Partret Franca Kafki i jaho nadmahilny kamień. Krynica depositphotos.com
Bolš za 50 malunkaŭ Kafki byli vyciahnutyja ŭ 2019 hodzie ź siejfa ŭ Šviejcaryi paśla hadoŭ sudovych raźbiralnictvaŭ. 28 kastryčnika jany ŭpieršyniu byli pradstaŭlenyja hramadskaści, raspaviadaje Guardian.
Raniej nieviadomyja eskizy i zamaloŭki raskryvajuć piśmieńnika jak čałavieka sa śvietłymi fantazijami. Na ich možna pabačyć kłoŭnaŭ z doŭhimi rukami i nahami, mužčyn u kaciałkach, padobnych da Čarli Čaplina, myšej, što śpiavajuć, karykatury na vierchavuju jazdu i šmat inšaha. Taksama malunki pakazvajuć, što Kafku vielmi cikaviła mahčymaść raźvivacca ŭ žyvapisie i vizualnym majsterstvie. Jaho ravieśniki ŭ škole i ŭniviersitecie duža cikavilisia mastactvam, i budučy hienij litaratury nie tolki padzialaŭ hetuju cikavaść, ale i sam rašuča praktykavaŭsia ŭ malavańni.
Krynica hetaha i nastupnych malunkaŭ Franca Kafki: The National Library of Israel. Max Brod Archive
Kafka nastolki lubiŭ malavać, što budučy siabar Franca Maks Brod, što paźniej i zrabiŭ jaho imia viadomym, spačatku viedaŭ jaho mienavita jak ilustratara. Brod časta dastavaŭ malunki Kafki sa śmiećcia ci vyrazaŭ ich z paloŭ jurydyčnych knih, dzie Kafka i malavaŭ ich. Kali ciažka chvory piśmieńnik paprasiŭ Broda spalić paśla śmierci svaje rukapisy, jon asabliva padkreśliŭ, što toj ža los pavinien napatkać i malunki.
Adnak Maks Brod praihnaravaŭ prośbu i pradstaviŭ hramadskaści tvory i 40 malunkaŭ Kafki, što padkreślivali zmročny charaktar tvoraŭ piśmieńnika. Astatnija eskizy byli schavanyja ad publiki na praciahu dziesiacihodździaŭ. Brod pamior u 1968 hodzie, ale pierad hetym pieradaŭ tvory i malunki Kafki, što jašče nie publikavalisia, svajmu sakrataru Ester Choffe z prośbaj addać ich u Jaŭrejski ŭniviersitet u Ijerusalimie, municypalnuju biblijateku ŭ Tel-Avivie ci ŭ inšuju jaŭrejskuju arhanizacyju.
Ale hetaja prośba nie była vykananaja, i papiery doŭhi čas lažali ŭ siejfach u Izraili i Šviejcaryi. U 2016 hodzie izrailski sud pastanaviŭ, što papiery pavinny naležać Nacyjanalnaj biblijatecy Izraila. U červieni hetaha hoda apošniaja častka papier była pradstaŭlenaja na sajcie Nacyjanalnaj biblijateki Izraila, a ciapier malunki płanujuć apublikavać u asobnym vydańni.
Apublikavany pieršy prazaičny tvor Jazepa Drazdoviča, jaki čakaŭ publikacyi bolš za stahodździe
«Hlań inšy raz na jaje — i rastańnie rastanie». Novyja vieršy paetaŭ — Chadanovič, Ščur, Bułaŭski
