Pačynajučy z pačatku rasijska-ŭkrainskaj vajny rehularna iduć paviedamleńni pra maradziorstva, jakim zajmajucca rasijskija vajskoŭcy, źjaŭlajucca na praciahu ŭsioj vajny. Isnujuć jak asabistyja śviedčańni žycharoŭ Ukrainy, tak i pierachopy razmoŭ rasijskich žaŭnieraŭ, jakija publikujucca Słužbaj biaśpieki Ukrainy (mahčymaści paćvierdzić ich sapraŭdnaść niama). Naprykład, na adnym z takich zapisaŭ rasijanin kaža, što jaho kalehi «torbami ŭsio ciahnuć», a sam jon «troški padukraŭ» probniki kaśmietyki, žanočyja krasoŭki i vopratku — udakładniajučy, što «tut spartyŭnaja siamja žyvie».
Adnak najbolš pierakanaŭčymi dokazami mahčymaha maradziorstva stali videazapisy z veb-kamier z ofisaŭ SDEK ź ludźmi ŭ vajskovaj formie; pieršyja ź ich źjavilisia ŭ pačatku krasavika. Na rukavach niekatorych adpraŭnikoŭ pasyłak možna razhledzieć šaŭrony rasijskich vojskaŭ.
«Naša Niva» šmat pra heta pisała, razhladajučy prablemu z roznych aśpiektaŭ (hł. hipierspasyłki ŭnizie artykuła). Ciapier jość i inšy. Rasijskaje vydańnie «Mieduza» vyvučyła sacyjalnyja sietki adpraŭnikoŭ bujnych pasyłak i skłała ich partrety.
Bolš za ŭsio pasyłak z Mazyra, adpraŭlenych 2 krasavika, jeduć u zachodniesibirski horad Rubcoŭsk u Ałtajskim krai — jaho paznačyli 49 adpraŭnikoŭ z 69, apublikavanych «Bazaj dadzienych». Siarod haradoŭ-atrymalnikaŭ jość taksama Maskva, Čyta, Anharsk, Uljanaŭsk, Omsk i Usuryjsk. Vaha najbujniejšaha adpraŭleńnia skłała amal paŭtony — 440 kiłahramaŭ (hetaja pasyłka idzie ŭ Rubcoŭsk), samaha maleńkaha — usiaho try kiłahramy. Siaredniaja vaha adpraŭleńnia na adnaho čałavieka — 54 kiłahramy, padličyła «Mieduza».
«Mieduzie» ŭdałosia atrymać 25 čekaŭ sa SDEK ź infarmacyjaj ab pasyłkach, adpraŭlenych 2 krasavika z Mazyrskaha adździaleńnia ŭ Rubcoŭsk. Jany ŭtrymlivajuć proźvišča, imia adpraŭnika i atrymalnika, numary telefonaŭ i apisańnie hruzaŭ. Supastaviŭšy hetyja dadzienyja ź infarmacyjaj prajektaŭ «Biełaruski Hajun» i «Baza dadzienych», žurnalisty vyśvietlili, što jak minimum 16 čałaviek z 49, akramia inšych rečaŭ, adpravili ŭ Rubcoŭsk instrumienty, a 12 čałaviek — vopratku. Siarod rečaŭ, što adpraŭlalisia, taksama byli elektrasamakat, kavamašyna, pałatka, televizary i muzyčnyja kałonki.
Miarkujučy pa ŭsim, pieršyja adpraŭleńni z Mazyra ŭ Rubcoŭsk pačalisia jašče ŭ kancy sakavika. U adnym z praŭkrainskich telehram-čataŭ, udzielniki jakoha sprabujuć deananimizavać rasijskich vajskoŭcaŭ, karespandent «Mieduzy» vyjaviŭ numary i bolš rańnich adpraŭleńniaŭ u Rubcoŭsk z mazyrskaha adździaleńnia SDEK. Naprykład, zamovu na dastaŭku ad 30 sakavika, za dzień da źjaŭleńnia pieršych paviedamleńniaŭ prajekta «Biełaruski Hajun», — pra toje, što rasijskija sałdaty adpraŭlajuć «mahčyma, kradzienyja» rečy ŭ RF. Jaho da hetaha času možna znajści na sajcie SDEK.
Samavyvaz pa-rashvardziejsku
13 studzienia 2022 hoda nieviadomy mužčyna, špacyrujučy pa adnoj z centralnych vulic Rubcoŭska, skraŭ śniehaačyščalnik, vystaŭleny kala kramy elektratechniki. Videa zdareńnia z kamier nazirańnia było apublikavanaje ŭ hrupie «Incydent Rubcoŭsk» u sacsietcy «VKontaktie». «Samavyvaz», — prakamientavaŭ post karystalnik «Uład Rastoŭ».
Praz try miesiacy ŭžo sam «Uład», mahčyma, trapiŭ na rezanansny videazapis z veb-kamier z ofisa ekspres-dastaŭki SDEK u Mazyry.
2 krasavika rasijanin Uładzisłaŭ Prastoŭ, miarkujučy pa śpisie prajekta «Baza dadzienych», adpraviŭ z Mazyra ŭ Rubcoŭsk try pasyłki ahulnaj vahoj 121 kiłahram. Atrymalnikam pasyłki pakazanaja Alesia Prastova, mahčyma — žonka Uładzisłava.
«Mieduza» pasprabavała znajści staronku Uładzisłava ŭ sacsietcy «VKontaktie». Miarkujučy pa ŭsim, heta zhadany vyšej «Uład Rastoŭ». Spačatku my vyjavili profil Alesi Prastovaj z Rubcoŭska (ciapier jana pierajmienavałasia ŭ «Alesiu Pastovu» — pa anałohii z mužam, vydaliŭšy adnu litaru z proźvišča), ale Uładzisłava niama ŭ jaje ŭ siabrach. Adnak jon pastaviŭ łajk na adnu ź jaje starych fatahrafij, a ŭ jaje Instagram (ciapier profil zakryty; na prevju vidać, što jaje prafiesija — kaśmietołah) apublikavanyja ich sumiesnyja fota.
Na avatarcy profila Uładzisłaŭ Prastoŭ — koratka stryžany mužčyna za 30, u kamuflažy. Miarkujučy pa kamientarach Prastova ŭ sacsietcy, jon zachaplajecca rybałkaj i tajskim boksam. Siarod padpisak na miascovyja pabliki i zabaŭlalnyja hrupy sustrakajucca śpiecyjalizavanyja vajskovyja supołki: «Taktyka śpiecnaza», «Naviny vajny».
Akramia hetaha, «Uład» — udzielnik zakrytaj hrupy «46 asobnaja ordena Žukava bryhada apieratyŭnaha pryznačeńnia»: heta złučeńnie Rashvardyi, jakoje hruntujecca ŭ Čačni. Raniej daśledčycki prajekt Conflict Intelligence Team paviedamlaŭ, što hvardziejcy z 46-j bryhady mohuć udzielničać u bajavych dziejańniach va Ukrainie.
«Mieduzie» nie atrymałasia vyjavić suviaź Prastova z čačenskim złučeńniem nacyjanalnaj hvardyi. Adnak u 2012 hodzie čałaviek z tymi ž proźviščam, imieniem i dataj naradžeńnia paznačaŭ svaim miescam pracy vajskovuju čaść 6720, miarkujučy z bazy źviestak «Žychary Rasii». Čaść dysłakujecca ŭ Rubcoŭsku, heta 656-y połk apieratyŭnaha pryznačeńnia vojskaŭ nacyjanalnaj hvardyi (Rashvardyi).
Uładzisłaŭ Prastoŭ moža dahetul słužyć u vajskovaj čaści 6720 — vajskoŭcy adtul dakładna ŭdzielničajuć u vajnie va Ukrainie: ałtajskija ŚMI pisali pra śmierć sałdata z hetaj čaści, a rubcaŭčanie adpraŭlali pasyłki vajskoŭcam čaści 6720 u ramkach akcyi «Pasyłka sałdatu».
10 krasavika «Uład Rastoŭ» abmiežavaŭ dostup da svajho profilu i z tych časoŭ nie źjaŭlaŭsia ŭ sietcy. Alesia Prastova zakryła dostup u svoj Instagram. Paznačany ŭ profili numar telefona dastupny dla zvankoŭ, ale paśla praciahłych hudkoŭ čutny tolki hołas aŭtaadkazčyka, jaki prapanuje pakinuć abanientu hałasavoje paviedamleńnie.
Na złość rekordam
Najbujniejšy hruz — 17 pasyłak ahulnaj vahoj amal u paŭtony (440 kiłahramaŭ) — 2 krasavika adpraviŭ z Mazyra ŭ Rubcoŭsk rasijanin Jaŭhien Kavalenka. Siarod inšaha heta instrumienty, muzyčnyja kałonki, stoł i pałatka. Dakładnaja vaha kožnaj pasyłki nieviadomaja, ale kali b kožny hruz z 17 adpraŭlenych važyŭ adnolkava (25,8 kh), na apłatu dastaŭki Kavalenka vydatkavaŭ by bolš za 52 tysiačy rubloŭ (košt adpraŭki adnoj pasyłki ŭ Rubcoŭsk pamieram da 50 kh, zhodna z «kalkulataram» SDEK, składaje 3085 rubloŭ).
U 2018 hodzie pra maładoha lejtenanta Jaŭhiena Kavalenku, jaki prybyŭ słužyć u tuju samuju «rashvardziejskuju» vajskovuju čaść 6720, pisała hazieta «Ałtajskaja praŭda». Uradženiec vioski Hileŭka Zaŭjałaŭskaha rajona Ałtajskaha kraja, jon zastupiŭ na pasadu kamandzira pieršaha raźvieduzvoda raźviedvalnaj roty.
«Hałoŭnaje — damahčysia pavahi. A jak heta zrabić? Tolki asabistym prykładam — rabi, jak ja. I staracca zaŭsiody być na hałavu vyšej», — tak Kavalenka adkazaŭ na pytańnie karespandenta ałtajskaj haziety pra toje, jak jon budzie vybudoŭvać adnosiny z padnačalenymi.
U dziacinstvie, jak pisała hazieta, Kavalenka «hulaŭ u vajnušku z pacanami», hladzieŭ filmy, dzie «sałdaty śmieła kidalisia ŭ boj, abaraniajučy Radzimu» — tady ŭ jaho i «zaradziłasia mara stać vajskoŭcam». Paśla škoły jon pastupiŭ u Novasibirski vajskovy instytut vojskaŭ nacyjanalnaj hvardyi imia I. K. Jakaŭleva.
Akramia vajskovaj słužby, Kavalenka zajmaŭsia skupkaj i prodažam aŭtamabilaŭ, vynikaje z abjaŭ jahonaha profilu na partale «Avita», pryviazanaha da numara telefona, jaki jon paznačyŭ u SDEK. Siarod archiŭnych abjaŭ profilu: Nissan X-Trail za 1,3 miljona rubloŭ i Toyota Vitz za 430 tysiač rubloŭ.
Avatarka Kavalenki ŭ telehramie i na sajcie «Avita» — ruka na ruli BMW. U 2021 hodzie Jaŭhien Kavalenka staŭ uładalnikam luksavaha krasoviera BMW X3, vynikaje z bazaŭ dadzienych HIBDD.
Aktualnaja abjava (z nazvanym adrasam: Ałtajski kraj, horad Rubcoŭsk) ab prodažy litych dyskaŭ za 14 tysiač rubloŭ apublikavanaja 12 studzienia 2022 hoda. Miarkujučy pa sajtu «Avita», abjava było abnoŭlenaja 13 sakavika 2022-ha — u razhar vajennaj kampanii va Ukrainie.
Ciapier, kali telefanavać pa numary telefona Kavalenki, vyklik adrazu pieraklučajecca na aŭtaadkazčyk.
Horad, dzie pieramoh televizar
Rubcoŭsk raźmieščany na poŭdni Ałtajskaha kraja. Nasielnictva horada ledź pieravyšaje 140 tysiač čałaviek, vynikaje sa źviestak Rasstata za 2019 hod. Pry hetym, pavodle taho ž daśledavańnia Rasstata, amal tracina miascovych žycharoŭ — piensijaniery (51 tysiača čałaviek u 2019-m). Da raspadu SSSR Rubcoŭsk — bujny mašynabudaŭničy centr Zachodniaj Sibiry, monahorad, jaki razrośsia vakoł matora-traktarnaha zavoda. U 2011 hodzie zavod zbankrutavaŭ, ciapier na jaho miescy pustka z ruinami. Rubcoŭsk taksama viadomy tym, što tam vyrablajecca syr «Łambier».
U horadzie raźmieščanyja adrazu čatyry papraŭčyja kałonii (PK №№ 4, 5, 9 i 10), jakija ałtajskaja presa nazyvaje «astraŭkom stabilnaści». Zarobak inśpiektara ŭ PK № 10 składaje 27 tysiač rubloŭ, vynikaje ź infarmacyi ab vakansii na sajcie «Praca Rasii»; u toj čas, jak zarobak prybiralščyka ŭ miascovym handlovym centry — ad vaśmi da dzieviaci tysiač «na ruki», a zarabotnaja płata fielčara ŭ dziaržaŭnaj lakarni moža varjiravacca ad 18 da 25 tysiač rubloŭ. Zarpłata strałka ŭ vajskovaj čaści 6720 — 25 tysiač rubloŭ. U haradskich pablikach tym, chto šukaje pracu, časam rajać iści ŭ kantraktnuju armiju.
Žychary Rubcoŭska skardziacca miascovym žurnalistam, što pracy ŭ horadzie praktyčna niama. Tamu rubcaŭčanam davodzicca šukać inšyja krynicy dachodu. «Baryha «(majecca na ŭvazie handal čym pryjdziecca) — vielmi raspaŭsiudžanaja ŭ Rubcoŭsku «prafiesija», piša ałtajski internet-partał altapress.ru.
«Handlujuć, chto čym moža: užyvanymi mašynami, materyjałami z razabranych zavodaŭ, kazachskimi cyharetami i harełkaj. Niekatoryja — vielmi paśpiachova, — havorycca ŭ materyjale altapress.ru. — Rubcoŭsk — horad biespracoŭnych na darahich mašynach, horad vialikaha sacyjalnaha rassłajeńnia. Kancentracyja «Leksusaŭ», «Infinici», darahich «Tajot» tut dakładna nie mienšaja, čym u Barnaule. U toj ža čas dachody mnohich nie pieravyšajuć pražytačnaha minimumu».
Jak minimum kožny piaty (10 čałaviek z 49) adpraŭnik hruzaŭ u Rubcoŭsk 2 krasavika, pra jaki stała viadoma žurnalistam, apłaciŭ dastaŭku televizara. My atrymali hetuju ličbu, supastaviŭšy dadzienyja čekaŭ SDEK, atrymanyja ad krynicy «Mieduzy» ŭ ofisie kampanii, ź infarmacyjaj prajektaŭ «Biełaruski Hajun» i «Baza dadzienych».
Jaŭhien Čučalin, jaki adpraviŭ u Rubcoŭsk adrazu niekalki televizaraŭ, u 2019 hodzie ŭžo pradavaŭ «televizar Sonni» (aŭtarskaja arfahrafija zachavanaja) za 30 tysiač rubloŭ. Infarmacyja pra heta zachavałasia ŭ archiŭnych abjavach jaho profilu na «Avita», pryviazanaha da numara telefona, jaki Čučalin paznačyŭ u ofisie SDEK.
Atrymalnicaj pasyłki Jaŭhiena paznačanaja Natalla Čučalina, jaho žonka. «Mieduza» znajšła jaje staronku ŭ sacsietcy «VKontaktie», jakaja raniej, miarkujučy pa archiŭnym snapšocie, jaki zachavaŭsia, była ŭ ich ahulnaj. Tady ŭ profili miescam pracy była nazvanaja ŭsio taja ž vajskovaja čaść 6720.
Numar telefona, paznačany Čučalinym, zaraz zabłakavany. Jahonaja žonka zakryła svoj profil «VKontaktie» i nie adkazała karespandentu «Mieduzy» na zajaŭku na dadavańnie ŭ siabry.
Televizar u Rubcoŭsk, miarkujučy pa čeku z SDEK, nakiravaŭ i 28-hadovy Dźmitryj Žumalin, jaki skončyŭ škołu ŭ nievialikim siale Novajahorjeŭskaje Ałtajskaha kraja (jahonyja profili ŭ sacsietkach my zmahli znajści dziakujučy numaram telefonaŭ, paznačanych Žumalinym u adnym z čekaŭ SDEK; infarmacyju pra datu i miesca naradžeńnia jon paznačyŭ na svajoj staroncy ŭ «VKontaktie»).
Miarkujučy z bazy źviestak «Žychary Rasii», u 2018 hodzie čałaviek z takim ža proźviščam, imieniem i dataj naradžeńnia zajmaŭ pasadu staršaha kulamiotčyka ŭ vajskovaj čaści 6720.
«Tamu, chto ŭmieje čakać, zaŭsiody dastajecca samaje lepšaje!» — taki status staić u Žumalina ŭ profili ŭ «VKontaktie».
Pry sprobach dazvanicca na numar telefona Žumalina, a taksama na numar jahonaj svajački, paznačany ŭ čeku SDEK, aŭtaadkazčyk paviedamlaje, što «numar časova zabłakavany».
Niekatoryja adpraŭniki pasyłak z Mazyra nie chavajuć svajoj suviazi z armijaj. Na ich staronkach u sacsietkach, jakija «Mieduzie» ŭdałosia znajści, supastaŭlajučy vydaču z unutranaha pošuku «VKontaktie» z publikacyjami «Biełaruskaha Hajuna» i «Bazy dadzienych», a taksama z čekami SDEK, možna zaŭvažyć fatahrafii ŭ vajskovaj formie.
Naprykład, Dźmitryj Saładoŭnikaŭ, jaki, jak miarkujecca, adpraviŭ try pasyłki ahulnaj vahoj 66 kh, vykładaŭ u «VKontaktie» svaju fatahrafiju, na jakoj možna razhledzieć palavy šaŭron unutranych vojskaŭ. U profili paznačany horad pražyvańnia — Rubcoŭsk. Miarkujučy pa dadzienych bazy «Žychary Rasii», u 2020 hodzie jon zajmaŭ pasadu kulamiotčyka ŭ čaści 6720. Numar telefona Saładoŭnikava ciapier zabłakavany.
Adkryta publikavaŭ fatahrafii ŭ vajskovaj formie i 32-hadovy Arciom Łazaraŭ, jaki nakiravaŭ u Rubcoŭsk zapčastki i elektrasamakat (usiaho 255 kiłahramaŭ).
Vypusknik Omskaha tankavaha inžyniernaha instytuta, Łazaraŭ prytrymlivajecca «manarchičnych pohladaŭ», zachaplajecca sportam i lubić palavańnie, vynikaje ź infarmacyi jaho profilu ŭ «VKontaktie». Na adnoj z sumiesnych fatahrafij Łazarava z žonkaj taksama možna zaŭvažyć šaŭron unutranych vojskaŭ — uskosnaje śviedčańnie taho, što jon słužyć u toj ža čaści, što i ŭžo zhadanyja adpraŭniki pasyłak.
Numar telefona Łazarava zabłakavany. Staraja staronka jaho žonki, na jakoj apublikavanaja vyšejnazvanaja sumiesnaja fatahrafija, adkrytaja (na ścianie profilu praŭkrainskija karystalniki sacsietki pišuć praklony; «Spadziajusia, što vy zabjaciesia ***** [nafih] na skradzienym elektrasamakacie», — tak vyhladaje apošni kamientar).
Vierahodna, usie adpraŭniki pasyłak z Mazyra ŭ Rubcoŭsk — vajskoŭcy 656-ha pałka apieratyŭnaha pryznačeńnia vojskaŭ nacyjanalnaj hvardyi (vajskovaj čaści 6720) — u adkrytych krynicach niama infarmacyi pra inšyja dziejsnyja čaści, jakija dysłakujucca ŭ Rubcoŭsku.
«Zdarova, ty jašče žyvy?»
Rasijanie, jakija adpraŭlali pasyłki, čyje kantaktnyja źviestki byli apublikavanyja, atrymlivajuć škvał zvankoŭ i paviedamleńniaŭ u sacyjalnych sietkach ad praŭkrainskich aktyvistaŭ. Infarmacyjaj pra paśpiachovyja «dazvony» aktyvisty dzielacca adzin z adnym u śpiecyjalnych telehram-čatach pa deananimizacyi rasijskich vajskoŭcaŭ, vyjaviŭ karespandent «Mieduzy».
«Karaciej, adzin chier telefon u apošniaha maradziora rabočy, — piša adzin z udzielnikaŭ čata. — Ale trubku nie biare. Da baby jaho ja datelefanavaŭsia, ale nie zapisaŭ. Jany * * * [blin] usie niepryčomyšy…»
Karespandent «Mieduzy» spytaŭsia ŭ inšaha ŭdzielnika čata, ci ŭdałosia jamu datelefanavacca da rasijskich vajskoŭcaŭ.
«Adzin adkazaŭ mnie na praciahu piaci chvilin. Na majo pryvitańnie «Zdarova, ty jašče žyvy?» jon skazaŭ — «Słava Rasii». Pisaŭ tut jašče inšamu, nie adkazvaje ŭžo try dni. I, napeŭna, nie adkaža», — paviedamiŭ respandent (namiakajučy, vierahodna, na hibiel svajho surazmoŭcy padčas bajavych dziejańniaŭ).
Mikałaju Ściapanavu, jaki adpraviŭ va Usuryjsk 140 kiłahramaŭ zapčastak i kandycyjanier, datelefanavaŭsia čałaviek, čyj hołas mohuć daviedacca amatary telefonnych rozyhryšaŭ, — ukrainski telefonny prankier Jaŭhien Volnaŭ (sapraŭdnaje imia — Mikita Kuvikaŭ). U 2020-m u Rasii jaho zavočna prysudzili da šaści hadoŭ pazbaŭleńnia voli za «Publičnaje apraŭdańnie teraryzmu». Jašče adna sprava suprać Volnava raspačataja za toje, što ŭ dzień pažaru ŭ handlovym centry «Zimovaja višnia» jon patelefanavaŭ u kiemieraŭski morh i paviedamiŭ rabotniku, što z handlovaha centra «pryviazuć bolš za 300 ciełaŭ».
«My vymušanyja spynić vašu pasyłku, bo pastupiła infarmacyja, što rečy byli skradzienyja. My budziem vymušanyja viarnuć ich nazad va Ukrainu. Dzie vy ŭziali hetyja zapčastki i kandycyjanier? U vas majucca čeki?»— havoryć u trubku prankier, pradstaviŭšysia supracoŭnikam kampanii SDEK. Zapis jon paźniej vykłaŭ u svaim tielehram-kanale.
Ściapanaŭ u adkaz burčyć niešta niezrazumiełaje. «My vyražam ciabie i tvaju siamju. Ciabie i tvaich paplečnikaŭ. Ty zrazumieŭ, pidaras? — adkazvaje Volnaŭ. — Ty ad adkaznaści nie syjdzieš».
Čytajcie taksama:
Dźvie traciny pasyłak ad rasijskich vajskoŭcaŭ, adpraŭlenych z Mazyra ŭ pačatku krasavika, źnikli ź sistemy ci nie dajšli da adrasataŭ
Rasijskaja słužba ekspres-dastaŭki SDEK pastaviła zasłon maradzioram
Kolki zapłacili za pierasyłku rečaŭ rasijskija sałdaty-maradziory?
«My pryjšli pa svajo, Rasija — moc». Jak žychary rasijskaha Rubcoŭska reahujuć na fakt maradziorstva ziemlakoŭ
Prajekt «Biełaruski Hajun» publikuje piersanalnyja źviestki rasijskich sałdat-maradzioraŭ. Rekardsmien pierasłaŭ dachaty amal paŭtony
Jak rasijskija vajskoŭcy vysyłajuć poštaj z Mazyra narabavanaje va Ukrainie VIDEA
