Borys Džonsan i Mahdalena Andersan. Fota: Getty Image
Brytanski premjer Borys Džonsan i premjer-ministr Šviecyi Mahdalena Andersan padpisali dekłaracyju ab uzajemadapamozie ŭ abaronie na vypadak napadu.
«Kali b Šviecyja padvierhnułasia napadu i źviarnułasia da nas za padtrymkaj, my b jaje dali», — skazaŭ Džonsan žurnalistam na sumiesnaj pres-kanfierencyi ŭ Stakholmie.
U adpaviednaści z palityčnaj dekłaracyjaj salidarnaści, «kali jakaja-niebudź kraina pacierpić ad stychijnaha biedstva abo napadu, Vialikabrytanija i Šviecyja buduć dapamahać adna adnoj roznymi sposabami. Padtrymka budzie akazvacca pa zapycie paciarpiełaj krainy i moža ŭklučać vajskovyja resursy», — dadała Andersan.
Paźniej u sieradu Džonsan padpisaŭ anałahičnuju dekłaracyju ŭ Chielsinki.
U najbližejšyja dni Šviecyja i Finlandyja pavinny vyrašyć, ci admaŭlacca im ad dziesiacihodździaŭ (a dla Šviecyi i stahodździaŭ) vajskovaha niedałučeńnia i ŭstupać u NATA.
Pieraasensavać mietady abarony abiedźvie krainy prymušaje napad Rasii na Ukrainu. Čakajecca, što abiedźvie krainy ŭstupiać u NATA.
Bajučysia reakcyi Rasii, jakaja vystupaje suprać luboha pašyreńnia NATA, dźvie skandynaŭskija krainy damahalisia ad členaŭ NATA harantyj biaśpieki, što jany buduć abaronienyja ŭ pramiežkavy pieryjad pamiž padačaj zajaŭki i atrymańniem paŭnapraŭnaha členstva — što moža zaniać da hoda.