Spravu razhladaje sudździa Natalla Karablina. Pavodle materyjałaŭ papiaredniaha śledstva, Aleksandryna Michałožyna ŭ pieryjad ad 5 kastryčnika da 25 listapada 2020 hoda (dakładna vyznačyć datu śledčym nie ŭdałosia) na tytuniovy šapik «Tabakierka» farbaj čyrvonaha koleru naniesła «destruktyŭny» nadpis «3%». Suma škody skłała 70 rubloŭ.
Na sudzie Michałožyna pryznała vinu całkam.
Dziaŭčyna raspaviała, što nadpis na šapiku nanosiła ŭnačy razam sa svajoj znajomaj, ad jakoj nibyta i zychodziła inicyjatyva. Daty dakładna nie pamiataje, ale pierakonvała, što heta byŭ kastryčnik. Naniesła na šapiku ličbu «3». A voś chto dadaŭ znak «%» i čyrvonyja haryzantalnyja linii, nie viedaje. Zajaviła, što jany źjavilisia na šapiku praz try-čatyry dni paśla hetaha. Pryznałasia i ŭ tym, što raźmiaščała ŭlotki palityčnaha źmiestu. Kleiła ich na doškach abjavaŭ kala padjezdaŭ, ale tyja nie chacieli trymacca i padali dołu. Usio heta adbyvałasia ciaham adnoj nočy. Śćviardžała, što bolš takim ni jana, ni jaje znajomaja nie zajmalisia.
Bok dziaržabvinavačvańnia zaprasiŭ u suda pakarać dziaŭčynu štrafam u pamiery 100 bazavych vieličyń (2900 rubloŭ). Taki prysud i vyniesła sudździa Karablina.
