«Haspadynia na istotnuju sastupku nie pajšła, skinuła tolki 15 dalaraŭ»
Alena zdymaje adnapakajovuju kvateru ŭ mikrarajonie Sucharava. Raniej jana płaciła za jaje 250 dalaraŭ, pa novym kursie heta kala 800 rubloŭ.
«Tak supała, što zapłacić za sakavik mnie treba było na samym pačatku miesiaca, kali dalary ŭ abmieńnikach pradavali pa 3,6 rubla. Takim čynam, zamiest zvykłych 650 rubloŭ ja musiła addać za tuju ž kvateru kala 900. Haspadynia na istotnuju sastupku nie pajšła, skinuła tolki 15 dalaraŭ (48 rubloŭ). Arhumientavała heta tym, što pazbaviłasia pracy. Jana ŭ jaje była źviazanaja ź impartam praduktaŭ, a ŭ jaje dva ŭnuki, jakich treba karmić», — kaža dziaŭčyna.
Alena papiaredziła haspadyniu kvatery, što płacić takuju sumu nie zmoža. I pačała šukać novaje žytło.
«Spačatku jana pastaviłasia spakojna, navat kazała, što ŭ jaje ŭžo jość achvotnyja na hetuju kvateru.
Kali praz paŭmiesiaca ja raptam zajaviła, što pierajazdžaju, haspadynia aburyłasia, pakryŭdziłasia i admoviłasia viartać mnie hrošy. Havorka idzie pra sumu bolš za sto dalaraŭ. Zastacca bieź ich mnie dyskamfortna, ale dakazać ničoha nie mahu: žyła biez damovy, choć i jana nie dapamahła b u situacyi, jakaja skłałasia.
Pa zakonie, treba papiaredžvać ułaśnika ab pierajeździe minimum za dva tydni, a ja papiaredziła za try dni, tamu što niečakana znajšła idealnuju novuju kvateru. Ułaśnik novaj kvatery čakać dva tydni admoviŭsia, i ja mahu jaho zrazumieć. Jon i tak zastaŭsia biez žycharoŭ, siamji ajcišnikaŭ, jakaja na fonie vajny pierajechała ŭ inšuju krainu», — kaža jana.
Alena zarablaje kala 1200 rubloŭ u miesiac, pracuje ŭ infarmahienctvie. Na apłatu kvatery ŭ jaje sychodziła amal 70 pracentaŭ ad zarobku.
«Voźmiem za asnovu tyja ž 250 dalaraŭ. Kali paličyć uvieś moj dachod na praciahu miesiaca, z ulikam padpracovak, atrymlivajecca kala 50 pracentaŭ, što mienš, ale taksama mocna bje pa kašalku, bo heta biez uliku kamunałki».
Kali pačaŭsia rezki rost kursu dalara, Alena taksama pacikaviłasia ŭ svajho kiraŭnictva, ci pavysiać joj zarobak u suviazi z takoj situacyjaj.
«U apošni miesiac u nas adbylisia kadravyja pierastanoŭki, i va ŭsich načalnikaŭ zarobak vyras. U zvyčajnych supracoŭnikaŭ, jak u mianie, — nie.
Pra rost zarpłaty kazać u bližejšaj pierśpiektyvie nie davodzicca, bo dla hetaha Minharvykankam musić vydzielić dadatkovyja srodki ŭ biudžet arhanizacyi. A adkul u jaho lišnija srodki?» — razvažaje dziaŭčyna.
«Bližej da dnia apłaty skazali, što raźlik budzie pa kursie 2,7»
Vieranicy 26 hadoŭ. Dziaŭčyna zdymaje ŭ stalicy jeŭradvušku razam ź siabroŭkaj kala stancyi mietro «Park Čaluskincaŭ». Za žytło jany płaciać 350 dalaraŭ (pa novym kursie heta 1140 rubloŭ).
«Z čałavieka 175 dalaraŭ (pa novym kursie — 570 rubloŭ). My płacili zaŭsiody ŭ rublach pa kursie Nacbanka. Paśla 24 lutaha, kali dalar pačaŭ raści, arendadaŭca napisaŭ, što pa canie sydziemsia. Bližej da dnia apłaty skazaŭ, što raźlik budzie pa kursie 2,7. Jak budzie dalej — nie zahadvaju. Ci skarektujem sumu ŭ dalarach, ci pryviažam da rubla», — kaža jana.
Sama Vieranika pracuje ŭ IT. Jaje zarobak pryviazany da dalara, tamu na arendu jana tracić stolki ž, kolki i raniej.
«U cełym ja zadavolenaja hetaj canoj. Ale kali b ja akazałasia ŭ takoj situacyi paru hadoŭ tamu, kali jašče ŭ IT nie pracavała, moj adkaz byŭ by admoŭny», — kaža jana.
«Haspadar sam prapanavaŭ padumać, jakaja suma budzie dla mianie pasilnaj»
Illa zdymaje adnapakajovuju kvateru na ŭskrajku Minska. Da pačatku vajny jon płaciŭ za arendu 220 dalaraŭ (716 rubloŭ pa novym kursie).
«Kali dalar skakanuŭ, ja pasivieŭ na čverć hałavy. Dumaŭ, jak budu apłačvać kvateru i ŭ toj ža čas nie haładać. Dalar byŭ pa 2,5 rubla, a staŭ 4.
Ja paličyŭ, i akazałasia, što ciapier mnie treba budzie płacić 880 rubloŭ za arendu. Mnie było niajomka abmiarkoŭvać źnižku na kvateru z haspadarami, tamu što jany sami byli vymušanyja źjechać ź Biełarusi ŭ Kijeŭ. A potym i adtul uciakać z-za vajny. Haspadar sam napisaŭ i prapanavaŭ padumać, jakaja suma budzie dla mianie pasilnaj.
Ja paprasiŭ źnizić košt arendy na 30 dalaraŭ na pieršy čas, ciapier płaču 190 dalaraŭ (618 rubloŭ). A dalej, kali nie zmahu, dyk budziem damaŭlacca jašče. Kali nie zmahu nabyć dalary, to možna i ŭ biełaruskich rublach pa kursie», — kaža jon.
Pracuje Illa śpiecyjalistam pa navučańni piersanału. Raniej na arendu žytła jon addavaŭ kala 40 pracentaŭ ad zarobku.
«Atrymlivaju ja 1500 rubloŭ. Ciapier na arendu traču 65 pracentaŭ ad zarobku. Padnimać jaho, nakolki ja viedaju, nie płanujuć. Chacia b sama praca zastałasia. Tak što ŭ dalarach ja raniej atrymlivaŭ 600, a ciapier pa novym kursie 460», — kaža jon.
«Vyrašyli, što lepš sastupić, čym šukać novych kvatarantaŭ»
Svajoj historyjaj padzialilisia taksama minčuki, jakija zdajuć kvateru.
«U nas adnapajoŭka ŭ cichim rajonie ŭ 15 chvilinach ad mietro. Zdajom jaje sa śniežnia. Spačatku vystavili ceńnik u 300 dalaraŭ, ale ŭ vyniku skinuli da 280», — kažuć haspadary.
Kali pačałasia vajna, kvataranty paprasili zafiksavać canu ŭ rublach.
«My damovilisia na kursie 2,6 rubla za dalar. Vyrašyli, što lepš tak, čym šukać novych kvatarantaŭ i samim apłačvać kamunałku za hety čas. 720 rubloŭ taksama hrošy. Bližejšy miesiac tak, paśla budziem znoŭ abhavorvać umovy».
«Kala 70% ekspartu ŭ ES — pad sankcyjami». Što čakaje biełaruskuju ekanomiku
Staŭ viadomy pamier siaredniaha zarobku za luty
