TASS paviedamiŭ, što Jeŭrasajuz abmiažujecca piersanalnymi sankcyjami, nie budzie ŭvodzić novych ekanamičnych sankcyj suprać łukašenkaŭcaŭ. Raniej havorka išła pra ŭviadzieńnie taksama abmiežavalnych mier suprać pradpryjemstvaŭ. U toj ža čas «Biełavija» zajaviła, što bolš nie budzie sadzić hramadzian Iraka, Siryi, Jemiena na rejsy z Turcyi ŭ Biełaruś. Heta vyhladaje jak častka płana deeskałacyi situacyi na miažy.
Hetamu papiaredničała dastaŭka vialikaj kałony mihrantaŭ na miažu Biełarusi i Polščy ŭ paniadziełak, zakryćcio Polščaj pierachoda Bruzhi—Kuźnica i pahroza całkam zakryć miažu ŭ vypadku dalejšaj eskałacyi, pahroza Alaksandra Łukašenki ŭ adkaz na takoje spynić tranzit hazu pa hazapravodzie «Jamał-Jeŭropa».
Polšča, Litva i Ukraina nakiravali na biełaruskuju miažu dadatkovyja siły, Rasija vysłała na patrulavańnie biełaruskaha nieba atamnyja bambardziroŭščyki.
U sieradu i čaćvier biełaruskaje pytańnie dvojčy abmiarkoŭvali Uładzimir Pucin i Anhieła Mierkiel — biesprecedentnaja intensiŭnaść. Inicyjatyva sychodziła ad niamieckaha boku. Bierlin patłumačyŭ, što Minsk adroksia pramych kantaktaŭ ź niamieckim bokam jašče ŭ 2020 hodzie, tamu Mierkiel razmaŭlaje z tym, chto maje ŭpłyŭ na Alaksandra Łukašenku i kaho ŭ Minsku pačujuć — z kiraŭnikom Rasii.
Faktyčna, heta aznačaje, što Zachad nie ličyć Alaksandra Łukašenku samastojnym u hetych pytańniach.
Zastajecca niajasnym, ci adbudziecca prosta deeskałacyja kanfliktu na miažy, umoŭna kažučy, ci vierniecca situacyja da stanu pierad paniadziełkam 8 listapada, ci Minsk całkam admovicca ad vykarystańnia mihrantaŭ u jakaści kozyra.
Pakul niama nijakich prykmiet, što Minsk hatovy palepšyć situacyju z pravami čałavieka ŭ krainie i narmalizavać adnosiny z krainami Jeŭrasajuza.
Na siońnia ŭ Biełarusi kala 3000 čałaviek asudžanyja ci prachodziać pa palityčna matyvavanych kryminalnych spravach, 847 ź ich atrymali status palitviaźnia. Biełaruś maje krajnie naciahnutyja adnosiny z čatyrma ź piaćciu svaich krain-susiedak.