U Stoŭbcach adšukali pareštki pachavańnia XVII stahodździa. Probašč parafii śviatoha Kazimira ksiondz-kanonik Ihar Łašuk paviedamiŭ 6 kastryčnika, što adbyvalisia pošuki relikvij Fabijana Mališoŭskaha — pieršaha daminikanskaha pryjora ŭ Stoŭbcach, piša katolik.life.
Havorka idzie ab katalickim manachu, jaki naradziŭsia ŭ 1583 hodzie ŭ polskim Pšemyśli. U 1632-1636 hadach zajmaŭ pasadu pravincyjała Ruskaj pravincyi, u skład jakoj uvachodziła 36 manastyroŭ ad Smalenska da Kamianiec-Padolskaha. U 1643 hodzie byŭ abrany pryjoram u Stoŭbcach, dzie ŭ 1644 hodzie pamior i paźniej byŭ pachavany tam u sklepie chrama.
Jaho mahiła stała miescam pałomnictva miascovaha nasielnictva, jakoje prypisvała zastupnictvu Fabijana Mališoŭskaha šmat dobraha. Pry pierapachavańni vyjavili, što cieła manacha zastałosia cełym. Pačalisia kroki pa bieatyfikacyi (pieršaja prystupka da zaličeńnia da śviatych).
Paśla padaŭleńnia paŭstańnia Kalinoŭskaha ŭ 1863-1864 hadach katalicki chram u Stoŭbcach pieratvaryli ŭ pravasłaŭny, a trunu ź ciełam Fabijana Mališoŭskaha schavali i zasypali ŭ padziamielle. U 1922 hodzie trunu adkapaŭ minski biskup Zihmund Łazinski. U 1953 hodzie savieckija ŭłady ŭzarvali kaścioł u Stoŭbcach. Ciapier na hetym histaryčnym miescy, dzie byŭ pachavany Fabijan Mališoŭski i inšyja śviatary, znachodzicca spartyŭnaja placoŭka siaredniaj škoły.
Pareštki ŭdałosia vyjavić dziakujučy staražytnamu apisańniu i płanu pachavańniaŭ. Znojdzienyja taksama častki truny, dadaŭ ksiondz Ihar Łašuk.
