanijaj. Etničnaj vajny va Ukrainie niama», — kazaŭ jon u intervju ŭ 2015 hodzie.
«Ruskija nacyjanalisty nie nastolki durnyja, kab pryniać hetuju ideju: kali Pucin z kimści nie znachodzić supolnaj movy, to hety narod — naš vorah», — kaža jon.
U intervju jon śćviardžaŭ, što rasijskija ŭłady jašče ŭ 2014 hodzie prapanoŭvali jamu jechać na vajnu va Ukrainu. Ź jahonych słoŭ, na toj momant vice-premjer Rasii Dźmitryj Rahozin (ciapierašni kiraŭnik Raskosmasu), jaki dekłaruje ultrapravyja pohlady, jašče da akupacyi Kryma prapanoŭvaŭ jamu sabrać radykałaŭ i jechać va Ukrainu. Mienavita Rahozin, sa słoŭ Dziomuškina, užo tady zajmaŭsia adpraŭkaj bajevikoŭ na ŭschod Ukrainy.
«Heta była aficyjnaja razmova. Heta byŭ luty miesiac, jašče da refierendumu ŭ Krymie, jašče da ŭsich hetych rečaŭ, kali ja pavinien byŭ stać meram adnaho z bujnych haradoŭ i pajechać tudy, sabraŭšy nacyjanalistaŭ», — uspaminaje Dziomuškin, dadaŭšy, što admoviŭsia ad hetaj prapanovy, bo razumieŭ, što heta budzie «prosta ŭtylizacyja ludziej».
Tut varta nahadać, što ŭ ruskim nacyjanaliźmie ŭ 2014 hodzie zdaryŭsia raskoł: častka nacyjanalistaŭ pajechała tady vajavać va Ukrainu, i mnohija apynulisia pa roznyja baki barykad. Niekatoryja padtrymali Ukrainu, apynulisia ŭ «Azovie», inšyja — vystupili na baku DNR i ŁNR. Dziomuškin zaniaŭ treciuju pazicyju: jon vystupiŭ rezka suprać pajezdak ruskich nacyjanalistaŭ va Ukrainu.
Tady zdaryłasia dziŭnaja reč. Z adnaho boku, rasijskija ŭłady i mejnstrymnyja palityčnyja siły pieraniali nacyjanalistyčnuju rytoryku. Z druhoha boku, z palityčnaha pola amal źnikli kłasičnyja ruskija nacyjanalisty, i toj raskoł adbyŭsia, u tym liku, pa ŭkrainskim pytańni.
«Usio, što tam było zroblena, u kančatkovym vyniku było zroblena suprać intaresaŭ ruskich. Ludzi pad ściaham «ruski śviet», pad padstavaj abarony ruskaj movy zrabili ruskamu narodu samuju vialikuju miadźviedžuju pasłuhu. Nie viedaju, za što jany tam zmahalisia, ale dla «samaścijnaści» Ukrainy rasijskaja ŭłada zrabiła siońnia bolš, čym Ściapan Bandera i Uładzimir Lenin razam uziatyja. Jany hetuju «samaścijnaść» jašče b 200 hadoŭ sprabavali vychavać, a dziakujučy hetym padziejam, jany sapraŭdy stanuć asobnaj dziaržavaj i narodam», — narakaŭ Dziomuškin u 2019 hodzie.
«Ja absalutna nie sumniavajusia, što našaj uładzie pa vialikim rachunku naplavać na ŭsich ruskich va Ukrainie. Zaraz ich turbuje tolki adno — kab scenar Majdanu nie paŭtaryŭsia ŭ Rasii», — kazaŭ jon.
Kali ž rasijska-ŭkrainskaja vajna pierajšła ŭ haračuju, adkrytuju fazu (toje, što ŭ Rasii nazvali «śpiecapieracyjaj»), Dziomuškin pierajšoŭ da jašče bolš vostraj krytyki.
«Vidavočna, što supraciŭ uzbrojenym siłam Rasii akazvajuć zusim nie «fašysty-narkamany», jak heta sprabujuć padnieści. U vajnie ŭdzielničaje rehularnaja ukrainskaja armija … Nie baču ja i natoŭpu radasnaha narodu, jaki vitaje vojski, što «vyzvalajuć» ich ad fašyzmu. Bujnyja harady nie zdajuć, vysoki ŭzrovień supracivu, inakš usio b užo skončyłasia», — kazaŭ jon.
«Vy možacie biaskonca spasyłacca na historyju, raspaviadać pra raźviazanuju vaśmihadovuju vajnu ŭ Daniecku, pra nieabchodnaść i vymušanaść, ale nichto ŭ śviecie nie zrazumieŭ i nie pryniaŭ hetaj nieabchodnaści šturmavać Kijeŭ.
Nichto nie vieryć u vajnu suprać nacystaŭ i narkamanaŭ z metaj vyzvalić nasielnictva Ukrainy. U heta ŭžo darečy i našy zapisnyja «patryjoty» nie vierać», — dadavaŭ jon.
«Chaj budzie Pucin, kazali nam, tolki b nie było vajny! Chaj budzie Pucin, a što, vy chočacie, jak u 90-ja, kazali jany. U vyniku atrymajem i vajnu, i najhoršy varyjant 90-ch», — krytykuje ciapierašnija paradki Dziomuškin.
«Viarnucca ŭ SSSR siońniašniaja Rasija nijak nie zmoža. SSSR mieŭ u svajoj arbicie pałovu śvietu, heta nie tolki krainy Varšaŭskaj damovy, ale i šmatlikija sajuźniki, na jakich byŭ idejna-palityčny ŭpłyŭ. Tamu byli vielizarnyja rynki tavaraŭ, dostup da technałohij, vialikaja dola ad suśvietnaj pramysłovaści. RF pachvalicca pramysłovaściu i siabrami siońnia nie moža. Tamu izalacyja SSSR heta zusim nie toje, što adbyvajecca ciapier z nami. Siońnia viarnucca ŭ SSSR niemahčyma, ale mahčyma pryjści ŭ Paŭnočnuju Kareju», — kaža jon pra izalacyju krainy.
«Usie samyja hniusnyja sankcyi i abmiežavańni ŭ dačynieńni da ludziej uvioŭ nie Zachad, a naš urad», — adznačaje ruski nacyjanalist.
«Hrošy, što vydzialalisia na Ukrainu, paśpiachova raskradalisia čynoŭnikami i siłavikami roznych uzroŭniaŭ, naŭzamien Pucina karmili pryjemnaj dezynfarmacyjaj, što mahło adbicca na klučavych rašeńniach. U vyniku Ukraina apynułasia nie prosta prahułkaj i vyzvaleńniem nasielnictva ad «fašystaŭ-narkamanaŭ», a vialikaj prablemaj. Niečakana mocny supraciŭ navat u ruskamoŭnych haradach Paŭdniovaha ŭschodu spravakavaŭ łancuhovuju reakcyju śvietu», — apisvaje jon svajo bačańnie padziej.
«My žyviom u dziŭny čas. Kali brutalnyja nacyjanalisty vystupajuć za mir, a mirnyja prychilniki partyi ŭłady i muzyki patrabujuć kryvi, vajny i bambiožak», — piša Dziomuškin.
«Amal 100 dzion krovapralitnaj bratazabojčaj bojni pamiž Rasijaj i Ukrainaj. Katastrofa dla ludziej, jakija dumajuć, była vidavočnaja z samaha pačatku, jak i absurdnaść budaŭnictva «ruskaha śvietu» padobnym čynam. Ale i praz sto dzion kryvavaj bojni jašče šmat tych, chto patrabuje jaje vieści i naroščvać, až da apošniaha ruskaha. Im užo składana sfarmulavać, jakija mety stavilisia pieršapačatkova dla «śpiecapieracyi» i jakija vyniki atrymany na vychadzie vajnoj. Vajna ŭžo moža być prosta dziela vajny, bo adstupić nielha, adstupić značyć prajhrać, pryznać praliki i pamyłki uładaŭ. A heta niemahčyma, Akieła nie pramachvajecca», — adznačaje hramadski dziejač.
«Nieprychavanaja isteryja zachapiła fiederalnyja telekanały rasijskaha telebačańnia. Prapahanda nianaviści, złości, vyklučnaści, raspalvańnia varožaści, nacyjanalnaj nieciarpimaści stała zvyčajnaj spravaj», — aburajecca ruski nacyjanalist.
