Skrynšot ź siužeta BT
Na čyhuncy pracavaŭ 20 hod, syšoŭ u zabastoŭku paśla zabojstva Bandarenki
Siarhieju 45 hadoŭ. Jon rodam z Homiela. U stalicy zastaŭsia paśla taho, jak skončyŭ Biełaruski dziaržaŭny ŭniviersitet transpartu. Jaho adnakurśnikam byŭ ciapierašni pieršy namieśnik načalnika čyhunki Piotr Dułub.
Sam Siarhiej na čyhuncy pracavaŭ bolš za 20 hadoŭ.
Foty z sacyjalnych sietak
«Jon prajšoŭ šlach da ciahnikovaha dyśpietčara z samych nizoŭ. Pačynaŭ z apieratara, dziažurnaha padstancyi. U jaho da čyhunki duša lažała», — raskazvaje kaleha.
U listapadzie minułaha hoda Dziuba dałučyŭsia da zabastoŭki. Zajavu pra heta jon vykłaŭ u sieciva.
«Syšoŭ u stačku paśla zabojstva Ramana Bandarenki i taho, jak dali sutki jaho kalezie. Heta stała apošniaj kroplaj, — tłumačyć siabar mužčyny.
— Na nastupny dzień da jaho dadomu pryjazdžali kadraviki, prasili zvolnicca pa ŭłasnym žadańni, jon admoviŭsia. Jamu vynieśli vymovu za niajaŭku na pracu, paśla — druhuju. U vyniku zvolnili niby za prahuły i nievykanańnie słužbovych abaviazkaŭ».
Šmatdzietny baćka i «samy viadomy susied u dvary»
U Siarhieja troje dziaciej — syn i dźvie dački. Starejšaja vučycca na miedyka — pajšła pa śladach maci.
Susiedzi z Hrušaŭki pra byłoha čyhunačnika dobra adhukajucca.
«Pamiataju, muž źjechaŭ u praciahłuju kamandziroŭku i ja zastałasia adna z hrudnym dziciem. Zvanok u dźviery rankam, na parozie Siarhiej: «Pryvitańnie, daj klučy ad mašyny, u ciabie prakołata koła, tolki što zaŭvažyŭ na parkoŭcy». Praz hadzinu ŭsio zrabiŭ i prynios klučy. Choć my blizka nie siabravali. U hetym uvieś jon», — zhadvaje znajomaja.
«Heta samy viadomy susied u našym dvary. Navat nie ŭźnikaje pytańnie, chto zrabiŭ novuju łaŭku ci pačyściŭ darožki ad śniehu. Usie viedajuć, što heta Siarhiej. Kali ŭ ludziej prablemy i jon viedaŭ pra heta, to nie prachodziŭ mima.
Častka žycharoŭ navat ličyła, što jon supracoŭnik tavarystva ŭłaśnikaŭ, bo Siarhiej uvieś čas štości rabiŭ u dvary. Naprykład, abnaŭlaŭ dziciačuju placoŭku — to adramantuje jaje, to pryviazie piasok», — dzielicca inšy susied.
Pry pieratrusie šukali vybuchovyja materyjały
Paśla zvalnieńnia Dziuba pracavaŭ u taksi, dyśpietčaram u ŽESie — prymaŭ zajaŭki ad žycharoŭ rajona, adkazvaŭ za abstalavańnie.
U kancy vieraśnia joj źbiraŭsia ŭ Polšču na pracu — znajšoŭ vakansiju ŭ hruzapieravozkach. Užo była adkryta viza, ale 20 vieraśnia da Siarhieja pryjšli ź pieratrusam.
«Skazali, što nakont dyviersij na čyhuncy, šukajuć vybuchovyja materyjały. Ničoha nie znajšli. Žoncy skazali, što zabiaruć Siarhieja na prafiłaktyčnuju hutarku i chutka vypuściać», — apisvaje siabar.
Viadoma, što prychodzili pa artykule 356 «Zdrada dziaržavie».
Siarhiej pa-raniejšamu ŭ SIZA KDB. Pa hetaj spravie ŭ śledčym izalatary znachodziacca jašče dvoje rabotnikaŭ čyhunki — Hanna Abłab i Maksim Sakovič.
Što raskazali pa dziaržTB?
Na dziaržaŭnych telekanałach vyjšła niekalki siužetaŭ, pryśviečanych «Rabočamu ruchu». Zatrymanych rabotnikaŭ abvinavačvajuć va ŭdziele ŭ ekstremisckim farmiravańni i zdradzie dziaržavie.
Dziuba, pa viersii ANT, pryciahvaŭ u ruch novych ludziej, źbiraŭ infarmacyju na miescach. Ananimny pamiežnik u kadry raskazvaŭ, što Dziuba nibyta raspytvaŭ pra situacyju na miažy, zvolnienych, uzajemaadnosiny biełaruskich pamiežnikaŭ z rasijskimi.
U siužecie kazałasia, što na čyhuncy rychtavałasia dyviersija, kab paralizavać aršanski i minski vuzieł.
Na STB pakazali kadry dopytu Siarhieja. Na ich jon kaža, što abmiarkoŭvalisia pytańni, ci kłaści zakładki na čyhunačnyja puci.