Moŭčan vykładaŭ svoj pradmiet pa-biełarusku.
U profili na sajcie ŭniviersiteta zhadvajucca šmatlikija jahonyja ŭznaharody i zvańni, u tym liku nieadnarazovyja hanarovyja hramaty BDU «za šmathadovuju plonnuju piedahahičnuju dziejnaść».
Ale ŭ 2022 hodzie šlachi vykładčyka i ŭniviersiteta razyšlisia. U fejsbuku jon napisaŭ, što prapanavali dva varyjanty — ci sa skančeńniem kantrakta, ci pa zhodzie bakoŭ. Jon vybraŭ druhi varyjant.
Pačatyja paśla vybaraŭ 2020 hoda čystki ŭ BDU praciahvajucca i praz paŭtara hoda. U śniežni zvolnili prafiesarku fiłfaka Ału Kožynavu, u lutym — prafiesarku Natallu Abrašynu-Žadajevu, u krasaviku — vykładčyka fakulteta mižnarodnych adnosin Alaksandra Danileviča.
«Ź niekali samaha lubimaha mnoj fakulteta znoŭ adličvajuć lepšych vykładčykaŭ, — piša ŭ Fejsbuku adzin ź jaho byłych vučniaŭ. — Na hety raz fizfak BDU vyhnaŭ lubimaha ŭsimi fizruka — Siarhieja Moŭčana. Čamu ja kažu, što jon adzin ź lepšych? Chto znajomy sa mnoj, toj viedaje, jakija składanyja adnosiny ŭ mianie ź fizkulturaj i sportam. A voś na zaniatkach pa fizkultury ŭ spadara Siarhieja i prymušać nie treba było, u mianie fizkultura była adnym ź lubimych pradmietaŭ. A jašče spadar Siarhiej razmaŭlaŭ i vioŭ zaniatki pa-biełarusku. I choć jaho pradmiet byŭ nie adzinym na biełaruskaj movie, heta byŭ vielmi dobry prykład dla nas. Bo adna sprava, kali pa-biełarusku tabie vykładajuć historyju Biełarusi i biełaruskuju movu, i zusim inšaja — kali čytajuć fiziku łazieraŭ ci pravodziać zaniatki fizkultury: ty bačyš, što naša mova moža spakojna isnavać u lubych śfierach žyćcia.
Ja ŭžo niekali pisaŭ, što kali adnojčy zapytaŭsia pra tych vykładčykaŭ, jakija prosta etałonna čytali nam lekcyi, to daviedaŭsia, što praktyčna ŭsie jany ŭžo nie pracujuć na fizfaku, bo adpravilisia na piensiju, a niekatoryja navat i ŭ mahiłu. Ciapier śpis strataŭ papoŭnili i Maksim Šundałaŭ, i Natalla Abrašyna-Žadajeva, a ciapier i Siarhiej Moŭčan».
Ale potym ja zajšoŭ na sajt fakulteta: a ci pracuje tam X, jaki kaliści nie moh adroźnić roŭnaści ad praporcyi? A ci jość siarod vykładčykaŭ Y, jakaja lohka pryroŭnivała skalary i viektary? A ci jość Z, jakaja na lubuju prapanovu bolš łakaničnaha rašeńnia kryčała: «Vy jak chočacie, a na ekzamienie budziecie adkazvać tak, jak ja vam raskazvaju!»? Viedajecie, usie jany pracujuć, i jašče adpracujuć nie adzin dziasiatak hadoŭ. A jašče dakładna tam jość tyja, chto «majuć zahad, kab ni kroku nazad, I mroicca im, što naŭkoł Stalinhrad, I zrobiać dakładna ŭsio toje, što im zahadajuć».
