«U śviecie čakajecca, što inflacyja budzie źnižacca da kanca biahučaha hoda. Hetaha čakajuć praktyčna ŭsie centralnyja banki. My taksama čakajem istotnaha zapavoleńnia inflacyi, i naša meta — pablizu 6%. Jość usie padstavy mierkavać, što ahulnymi namahańniami my zmožam zabiaśpiečyć toj uzrovień, jaki zapłanavany», — skazaŭ kiraŭnik Nacbanka.
Kałaŭr skazaŭ, što takoha ŭzroŭniu dasiahnuć niaprosta, bo jość impartavanaja inflacyja.
«U śviecie ŭsie krainy, i našy susiedzi, pieražyvajuć hety niepryjemny pieryjad inflacyi. U niekatorych krainach rekordy 30-hadovaj daŭniny. Centrabanki ciapier buduć prymać miery pa ŭzmacnieńni svajoj palityki», — dadaŭ jon.
Pavodle jaho prahnozaŭ, u I kvartale hetaha hoda inflacyja ŭ Biełarusi vyjdzie na svojeasablivaje płato.
«Buduć niejkija niaznačnyja adchileńni ad taho ŭzroŭniu, jaki my majem ciapier. Da ich treba stavicca spakojna, pakolki miery, jakija prymajucca i suśvietnymi centralnymi bankami, i nami, uradam, pracujuć z peŭnym łaham. Jość pierakananaść, što vałacilnaść, jakaja budzie ŭ pieršym kvartale, źmienicca ŭstojlivym trendam pa źnižeńni inflacyi i dasiahnieńniem mety da kanca hoda», — skazaŭ Pavieł Kałaŭr.
Na 2021 hod uradam płanavaŭsia ŭzrovień inflacyi ŭ krainie ŭ 5%. Ale pa vynikach hoda jon byŭ roŭna ŭ dva razy bolšy ‒ 10%.
Jak Nacbank i Biełstat schavali dvuchznačny adsotak inflacyi
