Litaralna ź pieršych ža dzion ŭvarvańnia ŭ Biełarusi pačała pracavać tajemnaja sietka, u jakuju ŭvajšli čyhunačniki, chakiery i pierabiežčyki z orhanaŭ biaśpieki, kab paškodzić čyhunačnyja puci, tym samym pryčyniŭšy škodu rasijskim łahistyčnym łancužkam.
Napadzieńni byli prostyja, ale efiektyŭnyja. Metaj biełaruskaha padpolla byli šafy kiravańnia sihnałami, jakija zabiaśpiečvajuć bieśpierabojnaje funkcyjanavańnie čyhunki. U vyniku ciahniki cełymi dniami prastojvali, što vymušała rasijan papaŭniać zapasy svaich vojskaŭ aŭtatranspartam. Heta ŭ svaju čarhu pryviało da viadomych 60-kiłamietrovych kałon na poŭnač ad Kijeva.
«Uličvajučy zaležnaść Rasii ad ciahnikoŭ, ja ŭpeŭnienaja, što heta spryjała niekatorym prablemam, jakija ŭ ich naziralisia na poŭnačy. Heta zamarudziła ich zdolnaść pierasoŭvacca. Im nie ŭdałosia prasunucca dalej na ŭkrainskuju terytoryju i naładzić linii pastaŭki, tamu što im davodziłasia abapiracca na hruzaviki», — cytuje hazieta Emili Ferys, navukovuju supracoŭnicu łondanskaha analityčnaha centra RUSI.
Vydańnie nazyvaje dziejańni biełaruskich dyviersantaŭ «druhoj rejkavaj vajnoj».
«My nie chacieli, kab hinuli rasijskija abo biełaruskija mašynisty. My vykarystoŭvali biaskroŭny sposab, kab spynić ich», — cytuje hazieta biełaruskaha aktyvista Juryja Ravavoha.
Jon, jak i inšyja biełarusy, jakija ŭdzielničali ŭ arhanizacyi napadaŭ, admaŭlajucca raskryvać dakładnyja padrabiaznaści taho, jak i kim byli ŭčynienyja ataki, bajučysia za biaśpieku čyhunačnych partyzan.
Pačynajučy z 26 lutaha, praz dva dni paśla ŭvarvańnia, sieryja ź piaci dyviersijnych napadaŭ na sihnalnyja šafy pryviała da amal poŭnaha spynieńnia ruchu rasijskich ciahnikoŭ u Biełarusi.
Da 28 lutaha stali źjaŭlacca spadarožnikavyja fatahrafii 60-kiłamietrovaj kałony rasijskich hruzavikoŭ i tankaŭ, jakija nibyta nakiroŭvalisia ź Biełarusi ŭ bok Kijeva. Na praciahu tydnia kałona prastojvała z-za taho, što ŭ mašyn skončyłasia paliva, i/abo jany złamalisia.
Paśla hetaha łukašenkaŭcy pačali represii. Ministerstva ŭnutranych spraŭ pastanaviła, što paškodžańnie čyhunačnaj infrastruktury źjaŭlajecca terarystyčnym aktam, złačynstvam, za jakoje praduhledžana 20 hadoŭ turmy.
Čyhunačnikaŭ zatrymlivali vypadkovym čynam, i pa stanie na kaniec krasavika pa mienšaj miery 11 biełarusaŭ znachodziacca pad vartaj pa padazreńni va ŭdziele ŭ «teraktach».
