Razvažajučy ab pierśpiektyvach spynieńnia vajny praź pieramieny ŭnutry Rasii, Čały adznačyŭ, što kateharyčna nie zhodny z tezisam pra toje, što mir va Ukrainie moža być dasiahnuty praz pałacavy pieravarot.
Jon vykazaŭ dumku, što spynieńnie bajavych dziejańniaŭ nie źnižaje, a pavyšaje vierahodnaść pieravarotu ŭ Kramli, bolš za toje, pałacavy pieravarot nie źjaŭlajecca faktaram spynieńnia vajny. Chutčej — naadvarot.
Analityk źviarnuŭ uvahu na źmienu rytoryki aficyjnych asobaŭ — Piaskova i Zacharavaj. Maŭlaŭ, Rasija nasamreč nie staviła za metu źviaržeńnie ŭłady ŭ Kijevie, my rychtujemsia da miru i zaklučeńnia damovy. Na fonie raniejšych zajavaŭ pra nacystaŭ va Ukrainie heta moža vyklikać pytańni hramadstva da rasijskich uładaŭ: «Vy što, bolš nie źbirajeciesia zmahacca z nacystami?»
Ciapier u Rasii budzie źjaŭlacca davoli vialikaja kolkaść ludziej, jakija buduć niezadavolenyja situacyjaj, u jakuju zavioŭ krainu Pucin, ale pry hetym buduć bolš za jaho radykalnyja pa pohladach, prahnazuje Čały.
Mała taho, što pałacavyja pieravaroty zdarajucca niačasta, dyk jašče i demakratyzacyja ŭ vyniku hetych pieravarotaŭ zdarajecca chutčej jak vyklučeńnie, čym jak praviła.
Razvažajučy ab roli Bajdena i Kitaja, Čały adznačyŭ, što ŭpieršyniu na čale ZŠA akazaŭsia čałaviek ź vializnym dypłamatyčnym dośviedam. Analityk adznačyŭ, što ŭpieršyniu Złučanyja Štaty vykarystoŭvali danyja raźviedki nie tolki dla infarmavańnia vuzkaha koła asobaŭ, ale i šyroka tyražavali ich praz srodki masavaj infarmacyi.
Palityka ZŠA na źniešniaj arenie zaŭsiody zvodziłasia da dźviuch stratehij: ideja strymlivańnia moža abapiracca na panižeńnie kolkaści vyhad ad niepažadanaha raźvićcia padziej, to bok dziejańniaŭ praciŭnika, jakich treba paźbiehnuć, albo pavieličeńnie vydatkaŭ ad takich dziejańniaŭ. Apubličvańnie danych raźviedki vykonvaje dźvie hetyja zadačy adrazu.
Čały adznačyŭ, što paśla dźviuchhadzinnaj razmovy Bajdena ź Si Czińpiniem jon vielmi sumniajecca ŭ pierśpiektyvach taho, što Kitaj stanie apiryščam dla Rasii ŭ vajnie z Ukrainaj.
Čytajcie taksama:
Instytut vajennych daśledavańniaŭ: Sprava idzie da doŭhaj i kryvavaj vajny
