Načalnik raźviedki Ministerstva abarony Ukrainy Kirył Budanaŭ. Fota: ofis prezidenta Ukrainy
Rasija rychtujecca pravieści bitvu za Danbas da Vialikadnia, heta značyć da 24 krasavika. «Ruskija rychtujucca da vyrašalnaj dla ich bitvy. Jany mocna śpiašajucca, tamu što vielmi abmiežavanyja ŭ časie. Jany chočuć paśpieć atrymać choć niejkuju stratehičnuju pieravahu i taktyčny pośpiech. Jany śpiašajucca da Vialikadnia».
Ukraina hatovaja złamać płany RF. «Ničoha ŭ ich nie ŭdasca. Mahčymyja peŭnyja taktyčnyja pieramohi, ale heta časova».
Ab Maryupali. «Ja ŭpeŭnieny, što našy abaroncy nie zdaducca, buduć abaraniacca da apošniaha. Maryupal budzie debłakavany i vyzvaleny».
Ukraina chutka adpomścić vinavatym u złačynstvach u Bučy. «Ukraina nie vajuje z hramadzianskim nasielnictvam praciŭnika, ale złačyncy, jakija heta zrabili [złačynstvy ŭ Bučy. — HH], buduć usie pakaranyja. Peŭnyja epizody, ja spadziajusia, vy ŭbačycie ŭžo davoli chutka».
U Rasii małavierahodny «miaciež hienierałaŭ» suprać Uładzimira Pucina. «Dla taho, kab heta adbyłosia, patrebna postać sapraŭdnaha lidara siarod hienierałaŭ. Nasamreč, ciapier u Rasii takich, na žal dla nas, niama. Ale tearetyčna heta mahčyma».
Pra nibyta źbićcio ŭkrainskaha transpartnaha samalota z zamiežnaj zbrojaj. «Ab takim fakcie mnie asabista nie viadoma. Ja nie paćviardžaju takija danyja [Ministerstva abarony Rasii. — NN]».
Pra jadzierny ŭdar Rasii. «Supakojciesia ŭsie, heta vyklučna pahrozy z boku RF. Navat technična heta nie vielmi prosta zrabić. Vielmi małavierahodna, što Pucin na heta pojdzie».
