Adzin z zatrymanych znachodzicca ŭ lačebnaj ustanovie, paviedamiła MUS. Inšym akazanaja mieddapamoha na miescy.
Hetyja partyzany majuć dačynieńnie da źniščeńnia dźviuch relejnych šafaŭ sihnalnaj ustanoŭki pad Asipovičami.
Paźniej stali viadomyja proźviščy zatrymanych «rejkavych partyzan», vierahodna, babarujčan. Heta Minkievič Jaŭhien (28.01.1994), Klimaŭ Dźmitryj (21.09.1993), Aŭramcaŭ Uładzimir (07.04.1994).
Telehram-kanał @belzhd_live piša, što paśla zatrymańnia ludziam, jakija nie akazvali supracivu, byli metanakiravana prastrelenyja kalennyja sustavy.
Raniej «Rabočy ruch» raniej śćviardžaŭ, što partyzanam udałosia ŭciačy. Na zapyt «Našaj Nivy» «Rabočy ruch» patłumačyŭ, što, napeŭna, havorka pra try roznyja padpolnyja hrupy.
Sapraŭdy, u paviedamleńni MUS havorycca pra zatrymańnie tych, chto ździejśniŭ dyviersii 25 sakavika ŭ Barysaŭskim i 28 sakavika ŭ Asipovickim rajonach. Pra ich była infarmacyja ŭ čacie čyhunačnikaŭ 28 sakavika.
U paźniejšym paviedamleńni čyhunačnikaŭ havaryłasia pra incydent 30 sakavika.
Pa infarmacyi telehram-kanała čyhunačnikaŭ @belzhd_live, 30 sakavika na pierahonie Savičy — Biarezina (učastak Asipovičy — Homiel), pablizu prypynačnaha punkta «Babina», byli ŭskrytyja relejnyja šafy, adnu ź ich paśpieli padpalić.
U toj ža čas u lesapałasie niepadalok znachodziłasia patrulnaja hrupa z unutranych vojskaŭ, jakaja adkryła pa partyzanach ahoń z bajavoj zbroi. Ale tym udałosia ŭciačy ad pieraśledu.
Ceły šerah aktaŭ sabatažu na čyhuncy Biełarusi byŭ ździejśnieny na zaklik supolnaści «Bajpoł», jakaja jadnaje aficeraŭ — praciŭnikaŭ dyktatury, paśla taho jak Rasija z terytoryi Biełarusi napała na Ukrainu. Pa čyhuncy pieravoziać rasijskuju vajskovuju techniku, a taksama bojeprypasy, jakija vykarystoŭvajucca dla abstrełaŭ ukrainskich haradoŭ i pazicyj ukrainskaj armii.
Na niekatorych pierahonach byli spalenyja relejnyja šafy, na inšych — zamknuli drotam rejki, tym samym vyvieli z ładu sihnalizacyju. Pad Stoŭbcami siamja vyciahnuła na rejki biarviony. Hetyja akcyi zapavolvajuć ruch ciahnikoŭ na niekatory čas, ale nie ŭpłyvajuć na biaśpieku ruchu.
Biełaruskaj čyhunkaj viazuć ešałon rasijskaj braniatechniki. Rajon stancyi «Brest-Paŭdniovy»
Paśla hetaha stała viadoma pra aryšt u roznych rehijonach Biełarusi troch dziasiatkaŭ čyhunačnikaŭ, źviazanych z padpollem.
Akramia taho, Kamitet dziaržaŭnaj biaśpieki Biełarusi i HUBAZiK, struktura Ministerstva ŭnutranych spraŭ, jakaja vykonvaje funkcyi palityčnaj palicyi, za apošnija tydni aryštavała niekalki dziasiatkaŭ ludziej u Mazyry i rajonie, u Śvietłahorsku i rajonie, u Baranavičach, Stoŭbcach i ŭ Dziaržynsku. Metaj zatrymańniaŭ byŭ pošuk ludziej, jakija rychtavali akty sabatažu na čyhuncy abo pieradavali ŭ niezaležnyja ŚMI i telehram-kanały infarmacyju ab pieramiaščeńni rasijskich vojskaŭ ci puskach rakiet pa Ukrainie.
Stała taksama viadoma, što častku siłavikoŭ, jakija zajmalisia padaŭleńniem ruchu za hramadzianskija pravy, a taksama bajcoŭ unutranych vojskaŭ, pierakinuli na achovu čyhunki.
Va Ukrainie viestki pra dyviersii na biełaruskaj čyhuncy hramadskaja dumka pryniała ź vialikaj udziačnaściu.
Rasija napała na Ukrainu 24 lutaha, u tym liku z terytoryi Biełarusi. Hetaje hrubaje parušeńnie mižnarodnaha prava było asudžanaje Hienieralnaj asamblejaj AAN 140 hałasami suprać piaci, siarod hetych piaci i Biełaruś.
U vyniku ahresii zahinuli ŭžo dziasiatki tysiač vajskoŭcaŭ z abodvuch bakoŭ, a taksama mirnych žycharoŭ. Na akupavanych terytoryjach adbyvajucca sapraŭdnyja źvierstvy, ich maštab staŭ viadomy paśla razhromu rasijskich vojskaŭ pad Kijevam.
Zhodna ź mižnarodnym pravam, Biełaruś ličycca saŭdzielnicaj ahresii, bo pradastaviła svaju terytoryju dla viadzieńnia vajny.
«Pa supracoŭnikach pracuje niepasredna KDB». Padrabiaznaści zatrymańniaŭ na čyhuncy
