Piekin abviaściŭ pra pieršy vypadak u subotu paśla taho, jak pacyjent atrymaŭ stanoŭčy vynik testu. Ułady ačapili žyllovy kompleks i ofisny budynak pacyjenta i raspačali tatalnaje adsočvańnie kantaktaŭ.
Ułady pratestavali bolš za 16 500 čałaviek, jakija ŭvachodzili ŭ blizkaje atačeńnie chvoraha. Jany dali admoŭny vynik.
Admietna, što pacyjent apošnim časam nikudy nie jeździŭ, nie dzialiŭ prastoru ź inšymi chvorymi na amikron, abo ich kantaktami, nie sustrakaŭsia ź ludźmi, jakija viarnulisia z-za miažy.
Ale ślady štamu znajšli na paštovaj pasyłcy, jakuju adpravili z Kanady, i da jakoj dakranaŭsia pacyjent.
Kitaj raniej aficyjna papiaredžvaŭ, što pošta patencyjna moža stać krynicaj zaražeńnia. Dziaržaŭnaje paštovaje biuro krainy zaklikała svaich supracoŭnikaŭ pilna apracoŭvać listy i pasyłki z-za miažy.
Jašče adna patencyjnaja krynica zaražeńnia z-za miažy — impart zamarožanych praduktaŭ charčavańnia, śćviardžajuć kitajskija ŭłady. U ZŠA i ES staviacca skieptyčna da takich śćviardžeńniaŭ.
Kavid pieravažna raspaŭsiudžvajecca pa pavietry, traplajučy ŭ malusieńkija kropli vady, jakija vydzialajucca, kali ludzi razmaŭlajuć abo kašlajuć. SAAZ śćviardžaje, što ludzi mohuć zarazicca i paśla dotyku da zabrudžanych pavierchniaŭ, ale ryzyka vielmi nizkaja.
Ben Koŭlinh, prafiesar kafiedry epidemijałohii Hankonskaha ŭniviersiteta kaža, što nie vyklučaje takoj mahčymaści, ale ličyć małaimaviernym, što novy vypadak u Piekinie pryjšoŭ pa pošcie.
«Virusy mohuć zastavacca žyćciazdolnymi na pavierchniach na praciahu niekatoraha času pry nizkich tempieraturach, ale pieradača praz zabrudžanyja pavierchni nie źjaŭlajecca raspaŭsiudžanym šlacham pieradačy», — skazaŭ jon.
Marcin Chibbierd, prafiesar novych infiekcyjnych zachvorvańniaŭ Łondanskaj škoły hihijeny i trapičnaj miedycyny skazaŭ, što, choć pieradača virusa praz pavierchni moža adbyvacca na praciahu vielmi karotkich pieryjadaŭ času, doŭhaterminovaja pieradača małaimaviernaja.
Ab łakalnym raspaŭsiudzie varyjantu amikrona ŭ Kitai ŭpieršyniu paviedamili tydzień tamu ŭ partovym horadzie Ciańcziń, susiedzie Piekina.
Varyjant amikrona byŭ znojdzieny ŭ 10 uzorach, uziatych z paštovaha adpraŭleńnia, jakoje pacyjent atrymaŭ z Kanady praz ZŠA i Hankonh.
Rabotniki achovy zdaroŭja taksama adsačyli jašče adno paštovaje adpraŭleńnie, dastaŭlenaje ŭ inšaje miesca ad taho samaha adpraŭnika, i taksama vyjavili tam virus.
