Fota: Reuters
«Kładziom ludziej u pałaty na padstaŭnyja łožki, u kalidory, na maleńkija kanapki, na žaleznyja kresiełki, vykatvajem u kalidory kancentratary»
«Z samaha pačatku kavidu ŭ 2020 hodzie ŭ nas uvieś terapieŭtyčny korpus adviedzieny pad «brudnuju zonu», my ni razu z pačatku pandemii nie začynialisia», — raskazvaje Jana (imia źmieniena), miedsiastra adnoj z haradskich balnic Minska, jakaja z pačatku pandemii prymaje pacyjentaŭ z karanavirusam. Dziaŭčyna kaža, što try adździaleńni ŭ korpusie raźličanyja na 54 łožki, jašče dva — pa 48 łožkaŭ, u tym liku z reanimacyjnymi pałatami. Ciapier, pa słovach miedyka, usie jany zapoŭnienyja.
— Paśla vosieńskaj chvali była pieradyška, kali ŭ nas lažała stolki ludziej, na kolki raźličana adździaleńnie. Tak, byvali ciažkija pacyjenty, ale my pracavali ŭ štatnym režymie. Z 27 studzienia znoŭ pajšoŭ uzdym. Tady naša balnica pryniała kala 70—80 pacyjentaŭ. Pastupali ŭ asnoŭnym vielmi pažyłyja ludzi, jany mieli patrebu ŭ padačy kisłarodu.
Tady, raspaviadaje Jana, miedyki mahli raźmiaścić usich u pałatach. Ale da vychodnych kanca studzienia miescaŭ stała nie chapać, choć, pavodle jaje słoŭ, pacyjenty stali pravodzić u adździaleńni mienš času.
— Nam u tyja dni skazali, što źjaviŭsia dakumient, pavodle jakoha pacyjenty z kavidam pavinny lažać u špitali šeść kojka-dzion. U dzień my pavinny vypisać minimum vosiem pacyjentaŭ, usio roŭna, budny jon ci vychodny. My stali adnych vypisvać dadomu na samaizalacyju, inšych pieravodzić u inšyja balnicy, dzie jany mohuć dalačycca (hetyja ludzi ŭžo stabilnyja, ale dla padstrachoŭki im lepš niejki čas zastavacca pad nahladam lekaraŭ). Ale tych miescaŭ, što my vyzvalili, było niedastatkova — administracyja balnicy pačała rabić abchody i vypisvać pacyjentaŭ, — tłumačyć dziaŭčyna i dadaje, što niekatoryja pacyjenty pastupajuć i z COVID-19, i z hrypam.
— Ciapier u adździaleńni lažyć bolš za 70 čałaviek. Dzieści 8—10 u sutki vypisvajuć, a pastupaje jašče 8—16. I my kładziem ludziej u pałaty na padstaŭnyja łožki, u kalidory, na maleńkija kanapki, na žaleznyja kresiełcy, vykatvajem u kalidory kancentratary kisłarodu dla tych, kamu jany patrebnyja.
«Ciapier pamiraje mienš ludziej, ale nivodnaha dnia aficyjnaja statystyka nie adlustroŭvała realnaść»
Miedyk adznačaje, što ciapier da jaje ŭ adździaleńnie pastupaje šmat pažyłych pacyjentaŭ, u maładych niaredka akramia COVID-19 dyjahnastujuć taksama hryp.
— Niejak u mianie pastupiła 11 žančyn starejšych za 80 hadoŭ za adzin viečar. Ale ciapier mienš pacyjentaŭ dachodziać da reanimacyi. I bolš tych, chto ź jaje vychodzić! Da prykładu, u korpusie pad reanimacyjnyja pałaty ciapier adviedziena 38 łožkaŭ (kali tolki adkrylisia pad kavid, było 18), ź ich, moža być, 26-28 zaniatyja. I pacyjentaŭ siaredniaha ŭzrostu, jakija traplajuć tudy, čaściej za ŭsio vychodžvajuć. My adčuvajem, što śmiarotnaść pry «amikronie» nižejšaja. U papiaredniuju chvalu byli strašnyja ličby. I havorka nie pra 10 čałaviek, jakija byli ŭ zvodcy pa krainie, — byvała, tolki ŭ nas za sutki ŭ morh traplała stolki pacyjentaŭ. Ciapier mienš ludziej pamiraje, ale mnie zdajecca, nivodnaha dnia aficyjnaja statystyka nie adlustroŭvała realnaść, uličvajučy, kolki balnic u Minsku, u abłasnych i rajonnych haradach.
Fota: Reuters
Jana patłumačyła, što nie moža supastavić realnuju zachvorvalnaść siarod nasielnictva sa statystykaj Ministerstva achovy zdaroŭja, adnak, pavodle jaje słoŭ, pakazčyki pa vypiscy pacyjentaŭ mohuć supadać.
— Niekatorych pacyjentaŭ adpraŭlajuć u inšuju balnicu dalečvacca, ale ž ad nas jany vypisvajucca i traplajuć u zvodku pa krainie. Ale ŭ druhuju balnicu jany taksama pierachodziać z dyjahnazam COVID-19, i adtul ich ža taksama vypišuć — vierahodna, adzin vypisany moža traplać u statystyku dvojčy, — vykazała zdahadku dziaŭčyna.
Ź joj zhodnaja i druhaja surazmoŭnica, terapieŭt inšaha adździaleńnia toj ža balnicy Viktoryja (imia źmieniena). Lekar taksama paćvierdziła, što ŭ balnicu paśla «mižchvalavaha zacišša» ŭ kancy studzienia stała pastupać bolš pacyjentaŭ. Pa jaje słovach, zaraz u adździaleńniach, raźličanych prykładna na 50 čałaviek, lažać kala 65-70.
— Ciapier u nas na 20-30% bolš pacyjentaŭ, čym u «spakojny» pieryjad. Ale ŭ «deltu» heta dachodziła da 30-40%. Ciapier prychodziać ludzi z «amikronam». Ličycca, što ŭ jaho bolš lohkaje ciačeńnie. U paraŭnańni z «deltaj» tak i jość. Ale, tym nie mienš, ciažkija chvoryja taksama jość. I čym bolšaja kolkaść tych, chto zachvareŭ pa krainie, tym bolš takich vypadkaŭ.
«Jość płan na vypisku, jon adpraŭlajecca ŭ Kamitet pa achovie zdaroŭja. Tam mohuć jaho nie ŭzhadnić i zapatrabavać pavialičyć»
Viktoryja taksama paćviardžaje, što ciapier pacyjentaŭ imknucca vypisvać paśla šaści dzion u balnicy.
— Niejki čas ludzi lečacca i, kali stabilnyja, mohuć pajści dadomu. Kali treba jašče nazirańnie lekara — u inšuju balnicu. Raniej na heta davałasia 12 dzion, potym 10, zaraz 6. Składana rastłumačyć łohiku Ministerstva achovy zdaroŭja, čamu idzie tendencyja na źmianšeńnie, bo zachvorvańnie ciažkaje, niekatorym pacyjentam treba niekalki tydniaŭ prabyć u stacyjanary. Mahčyma, heta źviazana z tym, što virus lahčejšy, abo z tym, što tych, chto zachvareŭ, jašče budzie ŭ šmat razoŭ bolš, bo my pakul nie dajšli da piku.
Jość aryjencirovačny płan na vypisku, jon stvarajecca ŭ pačatku tydnia i adpraŭlajecca ŭ Kamitet pa achovie zdaroŭja Minharvykankama. Tam mohuć jaho nie ŭzhadnić i zapatrabavać pavialičyć. Taksama, kali my nie ŭkłalisia ŭ hety płan, łajecca kiraŭnictva balnicy, kamitet. Usio heta vielmi niervova, niepryjemna i pieraškadžaje pracy, — kaža surazmoŭca. — Ale kojka-dni byli i da kavida, čym ich mienš dajecca na pacyjenta, tym bolš ludziej my možam pralačyć.
Treba razumieć, što nichto nie prymusić vypisać čałavieka, kali jon nie hatovy da hetaha, choć heta taksama niaprosta i patrabuje žaleznych niervaŭ doktara.
Fota: Reuters
Pavodle słoŭ lekara, za noč usie miescy, jakija ŭ adździaleńni ŭdałosia vyzvalić vypiskaj, zapaŭniajucca novymi pacyjentami. Užo pačynajuć źjaŭlacca łožki z chvorymi ŭ kalidorach adździaleńnia.
— U apošnija paŭtary tydni tolki za noč u siarednim pastupaje 8-10 čałaviek u kožnaje adździaleńnie. Ale mahu skazać, što ŭ reanimacyi lažyć mienš ludziej, čym u «Delta»-chvalu. Ale jašče tydni z dva tamu pacyjenty pastupali ŭ bolš lohkim stanie, čym ciapier, tamu što «lohkich» ciapier adsiejvajuć u paliklinikach abo ŭ pryjomnym adździaleńni. Da prykładu, kali pastupili čałaviek z tempieraturaj i kisłarodnazaležny, to miesca ŭ stacyjanary addaduć druhomu. I na kisłarod idzie ŭsio bolš ludziej — vierahodna, heta źviazana znoŭ ža z tym, što siarod nasielnictva ŭsio bolš chvarejuć.
A ŭ Biełarusi vybrali stratehiju pieraprafilavańnia łožkaŭ dla špitalizacyi ciažkich chvorych. U toj čas jak akcent pavinien być na praduchileńnie zaražeńnia tych, chto moža zachvareć ciažka ci maje ryzyki pamierci, — heta vakcynacyja, sacyjalnaje dystancyjavańnie, našeńnie masak.
Ciapier u balnicy taksama chvarejuć lekary.
— Na minułym tydni mnohija zachvareli, da hetaha ačuniali, ale zachvareli novyja supracoŭniki. A pacyjentaŭ šmat, nahruzka na daktaroŭ padvyšanaja. Lekar, jaki pracuje ŭ budni z pacyjentami, sychodzić nie ŭ 16 hadzin dadomu, a kali skončyć usiu pracu z pacyjentami, ich analizami, jašče byvajuć fors-mažory. Časam čałaviek sychodzić z pracy ŭ 19-20 hadzin.
Čytajcie taksama:
Jak karanavirus upłyvaje na zuby? Raskazvajuć miedyki
Jak lačyć amikron u chatnich umovach? Zapisali parady doktara Martava
Jak źviazanaje raźniavoleńnie aficyjnaj kavidnaj statystyki z refierendumam pa Kanstytucyi?
Čamu tak rezka vyrasła kolkaść vypadkaŭ karanavirusa? Voś što adkazali ŭ Minzdaroŭja
«Chto mnie daść balničny z tempieraturaj 37?» Raskazvajem, jak pracujuć biełarusy ŭ razhar «amikrona»
