Padčas adnaho z raŭndaŭ pieramovaŭ.
Rasija nibyta praciahvaje nastojvać tolki na admovie Ukrainy ad płanaŭ ustupić u NATA, nieraźmiaščeńni vajskovych bazaŭ trecich krain na ŭkrainskaj terytoryi i na harantyjach, što Ukraina nie budzie sprabavać stvaryć jadziernuju zbroju.
U toj ža čas Maskva, sa słoŭ krynic FT, hatovaja pahadzicca na ŭstupleńnie Ukrainy ŭ Jeŭrasajuz i na šmatbakovyja harantyi biaśpieki Ukrainie z boku bolšaści mnohich mahutnych u vajskovych adnosinach dziaržaŭ, uklučajučy ZŠA i Vialikabrytaniju.
Ni «demilitaryzacyja», ni «denacyfikacyja», ni harantyi statusu ruskaj movy ŭ prajekcie pahadnieńnia nie značacca, piša vydańnie.
Pytańnie ab statusie Kryma i Danbasa prapanujecca vyrašać šlacham pramych pieramoŭ pamiž Uładzimiram Pucinym i Uładzimiram Zialenskim, piša Financial Times.
Pry hetym člen ukrainskaj delehacyi David Arachamija raskazaŭ haziecie, što harantyi biaśpieki Ukrainy, jakija, na dumku aŭtaraŭ pahadnieńnia, pavinny ratyfikavać Rasija, Kitaj, ZŠA, Vialikabrytanija, Kanada, Francyja, Hiermanija, Italija, Polšča, Turcyja i Izrail, «blizkija da 5-ha artykuła» Paŭnočnaatłantyčnaj damovy, pa jakoj usie členy aljansa abaviazvajucca abaraniać lubuju z sajuźnic, jakaja stała achviaraj ahresii treciaj krainy.
Čarhovyja pieramovy rasijskaj i ŭkrainskaj delehacyj pavinny prajści ŭ aŭtorak u Stambule.
Pry hetym ukrainskija i zachodnija dypłamaty nie daviarajuć Rasii i dapuskajuć, što za nibyta hatoŭnaściu da sastupak chavajecca žadańnie vyjhrać čas i pierahrupavać dy papoŭnić siły dla novaha nastupleńnia.
