Treba bracca za hałavu i zaviazvać z pryhodami. Praz dva hady budzie dvaccać siem - uzrost, viedajecie...
Ale hrošaj pa-raniejšamu brakuje, sonca jak zaŭždy zavabna ŭśmichajecca, a mienčučki takija ž niaŭrymślivyja kachanki.
Eratyčna-niećviarozyja pryhody liryčnaha hieroja Majkła Hałdziankova praciahvajucca. Jon (u sensie liryčny hieroj, a nie piśmieńnik Majkł Hałdziankoŭ) – kolišni ŭdzielnik seksualnaj revalucyi siarediny 90-ch i mistyčnych padarožžaŭ na voziera Bałduk, ciapier, skončyŭšy minski injaz, na volnych chlebach staličnaha žurnalista. Paśla knihi «Polota dubovoha lista» pryśpieła čarha novaj porcyi mienskich pryhodaŭ – najhłabalniejšaha i najsurjoźniejšaha ramana «Huano Žar-Pticy».
Kniha pierasypananaja biełarusizmami, minskizmami, hultaizmami i ałkahalizmam. Kalidory redakcyjaŭ «Znamienki» i «Priessbołu», kłub «Hrafici», usiudyisnaja milicejskija narady i haradskija fryki, mitynhi pierad prezidenckimi vybarami 2001 hoda. Zuchavatyja pryhody viasiołych hultajoŭ u azdableńni staličnych dekaracyjaŭ i piersanažaŭ. Miensk, bitma-nabitkavany haradskimi lehiendami, ciapier, zdajecca, dačakaŭsia svajho letapisca pačatku dvaccać pieršaha stahodździa. Letapisiec trapiŭsia niesamavity i biesšabašny, za što jamu tłusty dziakuj ad čytačoŭ.
«Kniha pisałasia, kali ja pracavaŭ u redakcyi «Znamia Junosti» ŭ 2002-2003 hodzie, - kaža Majkł Hałdziankoŭ, - Heta byŭ čas stahnacyi hramadstva, niejki brežnieŭski zastoj (jaki darečy praciahvajecca i dahetul). U svajoj knizie ja chacieŭ adlustravać hetuju ahulnuju mlavaść, što raźliłasia tady pa tvorčych kalektyvach. Chacieŭ napisać pra ludziej, jakija nie mohuć znajści vyjścia svajmu tvorčamu patencyjału. Napisaŭ: hladžu - atrymaŭsia satyryčny raman».
Samarekłama na zadniku (kudy ž bieź jaje, lubaj?!) abvieščaje «Huano Žar-pticy» «samaj śmiešnaj knihaj hetaha hoda». Musić być… Prynamsi kali što lepiej brać pačytać na pakul što ŭhreŭnyja žnivieńskija plažy, dyk «Huano».
Majkł Hołdienkov. Huano Žar-Pticy. Roman. — Minsk: Łohvinov, 2009. - 426 st., 500 ekz.
Majkł Hałdziankoŭ – piśmieńnik, žurnalist i linhvist. Aŭtar biestsielera, dapamožnika pa amierykanskim słenhu «Ostorožno: chot-doh!», a taksama papularna-histaryčnaj knihi «Ruś: druhaja istorija», u jakoj davodzić, što maskoŭskaja versija historyi Rusi poŭnaja niedakładnaściaŭ i pierakručvańniaŭ. Aŭtar anhielskich tekstaŭ dla Paliny Smołavaj i hurtu «Lavony». Žyvie ŭ Miensku. Lubić rajon Hrušaŭka.
