2 hady «chimii» za «emodžy-haŭniašačku»
Historyja jakaja prama prahrymieła pa ŭsioj Biełarusi i nie tolki. 33-hadovaja Volha ź Ivacevičaŭ napisała pad infarmacyjaj pra miascovaha milicyjanta: «Znajomaja morda. Čałaviek — ***». Tolki zamiest zoračak u jaje kamiencie byli try emodžy z haŭniaškaj. Nieŭzabavie da jaje pryjšli, byŭ pieratrus, pahrozy adabrać dzicia, paśla zakryty sud. Vyrak — dva hady «chatniaj chimii» i 2000 rubloŭ kampiensacyi paciarpiełamu milicyjantu.
Ale na hetym usio nie skončyłasia. Paśla prysudu zasmučanaja Volha ŭ ivacevickim čacie napisała, što «milicyjant abas****sia i zhańbiŭsia». Toj paciarpieły milicyjant znoŭ napisaŭ na jaje zajavu za abrazu, tak što žančynu ciapier čakaje jašče adzin sud.
Kryminałka za kamientary ŭ adras pamierłaha siłavika
Mahiloŭski milicyjant pamior ad uskładnieńniaŭ paśla karanavirusa, pra heta napisali ŭ telehram-kanale adnaho sa ŚMI, dadaŭšy aficyjny niekrałoh z fota.
Za kamienty pad pastom zaviali kryminałku — niehatyŭnyja vyrazy paličyli abrazaj pradstaŭnika ŭłady. Viadoma, što jak minimum adzin z kamientataraŭ byŭ pakarany dvuma hadami «chatniaj chimii».
2000 rubloŭ za «chierojaŭ»
Tyja ž dva hady «chatniaj chimii» atrymaŭ i zvyčajny minski mantažnik. U lutym 2021 hoda mužčyna napisaŭ kamientar: «Takija chieroi i chaj uvieś śviet pačakaje» pad fota, dzie supracoŭniki MUS u formie zdymali nadzimanyja šaryki.
Heta paličyli abrazaj supracoŭnikaŭ MUS, zaviali kryminałku. Sami dvoje paciarpiełych na sud nie pryjšli, ale kožny vystaviŭ materyjalny pazoŭ u 1000 rubloŭ.
Linhvistyčnaja ekśpiertyza pastanaviła, što słova «chieroi» maje niehatyŭny charaktar. Samo saboj, aŭtara kamientara pryznali vinavatym.
Nie pytańnie, a «abraza prezidenta»
19-hadovy chłopiec pakinuŭ kamientar u telehram-čacie «Karatieli Biełarusi» pad publikacyjaj supolnaj vyjavy Łukašenki i Pucina. Jon napisaŭ: «Samaja miłaja para Uschodniaj Jeŭropy. Jak vy dumajecie, chto ŭ hetych adnosinach mužčyna?»
Hetaha chapiła, kab na junaka zaviali kryminałku. Na sudzie jon pryznaŭ vinu, tłumačyŭ, što nie mieŭ na mecie abrazy, a prosta napisaŭ kamientar. Kamientar abvinavačvany pakinuŭ na emocyjach «z-za pradastaŭleńnia kredytu Biełarusi».
Prakurorka zaprasiła dla chłopca hod kałonii, ale ž vyrak byŭ miakčejšym: 1,5 hoda «chatniaj chimii»
Nazvała kazłom — atrymała dva hady
Cikava, što pad represii traplajuć i kalehi «pakryŭdžanych».
Dva hady «chatniaj» chimii atrymała byłaja rabotnica Departamienta achovy MUS za toje, što abraziła supracoŭnika milicyi. Volha Šukałovič apublikavała kamientar pad fota milicyjanta: «Z-za takich kazłoŭ miantoŭ nie lubiać». Paśla zatrymańnia jaje zvolnili z pracy.
Dziaržabvinavaŭca prasiŭ pakarać Volhu dvuma hadami «chatniaj chimii». «Paciarpieły» zajaviŭ maralnuju škodu ŭ 1 tysiaču rubloŭ. Sudździa całkam padtrymała abvinavačańnie, piša «Viasna».
1,5 hady «chatniaj chimii» za «tv*ŕ»
Nijakija akaličnaści nie ŭpłyvajuć na vyniasieńnie prysudaŭ. 65-hadovuju chvoruju na ankałohiju piensijanierku Ludmiłu Chłusievič asudzili na 1,5 hoda «chatniaj chimii» za abrazu supracoŭnika milicyi ź Vilejki Žarykava.
Pad adnym z pastoŭ u sacyjalnaj sietcy «Adnakłaśniki» žančyna pakinuła kamientar z adnaho słova: «Tv*ŕ».
A žycharka Lidy Taćciana Źviarko, adpraviła paviedamleńnie znajomamu milicyjantu, ubačyŭšy jaho fota ŭ telehram-kanałach. Taksama jana pakinuła niekalki publičnych kamientaroŭ pra taho milicyjanta i Łukašenku.
Vynik sumny: pieratrusy, sud i žachlivy vyrak u 1,5 hoda kałonii. Žančyna maje małoje dzicia, jakoje jašče kormić hrudziami, ale hety faktar ni na što nie paŭpłyvaŭ.
Napisała «hienieralny prakuror — złačyniec», atrymała artykuł za paklop
Kali da kamientara ciažka padciahnuć adzin artykuł KK, dyk zaŭsiody znojdziecca inšy.
Tak žycharka Baraŭlanaŭ atrymała 2 hady chimii z nakiravańniem u papraŭčuju ŭstanovu za kamientar «hienieralny prakuror — złačyniec». Sud pryznaŭ jaje słovy paklopam. Akramia taho žančyna musić spłacić hienprakuroru Šviedu 9 tysiač rubloŭ kampiensacyi (sam Švied prasiŭ 10 tysiač, ale sud źmienšyŭ sumu).
«Ja z hetym č** u maładości hulała».
Taksama ŭ siońniašnija časy treba aściarožniej zhadvać svaich byłych kachankaŭ. Nastaŭnica z Baranavičaŭ atrymała dva hady chatniaj chimii za kamientar pad fota milicyjanta, jaki kaliści byŭ jaje kavaleram.
Žančyna napisała: «Ja z hetym č** u maładości hulała». Linhvistyčnaja ekśpiertyza ŭstanaviła, što słova «č**» niasie ŭ sabie prynižalnuju afarboŭku, jakaja źnievažaje čałaviečuju hodnaść.
Padčas sudovaha pasiadžeńnia abvinavačanaja całkam pryznała svaju vinu. Sud paličyŭ najaŭnaść dvuch dziaciej i «čystasardečnaje raskajańnie» źmiakčalnaj akaličnaściu.
U vyniku žančynie dali dva hady chatniaj chimii i kanfiskavali telefon.
Try hady kałonii za «šerah kamientaroŭ»
Jak raskazvała žonka mužčyny, Dzianis ubačyŭ videa žorstkich dziejańniaŭ siłavikoŭ i napisaŭ, što ź imi treba tak ža pastupać.
Heta ŭžo paciahnuła na kryminałku, zaviali spravu pa art. 130 KK («Raspalvańnie varožaści»). U vyniku, sud pakaraŭ mužčynu za «šerah kamientaroŭ, nakiravanych na raspalvańnie varožaści suprać pradstaŭnikoŭ siłavych struktur Biełarusi».
Dzianis atrymaŭ try hady kałonii. Pravaabaroncy pryznali jaho palitviaźniem.
«Miarzotniki» i prymušeńnie da pakajańnia
Historyja vyšejzhadanaha Dzianisa zusim nie adzinaja, kali «nie tyja» kamientary skončvalisia kałonijaj. Raniej łohika ŭ vyrakach i zatrymańniach pracavała taksama nie zaŭsiody, ale ž prahladałasia: što mahli kvalifikavać jak abrazu, toje, čaściej za ŭsio skončvałasia «chimijaj», kali chatniaj, a kali i zvyčajnaj, z nakiravańniem u papraŭčuju ŭstanovu.
Kali ž čałaviek pisaŭ pra nieabchodnaść siłavoha supracivu ci zaklikaŭ vychodzić na vulicu — heta ŭžo kvalifikavali pa bolš surjoznych artykułach, sud za takija spravy niaredka karaŭ ludziej kałonijaj.
Ale ž pieršy zvanočak praźvinieŭ paśla śmierci piłotaŭ u Baranavičach. U mai major Ničyporčyk i lejtenant Kukanienka sprabavali advieści niaspraŭny samalot ad nasielenaha punktu i katapultavalisia nadta pozna, abodva lotčyki zahinuli. Užo na nastupny dzień Łukašenka publična zahadaŭ KDB zaniacca tymi, chto pakidaje niehatyŭnyja dopisy pra piłotaŭ, nazvaŭšy takich kamientataraŭ «miarzotnikami» i «budučymi palicajami».
Prykładna praz tydzień siłaviki pachvalilisia: zatrymali nie mienš za 20 kamientataraŭ. Niekatorych ź ich pakazali ŭ siužecie pa BT, a namieśnik ministra ŭnutranych spraŭ Kazakievič paviedamiŭ, što zaviali spravu pa artykułu 130 KK (raspalvańnie varožaści).
Praŭda, niekatoryja z zatrymanych ananimna raspaviadali «Našaj Nivie», što navat śledčyja nie znachodzili ŭ ich dopisach padstaŭ dla kryminałki, ludziej adpuskali praz troje sutak, naŭprost patłumačyŭšy, što vypuścić ich adrazu nielha.
Kryminałka za spačuvańni siamji
Usio kančatkova źmianiłasia paśla pierastrełki ajcišnika Zielcera i kadebešnikaŭ.
Pa-pieršaje, kolkaść zatrymanych akazałasia ŭ 10 razoŭ bolšaj, čym paśla śmierci piłotaŭ. Pa słovach Kubrakova, za kamientary zatrymali kala 200 čałaviek.
Pa-druhoje, usich ich zatrymali ŭ miežach spravy, zaviedzienaj užo pa dvuch artykułach: toje ž raspalvańnie varožaści (art.130 KK) i abraza pradstaŭnika ŭłady (art.369 KK).
Pa-treciaje, źmianiŭsia padychod da hetych kamientataraŭ. Ciapier tyja ž, na žal, užo zvykłyja vybačeńni zatrymanych na videakamieru stali jašče bolš prynižalnymi. Ludziej prymušajuć kazać pra homaseksualnyja suviazi i navat nazyvać partnioraŭ.
Adrazu ž bolš žorstkija «videavybačeńni» pačali publikavacca i z zatrymanymi pa inšych spravach. Ludziam lepiać na iłby stykiery z «Pahoniaj», prymušajuć nazyvać svaje miedycynskija dyjahnazy i — taksama «nou-chau» — prymušajuć nazyvać zarobki, kali jany byli vialikimi pa biełaruskich mierkach.
I hałoŭnaje — źmiest kamientaraŭ, pa jakich možna adpravicca za kraty ciapier zusim nieabaviazkova niehatyŭny. Homielski vałancior i aktyvist Illa Mironaŭ byŭ zatrymany spačatku na troje sutak, a paśla pakinuty pad vartaj. Jaho kamient i pa siońnia visić na staroncy ŭ Fejsbuku: heta spačuvalnyja słovy rodnym i blizkim Zielcera. I ŭsio. Bieź nivodnaha kiepskaha słova ŭ adras zahinułaha siłavika.
Ale i hetaha siońnia dastatkova dla zatrymańnia i kryminałki.
Prymušeńnie da žałoby — tak chtości trapna acharaktaryzavaŭ toje, što pačałosia paśla śmierci Zielcera i kadebešnika Fiedasiuka. Ciapier biełarusam možna spačuvać tolki siłaviku i jaho rodnym.
Pra Zielcera ža pisać publična možna chiba tolki nazyvajučy jaho terarystam. Jaho nie zabili — jaho likvidavali. U jaho i žonki Maryi Uśpienskaj taksama zastaŭsia mały syn — nu i što?
Pradavačcy vyrak, prapahandystu — miedali
Aficyjnuju pazicyju jak u dačynieńni da Zielcera, tak i da taho, što ŭsie roŭnyja, ale niekatoryja raŭniejšyja, vydatna ilustruje telehram-kanał «Žoŭtyja źlivy», Azaronak i inšyja praŭładnyja viadučyja i kanały.
Toj ža Azaronak, kažučy pra Zielcera, dazvalaje sabie adkryta antysiemickija vykazvańni ŭ efiry dziaržtelebačańnia.
A epitety, jakija hučać ź jaho vusnaŭ u adras absalutna kankretnych ludziej — mraź, prastytutka, viedźma, p*dar — daŭno ŭžo b stali padstavaj dla kryminalnaj spravy.
Ale toje, za što ivacevickuju pradavačku karajuć «chimijaj», u vypadku Azaronka ŭznaharodžvajecca miedalami.
Heta nie žart, Hryhoryj sapraŭdy maje až dva miedali, adzin ź ich — «Za Advahu».
