«Zarobak zaležyć ad taho, jak vy ŭmiejecie pradavać svaje navyki»
Takim čynam, pieršaja navina. Vaša zarpłata nie zaležyć ad vašych navykaŭ, vopytu i adukacyi. Jana zaležyć ad taho, jak vy ŭmiejecie pradavać svaje navyki, vopyt i adukacyju. Ci nie ŭmiejecie.
Kali vy dumajecie, što heta adno i toje — nie. Navyk «prahramavać na Si» i navyk «raspaviadać pra toje, jak vy vyrašycie ŭsie prablemy najmalnika pry dapamozie navyku prahramavańnia na Si» — heta dva roznyja navyki. I jany nijak nie zaležać adzin ad druhoha.
Pry ŭładkavańni ŭ FAANG, naprykład, rekamiendujuć najmać śpiecyjalnych ahientaŭ dla pieramovaŭ ab zarpłacie. Jany prafiesijna padymuć vam zarpłatu ŭ ofiery na 50-100 tysiač štohod. Umiejuć hetyja ahienty prahramavać? Małavierahodna.
«Chočacie chutka raści pa zarpłacie — mianiajcie pracu čaściej»
Vydatna, a ad čaho jašče zaležyć zarpłata? Ad taho, jak časta vy źmianiajecie pracu, zrazumieła. Na biahučym miescy pracy za 6 hadoŭ ja atrymaŭ prykładna +50%. Pry hetym ja atrymlivaŭ ofiery +100% uvieś hety čas. Heta vielmi staraja prablema, i pryčyna — čałaviečaja sutnaść.
Dla liniejnaha mieniedžara niama sensu pramoŭcić staroha supracoŭnika, pakolki jon i tak pracuje. A voś dla mieniedžara, što najmaje, jość sens uziać kandydata, navat kali jon darahi, pakolki jamu treba zakryć vakansiju. I navat kali heta adzin i toj ža čałaviek, jon usio dumaje pa-roznamu.
I kožny raz, kali ja atrymlivaju infarmacyju ab zarobkach u kamandach, ja zaŭsiody baču adnu karcinu. Tyja, chto pracujuć daŭžej, atrymlivajuć mienš hrošaj, čym tyja, chto pryjšli ciapier.
Ci spraviadliva heta? Nie. Ci možacie asabista vy niešta z hetym zrabić? U teoryi. Ale heta nie dakładna. Vysnova numar dva: chočacie chutka raści pa zarpłacie — mianiajcie pracu čaściej.
«Kali viedaješ anhlijskuju, ty možaš tarhavacca značna lepš»
Adkul biarucca ličby, jakija tak dziviać ludziej nie ź IT? 400>600>1000? A heta ŭłaścivaść taho, što rynak u ajci nie łakalny, a hłabalny. I taho, što ŭsie prahramisty dobra viedajuć anhlijskuju. Usie, kamu prapanujuć takija zarobki.
Ty nie možaš prapanavać čałavieku mienš, čym jon atrymaje dystancyjna na zachodniuju kampaniju. A ŭ zachodniaj kampanii — dziki niedachop kadraŭ i dzikaja kankurencyja za supracoŭnikaŭ. Dystancyjka prapanuje, naprykład, $5 000 za devopsa. Kab jaho ŭziać u ofis — treba prapanavać jamu $5 500.
Darečy, a vy viedajecie, kolki kaštuje naohuł sam praces najmu? Nu voś jon kaštuje dachalery. Pa sutnaści, da momantu vychadu supracoŭnika kampanija ŭžo ŭkłała ŭ jaho 2-3 jaho zarpłaty. Na zarpłatu chantaraŭ, na pieramovy, na apłatu kvitkoŭ, techniki, i hetak dalej.
I z ulikam biahučaha stanu rynku ja bačyŭ zusim dziŭnyja rečy. Naprykład, čałaviek vychodziŭ u adpačynak adrazu paśla najmu. Nu, jon užo zapłanavaŭ. I jamu apłačvali adpačynak.
Vysnova treciaja: kali ty viedaješ anhlijskuju i možaš pracavać na zachodni rynak, ty možaš tarhavacca značna lepš.
«Čamu Ženia (m) i Ženia (ž) atrymlivajuć roznyja zarpłaty? U SND žančyn dušać»
U kamientarach pytalisia, čamu Ženia (m) i Ženia (ž) atrymlivajuć takija roznyja zarpłaty? Kambinacyja troch punktaŭ. U SND žančyn vielmi časta dušać: «nie vysoŭvajsia», «budź jak usie» i voś heta voś.
I tam, dzie Ženia (m) try razy ŭparyŭ siabie jak miehaśpiecyjalista, atrymaŭšy +150% za 5 hadoŭ, Ženia (ž) praciahvaje siadzieć na toj pracy, kudy jana pryjšła paśla instytuta. I za tyja ž 5 hadoŭ jana ŭ lepšym vypadku zrabiła +50%. A voś roźnica pamiž imi — roŭna 2 razy (tak, ja viedaju što nie ŭ dva i što pracenty ličacca nie tak, možacie napisać, što ja nie ŭmieju ŭ matematyku).
«Padrychtujcie arhumienty dla šefa, jakija jon pakaža pa łancužku vyšej»
Što rabić, kali mianiać pracu nie chočacca? Treba vieści pieramovy ab zarpłacie. Praściej za ŭsio heta rabić paśla taho, jak vy atrymajecie kirujučy vopyt. Ale dapuścim, što niama.
Vyšejstajačamu mieniedžaru važna, jak mienavita vy možacie zakryvać zadačy padraździaleńnia i nakolki ŭpłyvajecie na pośpiech hetaha padraździaleńnia. Apisvajcie toje, jak vy ŭpłyvajecie na pakazčyki biznesu i jak jany palepšylisia dziakujučy vam, i vašy šancy na pavyšeńnie buduć lepšyja.
Nie viedajecie, što mienavita vy robicie i navošta vy dla biznesu? Spytajecie svajho šefa. Jon pavinien viedać (kali nie viedaje — heta vielmi sumna). Prosta słovami praz rot: «Ja chaču bolš hrošaj, što ja pavinien rabić, kab mieć bolš hrošaj? Jak maja praca ŭpłyvaje na maju zarpłatu?»
«Kudy mnie raści, kab atrymlivać bolš hrošaj? Jak maja praca ŭpłyvaje na biznes kampanii? Jak ja mahu zrabić svaju pracu lepšaj z punktu hledžańnia biznesu?» I hetak dalej. Znoŭ ža, kali vaš šef nie moža vam adkazać — heta vielmi drenna. Mahčyma, jon nie vielmi ŭmieje kiravać.
Vysnovy:
- Soft skiły > chard skiły.
- Mianiać pracu bolš vyhadna, čym raści na biahučym miescy.
- Viedańnie zamiežnaj movy i zamiežnaha rynku adkryvaje novyja raźviłki zarobkaŭ.
- Nie viedaješ, jak raści? Spytaj svajho šefa.
«Śpiecyjalisty pa viersie rynku tarhujucca za akcyi i pašpart Vialikabrytanii»
I tak, hety mini-tredzik u pieršuju čarhu pra sfarmavanych śpiecyjalistaŭ, z 3-5 hadami vopytu chacia b. U pačatku karjery moža dziejacca što chočaš, tam možna i +200% za hod zrabić na tym ža miescy pracy, prosta zakryŭšy stažyroŭku.
A śpiecyjalisty pa viersie rynku amal nie rastuć, pakolki jany dasiahajuć toj «šklanoj stoli», kali ŭžo składana tarhavacca za zarpłatu. Jany tarhujucca za ŭmovy, akcyi, miesca ŭ radzie dyrektaraŭ i pašpart Vialikabrytanii ŭžo.
